ഒന്റാരിയോ: ഒന്റാരിയോയിൽ കടുത്ത ശൈത്യം തുടരുന്നതിനിടെ മരങ്ങൾ പൊട്ടിത്തെറിക്കുന്നതിന് സമാനമായ ശബ്ദമുണ്ടാകുന്ന പ്രതിഭാസത്തെക്കുറിച്ച് വിശദീകരണവുമായി വിദഗ്ധർ രംഗത്തെത്തി. ‘ഫ്രോസ്റ്റ് ക്രാക്ക്’ (Frost cracks) എന്ന് വിളിക്കപ്പെടുന്ന ഈ പ്രതിഭാസം താപനില പെട്ടെന്ന് താഴുന്ന സമയത്താണ് സംഭവിക്കുന്നത്. മരങ്ങൾ യഥാർത്ഥത്തിൽ പൊട്ടിത്തെറിക്കുകയല്ലെന്നും എന്നാൽ അവയുടെ കാണ്ഡം പെട്ടെന്ന് പിളരുമ്പോൾ വലിയ ശബ്ദമുണ്ടാകാമെന്നും വിദഗ്ധർ വ്യക്തമാക്കി. ശനിയാഴ്ച ടൊറന്റോയിൽ അനുഭവപ്പെടുന്ന അതിശൈത്യം മരങ്ങളെ ഇത്തരത്തിൽ ബാധിച്ചേക്കാമെന്നാണ് വിലയിരുത്തൽ.
താപനില അതിവേഗം കുറയുമ്പോൾ മരത്തിനുള്ളിലെ സ്രവം തണുത്തുറയുകയും വികസിക്കുകയും ചെയ്യുന്നു. ഇത് മരത്തിനുള്ളിൽ വലിയ മർദ്ദം ചെലുത്തുമെന്ന് ഫോറസ്റ്റ് കാനഡയിലെ ഡയറക്ടർ വാൽ ഡെസീൽ അറിയിച്ചു. ഇതേസമയം മരത്തിന്റെ പുറംതൊലി ഉൾഭാഗത്തെക്കാൾ വേഗത്തിൽ തണുക്കുകയും ചുരുങ്ങുകയും ചെയ്യുന്നു. മരത്തിനുള്ളിലെ മർദ്ദവും പുറംഭാഗത്തെ അസമമായ തണുപ്പും ചേരുമ്പോൾ കാണ്ഡം പെട്ടെന്ന് പിളരുകയും വലിയ ശബ്ദമുണ്ടാകുകയും ചെയ്യുന്നു. ബിർച്ച്, മേപ്പിൾ തുടങ്ങിയ കട്ടി കുറഞ്ഞ പുറംതൊലിയുള്ള മരങ്ങളിലാണ് ഇത് കൂടുതലായി സംഭവിക്കുന്നത്.
മരത്തിന്റെ ഉൾഭാഗം ദ്രവിച്ചുപോയ മരങ്ങളിൽ ഈ പ്രതിഭാസം കൂടുതൽ രൂക്ഷമായിരിക്കും. അത്തരം മരങ്ങളുടെ ഉൾഭാഗത്ത് ഈർപ്പം കൂടുതലായിരിക്കുമെന്നും തണുത്തുറയുമ്പോൾ പൈപ്പ് പൊട്ടുന്നതിന് സമാനമായ രീതിയിൽ മരം പിളരാമെന്നും ടൊറന്റോ സർവകലാശാലയിലെ പ്രൊഫസർ ഷോൺ തോമസ് വ്യക്തമാക്കി. കാറ്റും തണുപ്പും കൂടുമ്പോൾ ടൊറന്റോയിൽ താപനില -33 ഡിഗ്രി സെൽഷ്യസ് വരെ അനുഭവപ്പെടാൻ സാധ്യതയുണ്ടെന്ന് കാലാവസ്ഥാ നിരീക്ഷകർ മുന്നറിയിപ്പ് നൽകി.
ഇത്തരത്തിൽ മരങ്ങളിൽ വിള്ളലുണ്ടാകുന്നത് പൊതുജനങ്ങളുടെ സുരക്ഷയ്ക്ക് ഭീഷണിയല്ലെന്ന് പ്രകൃതി വിഭവ മന്ത്രാലയം വ്യക്തമാക്കി. ഇവ യഥാർത്ഥ സ്ഫോടനങ്ങളല്ലെന്നും വസന്തകാലം എത്തുന്നതോടെ മരങ്ങൾ സ്വാഭാവികമായി ഈ വിള്ളലുകൾ ഭേദമാക്കുമെന്നും വിദഗ്ധർ അറിയിച്ചു. അതിശൈത്യത്തെത്തുടർന്ന് ടൊറന്റോയിൽ എൻവയോൺമെന്റ് കാനഡ മഞ്ഞ ജാഗ്രത പുറപ്പെടുവിച്ചിട്ടുണ്ട്. ഞായറാഴ്ച മുതൽ ടൊറന്റോയിൽ 20 സെന്റിമീറ്ററോളം മഞ്ഞുവീഴ്ചയുണ്ടാകുമെന്നും കാലാവസ്ഥാ പ്രവചനമുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Extreme cold in Ontario; Warning of potential for ‘frost crack’ phenomenon in trees
