ചൈനയിലേക്ക് ബീഫ് കയറ്റുമതി പുനരാരംഭിക്കാൻ കാനഡ; വിപണിയിൽ ഉണർവ് പ്രതീക്ഷിച്ച് കനേഡിയൻ ഉൽപ്പാദകർ

ഒട്ടാവ: കാനഡയിൽ നിന്നുള്ള ബീഫ് കയറ്റുമതിക്ക് ചൈന ഏർപ്പെടുത്തിയിരുന്ന നിരോധനം നീക്കി. കാനഡയിലെ കന്നുകാലികളുടെ എണ്ണത്തിൽ കുറവ് രേഖപ്പെടുത്തുകയും ബീഫ് വില വർധിച്ചുനിൽക്കുകയും ചെയ്യുന്ന സാഹചര്യത്തിലാണ് നിർണ്ണായകമായ ഈ നീക്കം. 2021-ൽ ആൽബർട്ടയിലെ ഒരു ഫാമിൽ ബോവിൻ സ്പോംഗിഫോം എൻസെഫലോപ്പതി (BSE) എന്ന രോഗം കണ്ടെത്തിയതിനെത്തുടർന്നാണ് ചൈന കനേഡിയൻ ബീഫിന് നിരോധനം ഏർപ്പെടുത്തിയത്. പുതിയ വിപണി ലഭ്യമാകുന്നത് രാജ്യത്തെ ഉൽപ്പാദകർക്ക് വലിയ ആശ്വാസമാകുമെന്ന് ആൽബർട്ടയിലെ പ്ലേറ്റോ കാറ്റിൽ കമ്പനി ഉടമ ജോൺ സ്മിത്ത് അറിയിച്ചു.

നിരോധനത്തിന് മുൻപ് ചൈനയിലേക്കുള്ള കാനഡയുടെ ബീഫ് കയറ്റുമതി പ്രതിവർഷം 200 മില്യൺ ഡോളറോളം എത്തിയിരുന്നു. കാനഡയിൽ ഡിമാൻഡ് കുറഞ്ഞ മാംസഭാഗങ്ങൾക്ക് ചൈനീസ് വിപണിയിൽ വലിയ സ്വീകാര്യതയുണ്ടെന്ന് ഉൽപ്പാദകർ വ്യക്തമാക്കുന്നു. കയറ്റുമതി പുനരാരംഭിക്കുന്നത് കന്നുകാലി വളർത്തുന്നവർക്കും പാക്കിംഗ് യൂണിറ്റുകൾക്കും സാമ്പത്തികമായി ഗുണകരമാകുമെന്നാണ് വിലയിരുത്തൽ. കയറ്റുമതി മുൻപത്തെ നിലയിലേക്ക് ഉയരാൻ സമയമെടുക്കുമെന്ന് വ്യവസായ വിദഗ്ധർ ചൂണ്ടിക്കാട്ടുന്നുണ്ട്.

വരും ആഴ്ചകളിൽ തന്നെ പ്രമുഖ പ്രോസസറുകൾ ചൈനയിലേക്ക് ബീഫ് അയച്ചുതുടങ്ങുമെന്ന് കനേഡിയൻ കാറ്റിൽ അസോസിയേഷൻ അറിയിച്ചു. എന്നാൽ കാനഡയിലും അമേരിക്കയിലും കന്നുകാലികളുടെ ലഭ്യത കുറവായതിനാൽ വലിയ തോതിലുള്ള കയറ്റുമതിക്ക് പരിമിതികളുണ്ടാകുമെന്ന് അസോസിയേഷൻ എക്സിക്യൂട്ടീവ് വൈസ് പ്രസിഡന്റ് ഡെന്നിസ് ലേക്രാഫ്റ്റ് വ്യക്തമാക്കി. നിലവിൽ കാനഡ ജപ്പാൻ, മെക്സിക്കോ, ദക്ഷിണ കൊറിയ എന്നിവിടങ്ങളിലേക്ക് വലിയ തോതിൽ ബീഫ് കയറ്റുമതി ചെയ്യുന്നുണ്ട്.

കാനഡയിൽ നീണ്ടുനിന്ന വരൾച്ച കാരണം കന്നുകാലി ഫാമുകളുടെ എണ്ണത്തിൽ വലിയ കുറവുണ്ടായിട്ടുണ്ട്. മഴ ലഭ്യത കൂടുകയും കന്നുകാലികളുടെ എണ്ണം വർധിക്കുകയും ചെയ്താൽ ചൈനയിൽ നിന്നുള്ള ആവശ്യം വില നിയന്ത്രിക്കാൻ സഹായിക്കുമെന്ന് ജോൺ സ്മിത്ത് പറഞ്ഞു. വിപണിയിലെ ഈ മാറ്റം വില വർധന തടയാനും ഉൽപ്പാദകർക്ക് നിക്ഷേപങ്ങളിൽ ആത്മവിശ്വാസം നൽകാനും സഹായിക്കുമെന്നും അദ്ദേഹം കൂട്ടിച്ചേർത്തു.

അതേസമയം, മുൻപ് പലതവണ ചൈന കയറ്റുമതി നിരോധനം ഏർപ്പെടുത്തിയ ചരിത്രമുള്ളതിനാൽ വിപണിയുടെ ദീർഘകാല വിശ്വാസ്യതയെക്കുറിച്ച് ഉൽപ്പാദകർക്കിടയിൽ ആശങ്ക നിലനിൽക്കുന്നുണ്ട്. രാഷ്ട്രീയവും വ്യാപാരപരവുമായ കാരണങ്ങളാൽ ചൈന സ്വീകരിക്കുന്ന നിലപാടുകൾ വിപണിയെ ബാധിക്കാനുള്ള സാധ്യതയുണ്ടെന്ന് സ്മിത്ത് നിരീക്ഷിച്ചു. എങ്കിലും ആഗോളതലത്തിൽ കൂടുതൽ വിപണികൾ ലഭ്യമാകുന്നത് കാനഡയുടെ ബീഫ് വ്യവസായത്തിന് കരുത്തുപകരുമെന്ന് അദ്ദേഹം വ്യക്തമാക്കി.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Canada to resume beef exports to China; Canadian producers expect market recovery