അമ്മയെ ഒരുനോക്ക് കാണാൻ കൊതിച്ച മകൻ, വിങ്ങുന്ന ഓർമ്മയായി സി.ജെ. റോയ്; ബെം​ഗളൂരുവിൽ പൊതുദർശനം

ബെംഗളൂരു: കോൺഫിഡന്റ് ഗ്രൂപ്പ് ചെയർമാൻ ഡോ. സി.ജെ. റോയിയുടെ അപ്രതീക്ഷിത വിയോഗത്തിന്റെ നടുക്കത്തിലാണ് ബെംഗളൂരു നഗരം. മരണത്തിന് തൊട്ടുമുൻപ് തന്റെ പ്രിയപ്പെട്ട അമ്മയെ ഫോണിൽ വിളിക്കണമെന്ന ആഗ്രഹം അദ്ദേഹം പ്രകടിപ്പിച്ചിരുന്നതായി പോലീസ് റിപ്പോർട്ടുകൾ. ശനിയാഴ്ച നേച്ചേഴ്‌സ് ലക്ഷ്വറി റിസോർട്ടിൽ പൊതുദർശനത്തിന് വെച്ച ഭൗതികദേഹത്തിന് അരികിലെത്തിയ അമ്മയുടെ നിലവിളി കണ്ടുനിന്നവരുടെ കണ്ണുകളെ ഈറനണിയിച്ചു. തന്റെ മകനെ അവസാനമായി ഒരുനോക്ക് കാണാൻ അമ്മ എത്തിയപ്പോൾ ഉണ്ടായ വികാരനിർഭരമായ രംഗങ്ങൾ വിലാപയാത്രയിൽ പങ്കെടുത്തവർക്കും വേദനയായി.

ആദായനികുതി വകുപ്പ് ഉദ്യോഗസ്ഥരുടെ കടുത്ത മാനസിക സമ്മർദ്ദമാണ് റോയിയുടെ മരണത്തിന് കാരണമായതെന്ന് കുടുംബം ഔദ്യോഗികമായി ആരോപിച്ചു. കോൺഫിഡന്റ് ഗ്രൂപ്പ് മാനേജിംഗ് ഡയറക്ടർ ടി.എ. ജോസഫ് അശോക് നഗർ പോലീസ് സ്റ്റേഷനിൽ നൽകിയ പരാതിയിൽ ആ കറുത്ത വെള്ളിയാഴ്ച നടന്ന സംഭവങ്ങൾ വിവരിക്കുന്നുണ്ട്. ഉച്ചയ്ക്ക് മൂന്ന് മണിയോടെ ആദായനികുതി ഉദ്യോഗസ്ഥർക്ക് മൊഴി നൽകാനായാണ് റോയ് ലാങ്‌ഫോർഡ് റോഡിലെ ഓഫീസിലെത്തിയത്. ഓഫീസിലെത്തിയ ഉടൻ തന്റെ ക്യാബിനിലേക്ക് പോയ അദ്ദേഹം, തനിക്ക് അമ്മയോട് സംസാരിക്കണമെന്ന് ആവശ്യപ്പെട്ടിരുന്നു.

തുടർന്ന് ആരെയും അകത്തേക്ക് വിടരുതെന്ന് സെക്യൂരിറ്റിയോട് നിർദ്ദേശിച്ച ശേഷം റോയ് ക്യാബിനുള്ളിൽ പ്രവേശിച്ചു. പത്ത് മിനിറ്റിന് ശേഷം വാതിലിൽ മുട്ടിയിട്ടും പ്രതികരണമില്ലാതായതോടെ ജീവനക്കാർ വാതിൽ തകർത്ത് അകത്തുകയറുകയായിരുന്നു. രക്തത്തിൽ കുളിച്ച നിലയിൽ കണ്ടെത്തിയ അദ്ദേഹത്തെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മരണത്തിന് തൊട്ടുമുൻപ് ആദായനികുതി ഉദ്യോഗസ്ഥരിൽ നിന്ന് അദ്ദേഹത്തിന് നേരിടേണ്ടി വന്ന ചോദ്യം ചെയ്യലുകൾ കടുത്ത മാനസിക സമ്മർദ്ദമുണ്ടാക്കിയെന്നാണ് കുടുംബത്തിന്റെ പരാതി.

സംഭവത്തിൽ വെസ്റ്റ് സോൺ ജോയിന്റ് കമ്മീഷണർ സി. വംശി കൃഷ്ണയുടെ നേതൃത്വത്തിലുള്ള പ്രത്യേക സംഘം അന്വേഷണം ആരംഭിച്ചു. ആദായനികുതി വകുപ്പ് ജോയിന്റ് ഡയറക്ടർമാരായ കൃഷ്ണപ്രസാദ്, നിതിൻ എന്നിവരെ പോലീസ് ചോദ്യം ചെയ്തു. കോൺഫിഡന്റ് ഗ്രൂപ്പ് ഓഫീസിൽ രാത്രി വൈകിയും പോലീസ് പരിശോധന നടത്തി രേഖകൾ ശേഖരിച്ചു. വരും ദിവസങ്ങളിൽ കൂടുതൽ ഉദ്യോഗസ്ഥരെ ചോദ്യം ചെയ്യാനാണ് അന്വേഷണ സംഘത്തിന്റെ തീരുമാനം. മരണത്തിലെ ദുരൂഹത നീക്കാൻ വിശദമായ ഫോറൻസിക് റിപ്പോർട്ടിനായി പോലീസ് കാത്തിരിക്കുകയാണ്.

സി.ജെ. റോയിയുടെ സംസ്കാരം ഇന്ന് വൈകിട്ട് നാല് മണിക്ക് ബന്നാർഘട്ടയിൽ നടക്കും. നേച്ചർസ് കാസ്കേഡിൽ ഉച്ചയ്ക്ക് രണ്ട് മണി വരെ പൊതുദർശനം തുടരും. സെന്റ് ജോസഫ്‌സ് സിറോ മലബാർ പള്ളിയിലെ അന്ത്യശുശ്രൂഷകൾക്ക് ശേഷം വൻ ജനവലിയുടെ സാന്നിധ്യത്തിലാകും സംസ്കാര ചടങ്ങുകൾ നടക്കുക. വ്യവസായ പ്രമുഖരും രാഷ്ട്രീയ നേതാക്കളും അദ്ദേഹത്തിന് അന്തിമോപചാരം അർപ്പിക്കാൻ എത്തിക്കൊണ്ടിരിക്കുകയാണ്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Son longs to see his mother, C.J. Roy becomes a haunting memory; Public viewing in Bengaluru