ടൊറന്റോ: 2026-ലെ ഫിഫ ലോകകപ്പിന് കാനഡ ആതിഥേയത്വം വഹിക്കാനിരിക്കെ, രാജ്യത്തെ ആരോഗ്യ സംവിധാനങ്ങൾ നേരിടാനിടയുള്ള കനത്ത സമ്മർദ്ദത്തെക്കുറിച്ച് മുന്നറിയിപ്പുമായി ആരോഗ്യവിദഗ്ധർ. തിങ്കളാഴ്ച കാനേഡിയൻ മെഡിക്കൽ അസോസിയേഷൻ ജേണലിൽ (CMAJ) പ്രസിദ്ധീകരിച്ച റിപ്പോർട്ടിലാണ് നിലവിലെ ആരോഗ്യ പ്രതിസന്ധികളെക്കുറിച്ച് വ്യക്തമാക്കുന്നത്. രാജ്യം ഇതിനകം തന്നെ വിവിധ ആരോഗ്യ വെല്ലുവിളികൾ നേരിടുന്ന സാഹചര്യത്തിൽ, ലോകകപ്പ് പോലുള്ള വലിയ കായിക മേളകൾ രോഗികളുടെ എണ്ണം വർധിപ്പിക്കുന്നത് സ്ഥിതിഗതികൾ സങ്കീർണ്ണമാക്കുമെന്ന് ഡോ. കാതറിൻ വർണർ ചൂണ്ടിക്കാട്ടി.
ലക്ഷക്കണക്കിന് ആരാധകർ ഒത്തുചേരുന്ന സ്റ്റേഡിയങ്ങളിലും നഗരങ്ങളിലും പകർച്ചവ്യാധികൾ പടരാനുള്ള സാധ്യത കൂടുതലാണെന്ന് റിപ്പോർട്ട് മുന്നറിയിപ്പ് നൽകുന്നു. മുൻകാലങ്ങളിൽ വാങ്കൂവർ ഒളിമ്പിക്സ് ഉൾപ്പെടെയുള്ള വലിയ പരിപാടികൾ നടന്നപ്പോൾ മീസിൽസ്, കോവിഡ്-19 തുടങ്ങിയവ പടർന്ന സാഹചര്യം ഗവേഷകർ ഗൗരവത്തോടെയാണ് കാണുന്നത്. വിദേശങ്ങളിൽ നിന്നെത്തുന്ന സന്ദർശകരിലൂടെ പുതിയ രോഗാണുക്കൾ രാജ്യത്തെത്താനുള്ള സാധ്യതയും ആരോഗ്യ വിദഗ്ധർ തള്ളിക്കളയുന്നില്ല.
അടിയന്തര ചികിത്സാ വിഭാഗങ്ങളിൽ (ER) തിരക്ക് വർധിക്കുന്നത് സാധാരണക്കാരായ രോഗികൾക്ക് ചികിത്സ ലഭിക്കുന്നതിന് തടസ്സമായേക്കാം. ഇത് പരിഹരിക്കാൻ ആശുപത്രികളിൽ മുൻകൂട്ടി ആസൂത്രണം ചെയ്ത ട്രോമ പ്ലാനുകളും അധിക ജീവനക്കാരുടെ സേവനവും ഉറപ്പാക്കണമെന്ന് റിപ്പോർട്ട് നിർദ്ദേശിക്കുന്നു. വലിയ ജനക്കൂട്ടത്തെ നിയന്ത്രിക്കാനും രോഗവ്യാപനം തടയാനും പൊതുജനാരോഗ്യ സംവിധാനങ്ങൾ അതീവ ജാഗ്രത പാലിക്കണമെന്നും ഡോ. കാതറിൻ വർണർ വ്യക്തമാക്കി.
ഫിഫ ലോകകപ്പിന്റെ ഭാഗമായി ടൊറന്റോയിലും വാങ്കൂവറിലുമായി നിരവധി മത്സരങ്ങളാണ് നടക്കുന്നത്. ഈ സാഹചര്യത്തിൽ മാലിന്യജല പരിശോധനയും ഭക്ഷ്യസുരക്ഷാ പരിശോധനകളും കർശനമാക്കാനാണ് അധികൃതരുടെ തീരുമാനം. വലിയ കായിക പരിപാടികൾ നടക്കുമ്പോൾ ആശുപത്രി സൗകര്യങ്ങൾ പരിമിതപ്പെടാതിരിക്കാൻ പ്രത്യേക ധനസഹായവും സർക്കാർ ലഭ്യമാക്കിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
FIFA World Cup 2026: Experts warn of Canada's health system
