എഡ്മന്റൺ: ആൽബർട്ട പ്രവിശ്യയിലെ എമർജൻസി വാർഡുകളിൽ ചികിത്സയ്ക്കായി മണിക്കൂറുകളോളം കാത്തിരുന്ന് ആറ് രോഗികൾ മരിച്ചതായി ഡോക്ടർമാരുടെ വെളിപ്പെടുത്തൽ. ഡിസംബർ അവസാനവാരത്തിലും ജനുവരി ആദ്യവാരത്തിലുമായി നടന്ന ഞെട്ടിക്കുന്ന സംഭവങ്ങളുടെ പട്ടിക ആൽബർട്ട മെഡിക്കൽ അസോസിയേഷൻ (AMA) സർക്കാരിന് കൈമാറി. മതിയായ ജീവനക്കാരില്ലാത്തതും ആശുപത്രികളിലെ സ്ഥലപരിമിതിയുമാണ് ഈ ദാരുണ മരണങ്ങൾക്ക് കാരണമായതെന്ന് ഡോക്ടർമാർ ആരോപിക്കുന്നു.
വൈകുന്ന ചികിത്സ, നഷ്ടമാകുന്ന ജീവനുകൾ
മരിച്ചവരിൽ നെഞ്ചുവേദനയുമായി എത്തിയ ആൾ എട്ട് മണിക്കൂറോളം വെയിറ്റിംഗ് റൂമിൽ കാത്തിരുന്ന ശേഷമാണ് കുഴഞ്ഞുവീണത്. മറ്റൊരാൾ ബാക്ടീരിയൽ ഇൻഫെക്ഷനെ തുടർന്ന് ഏഴ് മണിക്കൂർ കാത്തിരുന്നിട്ടും ഡോക്ടറെ കാണാൻ കഴിയാത്തതിനാൽ മടങ്ങിപ്പോവുകയും പിന്നീട് അതീവ ഗുരുതരാവസ്ഥയിൽ തിരിച്ചെത്തി മരിക്കുകയുമായിരുന്നു. ശസ്ത്രക്രിയ വൈകിയതിനെ തുടർന്ന് ആന്തരികാവയവങ്ങൾ തകരാറിലായി മരിച്ച സ്ത്രീയുടെ വിവരങ്ങളും റിപ്പോർട്ടിലുണ്ട്.
കഴിഞ്ഞ മാസം എഡ്മന്റണിലെ ഗ്രേ നൺസ് കമ്മ്യൂണിറ്റി ഹോസ്പിറ്റലിൽ ചികിത്സ കിട്ടാതെ മരിച്ച ഇന്ത്യക്കാരൻ പ്രശാന്ത് ശ്രീകുമാറിന്റെ മരണം വലിയ വാർത്തയായിരുന്നു. പ്രശാന്തിന്റെ മരണം ഒറ്റപ്പെട്ട സംഭവമല്ലെന്നും സമാനമായ സാഹചര്യങ്ങൾ പ്രവിശ്യയിലുടനീളം ആവർത്തിക്കുകയാണെന്നും എമർജൻസി ഫിസിഷ്യനായ ഡോ. പോൾ പാർക്ക്സ് പറഞ്ഞു. 25 വർഷത്തെ സർവീസിനിടയിൽ ഇത്രയും മോശമായ ഒരു അവസ്ഥ കണ്ടിട്ടില്ല എന്നാണ് അദ്ദേഹം പ്രതികരിച്ചത്.
പരിമിത സൗകര്യങ്ങൾ, വർദ്ധിക്കുന്ന ജനസംഖ്യ
എഡ്മന്റണിൽ 1988-ന് ശേഷം പുതിയ ആശുപത്രികൾ നിർമ്മിച്ചിട്ടില്ലെന്നും എന്നാൽ ജനസംഖ്യ ഇരട്ടിയായി വർദ്ധിച്ചുവെന്നും ഡോക്ടർമാർ ചൂണ്ടിക്കാട്ടുന്നു. വെയിറ്റിംഗ് റൂമുകളിൽ കസേരയിലിരുന്ന് ഹൃദയാഘാതവും പക്ഷാഘാതവും (Stroke) സംഭവിക്കുന്ന രോഗികളുടെ എണ്ണം വർദ്ധിക്കുകയാണ്. പലപ്പോഴും രോഗികൾക്ക് സ്വകാര്യത പോലും ലഭിക്കുന്നില്ലെന്നും വരാന്തകളിൽ വെച്ചാണ് പലരെയും ജീവിതത്തിലേക്ക് തിരിച്ചുകൊണ്ടുവരാൻ ശ്രമിക്കുന്നതെന്നും റിപ്പോർട്ട് പറയുന്നു.
സർക്കാർ നിലപാട്
ആരോഗ്യമേഖല നേരിടുന്ന കടുത്ത സമ്മർദ്ദം സർക്കാർ അംഗീകരിക്കുന്നുണ്ടെങ്കിലും ഇതൊരു പൊതുജനാരോഗ്യ അടിയന്തരാവസ്ഥയായി പ്രഖ്യാപിക്കാൻ അധികൃതർ തയ്യാറായിട്ടില്ല. പ്രശ്നങ്ങൾ പരിഹരിക്കാൻ ദീർഘകാല പദ്ധതികകൾ ആവിഷ്കരിക്കുകയാണെന്ന് ആരോഗ്യ മന്ത്രിയുടെ ഓഫീസ് അറിയിച്ചു. എന്നാൽ അടിയന്തരമായി ഇടപെട്ടില്ലെങ്കിൽ ഇനിയും നിരവധി ജീവനുകൾ പൊലിയുമെന്നാണ് ഡോക്ടർമാരുടെ മുന്നറിയിപ്പ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Alberta emergency doctors compile list of what they say are 6 potentially preventable ER deaths
