സെയിന്റ്സ്-മിഷേൽ-ഡെ-സെയ്ന്റ്സ്: ആഗോള വിപണിയിലെ ഏഷ്യൻ രാജ്യങ്ങളുടെ കുത്തക തകർക്കാൻ ലക്ഷ്യമിട്ട് കാനഡ. വൈദ്യുത വാഹനങ്ങളുടെ (EV) ബാറ്ററികൾക്കും പ്രതിരോധ മേഖലയ്ക്കും അത്യന്താപേക്ഷിതമായ ഗ്രാഫൈറ്റ് ഉൽപ്പാദിപ്പിക്കുന്നതിനായി ക്യുബെക്കിലെ ഒരു ഗ്രാമത്തിൽ വമ്പൻ ഖനന പദ്ധതി ഒരുങ്ങുന്നു. ‘നോവോ മോണ്ട് ഗ്രാഫൈറ്റ്’ (Nouveau Monde Graphite) എന്ന കമ്പനിയാണ് കാനഡയെ ഈ മേഖലയിൽ സ്വയംപര്യാപ്തമാക്കാൻ മുന്നിട്ടിറങ്ങിയിരിക്കുന്നത്.
നിലവിൽ ഗ്രാഫൈറ്റ് വിപണിയിൽ ചൈന ഉൾപ്പെടെയുള്ള ഏഷ്യൻ രാജ്യങ്ങൾക്കാണ് ആധിപത്യം. എന്നാൽ കാനഡയിൽ തന്നെ ഗ്രാഫൈറ്റ് ഖനനം ചെയ്ത് സംസ്കരിക്കുന്നതിലൂടെ സുസ്ഥിരമായ വിതരണ ശൃംഖല ഉറപ്പാക്കാൻ സാധിക്കുമെന്ന് കമ്പനി സി.ഇ.ഒ എറിക് ഡിസൗൾനിയേഴ്സ് പറയുന്നു. ജി7 രാജ്യങ്ങൾക്ക് കുറഞ്ഞ വിലയിൽ ഉയർന്ന നിലവാരമുള്ള ഗ്രാഫൈറ്റ് ലഭ്യമാക്കുകയാണ് ഇതിലൂടെ ലക്ഷ്യമിടുന്നത്. ലിഥിയം-അയൺ ബാറ്ററികൾ, എയ്റോസ്പേസ്, പ്രതിരോധ നിർമ്മാണം തുടങ്ങിയ മേഖലകളിൽ ഗ്രാഫൈറ്റ് ഒഴിച്ചുകൂടാനാവാത്ത ഒന്നാണ്.
2025 നവംബറിൽ കനേഡിയൻ സർക്കാർ ഈ ഖനിയെ ‘ദേശീയ പ്രാധാന്യമുള്ള വൻകിട പദ്ധതി’ ആയി പ്രഖ്യാപിച്ചിരുന്നു. ഇതോടെ പദ്ധതിക്ക് ആവശ്യമായ അനുമതികൾ വേഗത്തിൽ ലഭിക്കും. ഫെഡറൽ ഗവൺമെന്റും ക്യുബെക് ഭരണകൂടവും പദ്ധതിയിൽ നിക്ഷേപം നടത്തിയിട്ടുണ്ട്. എങ്കിലും പരിസ്ഥിതി പ്രശ്നങ്ങൾ ഉയർത്തി ചില പ്രാദേശിക വിയോജിപ്പുകൾ നിലനിൽക്കുന്നുണ്ട്. ഇത് പരിഹരിക്കാൻ പ്രദേശവാസികളുമായും തദ്ദേശീയരായ അതികാമേക്വ് സമൂഹവുമായും കമ്പനി കരാറിലെത്തിയിട്ടുണ്ട്.
മരവ്യവസായത്തിന് തിരിച്ചടി നേരിട്ട സെയിന്റ്സ്-മിഷേൽ-ഡെ-സെയ്ന്റ്സ് എന്ന കൊച്ചു ഗ്രാമത്തിന് ഈ ഖനി വലിയൊരു പ്രതീക്ഷയാണ്. ഉയർന്ന ശമ്പളമുള്ള തൊഴിലവസരങ്ങൾ വരുന്നതോടെ നാടുവിട്ടുപോയ യുവാക്കൾ തിരികെ വരുമെന്നും ഗ്രാമം പഴയ പ്രതാപത്തിലേക്ക് ഉയരുമെന്നും മേയർ മാരിയോ വെൻ പ്രത്യാശ പ്രകടിപ്പിച്ചു. ഏകദേശം 100 കുടുംബങ്ങളെങ്കിലും പുതുതായി താമസം ഉറപ്പിച്ചാൽ മാത്രമേ ഗ്രാമത്തിലെ അടിസ്ഥാന സൗകര്യങ്ങൾ നിലനിർത്താൻ സാധിക്കൂ എന്ന അവസ്ഥയിലാണ് നിലവിൽ ഈ പ്രദേശം. നിലവിൽ പരീക്ഷണാടിസ്ഥാനത്തിലുള്ള ഖനനം ആരംഭിച്ചിട്ടുണ്ട്. എങ്കിലും വാണിജ്യാടിസ്ഥാനത്തിലുള്ള ഉൽപ്പാദനം 2028-ഓടെ മാത്രമേ പൂർണ്ണമായി സജ്ജമാകൂ എന്നാണ് കണക്കാക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Quebec mining company aims to lead the way in Canadian self-reliance
