ന്യൂ ബ്രൺസ്വിക്കിൽ ലിംഗസ്ഥിരീകരണ ചികിത്സാ ക്ലിനിക്ക് സ്ഥാപിക്കണം; ആവശ്യവുമായി എൻ.ബി. ട്രാൻസ്ജെൻഡർ ഹെൽത്ത് നെറ്റ്‌വർക്ക്

ന്യൂ ബ്രൺസ്വിക്: ട്രാൻസ്ജെൻഡർ വിഭാഗക്കാർ നേരിടുന്ന ആരോഗ്യപ്രശ്നങ്ങൾക്ക് പരിഹാരമായി പ്രത്യേക ചികിത്സാ ക്ലിനിക്ക് (Gender-affirming care clinic) സ്ഥാപിക്കണമെന്ന് ആവശ്യവുമായി ന്യൂ ബ്രൺസ്വിക് ട്രാൻസ്ജെൻഡർ ഹെൽത്ത് നെറ്റ്‌വർക്ക് രംഗത്ത്. ടൂ-സ്പിരിറ്റ്, ട്രാൻസ്ജെൻഡർ, ലിംഗ വൈവിധ്യമുള്ള (2STGD) വ്യക്തികൾക്ക് മികച്ചതും എളുപ്പത്തിൽ ലഭ്യമാകുന്നതുമായ ആരോഗ്യപരിചരണം ഉറപ്പാക്കുന്നതിനായി പ്രവിശ്യാ സർക്കാർ അടിയന്തരമായി ഇടപെടണമെന്ന് സംഘടന ആവശ്യപ്പെട്ടു.

നിലവിൽ പ്രവിശ്യാ സർക്കാരും ഹൊറൈസൺ ഹെൽത്ത് (Horizon Health), വിറ്റാലൈറ്റ് (Vitalité) എന്നീ ആരോഗ്യ ഏജൻസികളും സംയുക്തമായി ഇത്തരമൊരു ക്ലിനിക്ക് സ്ഥാപിക്കണമെന്നാണ് നെറ്റ്‌വർക്കിന്റെ ആവശ്യം. 2021-ലെ സ്റ്റാറ്റിസ്റ്റിക്സ് കാനഡ സെൻസസ് പ്രകാരം ന്യൂ ബ്രൺസ്വിക്കിൽ ദേശീയ ശരാശരിയേക്കാൾ കൂടുതൽ ട്രാൻസ്ജെൻഡർ ജനസംഖ്യയുണ്ട്. എന്നാൽ ഇവർക്കായി മാത്രമായി സമർപ്പിക്കപ്പെട്ട പ്രത്യേക ക്ലിനിക്കുകളോ ചികിത്സാ പദ്ധതികളോ നിലവിൽ പ്രവിശ്യയിൽ ലഭ്യമല്ലെന്നത് ഗുരുതരമായ പോരായ്മയായി ചൂണ്ടിക്കാണിക്കപ്പെടുന്നു.

ന്യൂ ബ്രൺസ്വിക്കിൽ ലിംഗസ്ഥിരീകരണ ചികിത്സ നൽകുന്ന വിവിധ സേവനദാതാക്കൾ ഉണ്ടെങ്കിലും ഇവരുടെ പ്രവർത്തനം ഏകോപിതമല്ലെന്ന് ഫ്രെഡറിക്ടണിലെ കുടുംബ ഡോക്ടറായ ഡോ. കാത്ലീൻ ടെയ്‌ലർ പറഞ്ഞു. താമസിക്കുന്ന പ്രദേശം അനുസരിച്ച് ചികിത്സയുടെ ഗുണനിലവാരത്തിലും കാത്തിരിപ്പ് സമയത്തിലും വലിയ വ്യത്യാസങ്ങൾ അനുഭവപ്പെടുന്നുണ്ട്. നോവ സ്കോഷ്യ, പ്രിൻസ് എഡ്വേർഡ് ഐലൻഡ് തുടങ്ങിയ അയൽ പ്രവിശ്യകൾ ഇത്തരം ക്ലിനിക്കുകൾ നേരത്തെ തന്നെ ആരംഭിച്ചിട്ടുണ്ടെന്നും സമാനമായ രീതിയിലുള്ള വേഗതയേറിയ നടപടികൾ ന്യൂ ബ്രൺസ്വിക് സർക്കാരിൽ നിന്നും പ്രതീക്ഷിക്കുന്നതായും ഡോക്ടർ വ്യക്തമാക്കി.

കേന്ദ്രീകൃതമായ ഒരു ക്ലിനിക്ക് വഴി ഹോർമോൺ ചികിത്സ, ശസ്ത്രക്രിയാ മാർഗനിർദ്ദേശങ്ങൾ, മാനസികാരോഗ്യ പിന്തുണ, വിദഗ്ധ പരിശീലനം എന്നിവ ഉറപ്പാക്കാൻ സാധിക്കും. ന്യൂ ബ്രൺസ്വിക്കിലെ ട്രാൻസ്ജെൻഡർ സമൂഹത്തിൽ 64 ശതമാനം പേർക്കും കൃത്യമായ ചികിത്സ ലഭിക്കുന്നില്ലെന്നും, ഇതിന്റെ ഫലമായി വലിയൊരു വിഭാഗം കടുത്ത മാനസിക സമ്മർദ്ദവും ആത്മഹത്യാ പ്രവണതയും നേരിടുന്നുണ്ടെന്നും നെറ്റ്‌വർക്ക് ചൂണ്ടിക്കാട്ടി. ഈ സാഹചര്യം കണക്കിലെടുത്ത് എത്രയും വേഗം പ്രവിശ്യാതലത്തിൽ ഏകോപിതമായ ചികിത്സാ സംവിധാനം ഒരുക്കണമെന്നാണ് ഉയരുന്ന ആവശ്യം.

കാനഡയിലെ ഏറ്റവും പുതിയ വാർത്തകൾക്കായി:https://chat.whatsapp.com/Ghtm5bIjsVN8SItyDlaj3Q?mode=wwt

NB Transgender Health Network calls for gender confirmation clinic in New Brunswick