ഒട്ടാവ; പണപ്പെരുപ്പം കുടുംബ ബജറ്റുകളെ ബാധിക്കുന്നത് തുടരുന്ന സാഹചര്യത്തിൽ, കാനഡക്കാർക്ക് വീട്ടുവാടകയേക്കാൾ വലിയ ആശങ്ക പലവ്യഞ്ജനങ്ങളുടെ വിലവർദ്ധനവാണെന്ന് പുതിയ സർവ്വേ റിപ്പോർട്ട്. നാനോസ് റിസർച്ച് നടത്തിയ അഭിപ്രായ സർവ്വേയിലാണ് ഈ കണ്ടെത്തൽ. 2026-ൽ ഏത് മേഖലയിലാണ് ചെലവ് കുറയാൻ ആഗ്രഹിക്കുന്നത് എന്ന ചോദ്യത്തിന് ഭൂരിഭാഗം പേരും പലവ്യഞ്ജന വില എന്നാണ് ഉത്തരം നൽകിയത്.
സർവ്വേയിൽ പങ്കെടുത്ത 52.3 ശതമാനം പേരും പലവ്യഞ്ജന വില കുറയണമെന്ന ആവിശ്യമാണ് മുന്നോട്ട് വച്ചത്. 23.5 ശതമാനം പേർ ഭവനചെലവിനും, 9.3 ശതമാനം പേർ ആരോഗ്യ പരിരക്ഷാ ചെലവിനും മുൻഗണന നൽകി. ചെലവ് കുറയ്ക്കേണ്ട രണ്ടാമത്തെ പ്രധാന മേഖലയായി 29 ശതമാനം പേർ ഭവനചെലവിനെ തെരഞ്ഞെടുത്തപ്പോൾ 28 ശതമാനം പേർ പലവ്യഞ്ജന മേഖലയെയാണ് സൂചിപ്പിച്ചത്.
പ്രാദേശികാടിസ്ഥാനത്തിൽ പരിശോധിക്കുമ്പോൾ പ്രയറി പ്രവിശ്യകളിലെ 60.7 ശതമാനം പേരും അറ്റ്ലാന്റിക് മേഖലയിലെ 55.8 ശതമാനം പേരും ഭക്ഷണത്തിനുള്ള ചെലവ് കുറയ്ക്കണമെന്ന് ആവശ്യപ്പെട്ടു. പ്രായത്തിന്റെയും ലിംഗഭേദത്തിന്റെയും അടിസ്ഥാനത്തിൽ, 35-54 വയസ്സ് പ്രായമുള്ള പുരുഷന്മാരാണ് (56.5 ശതമാനം) പലവ്യഞ്ജന വിലയിൽ വലിയ ആശ്വാസം വേണമെന്ന് ആഗ്രഹിക്കുന്നത്. ക്യുബെക്കിലും (26.8 ശതമാനം) ബിസിയിലുമാണ് (28.7 ശതമാനം) ഭവനചെലവ് കുറയ്ക്കണമെന്ന ആവശ്യം ശക്തമായിരിക്കുന്നത്.
പലവ്യഞ്ജന വിലയും ഭവനചെലവും കഴിഞ്ഞാൽ ആരോഗ്യ മേഖലയിലാണ് ചെലവ് കുറയാൻ കാനഡക്കാർ ആഗ്രഹിക്കുന്നത്. അറ്റ്ലാന്റിക് പ്രവിശ്യകളിലെ 14.1 ശതമാനം പേരും ഒന്റാറിയോയിലെ 10.1 ശതമാനം പേരും ഈ അഭിപ്രായം രേഖപ്പെടുത്തി. 2025 ഡിസംബർ 27 മുതൽ 29 വരെ 1,077 കാനഡക്കാർക്കിടയിലാണ് ഈ സർവ്വേ നടത്തിയത്. ഇതിന് പ്ലസ് അല്ലെങ്കിൽ മൈനസ് 3.0 ശതമാനം കൃത്യതയുണ്ടെന്നും റിപ്പോർട്ട് വ്യക്തമാക്കുന്നു.
ജനങ്ങളുടെ വർദ്ധിച്ചുവരുന്ന ജീവിതച്ചെലവ് പരിഗണിച്ച് പ്രധാനമന്ത്രി മാർക്ക് കാർണി ഈ ആഴ്ച പുതിയ പദ്ധതികൾ പ്രഖ്യാപിച്ചിരുന്നു. ജിഎസ്ടി ക്രെഡിറ്റ് വർദ്ധനവ്, ഭക്ഷ്യ വിതരണക്കാർക്കും ഫുഡ് ബാങ്കുകൾക്കുമുള്ള ധനസഹായം, ‘ശ്രിങ്ക്ഫ്ലേഷൻ’ (Shrinkflation) നേരിടാനുള്ള ദേശീയ ഭക്ഷ്യ സുരക്ഷാ നയം എന്നിവ ഇതിൽ ഉൾപ്പെടുന്നു. വിലക്കയറ്റം പിടിച്ചുനിർത്താൻ സർക്കാർ ഇടപെടൽ അനിവാര്യമാണെന്നാണ് സർവ്വേ ഫലങ്ങൾ നൽകുന്ന സൂചന.
കാനഡയിലെ ഏറ്റവും പുതിയ വാർത്തകൾക്കായി : https://chat.whatsapp.com/JNSnrvnSqw1DUJljLTLp82
Grocery prices a bigger concern than rent in Canada; people want to cut costs
