ടെഹ്റാൻ: ഇറാനിൽ ഭരണവിരുദ്ധ വികാരം ആളിക്കത്തുമ്പോൾ അമേരിക്കൻ പ്രസിഡന്റ് ഡൊണാൾഡ് ട്രംപിനെതിരെ കടുത്ത ഭാഷയിലാണ് ആയത്തുള്ള ഖമനയി പ്രതികരിച്ചത്. “അഹങ്കാരിയായ ട്രംപ്” ഉടൻ തന്നെ അധികാരത്തിൽ നിന്ന് പുറത്താക്കപ്പെടുമെന്ന് അദ്ദേഹം വ്യക്തമാക്കി. ചരിത്രത്തിലെ ഫറവോമാരെയും മറ്റ് ഏകാധിപതികളെയും പോലെ ട്രംപും വീഴുമെന്നും, സ്വന്തം രാജ്യത്തെ പ്രശ്നങ്ങൾ പരിഹരിക്കാൻ കഴിയാത്തവരാണ് ഇറാൻ്റെ ആഭ്യന്തര കാര്യങ്ങളിൽ ഇടപെടുന്നതെന്നും ഖമനയി കുറ്റപ്പെടുത്തി.
പ്രതിഷേധക്കാർക്ക് നേരെയും ഖമനയി രൂക്ഷമായ വിമർശനം ഉന്നയിച്ചു.
വിദേശശക്തികളെ, പ്രത്യേകിച്ച് ട്രംപിനെ സന്തോഷിപ്പിക്കാൻ വേണ്ടിയാണ് പ്രതിഷേധക്കാർ സ്വന്തം രാജ്യത്തെ പൊതുമുതൽ നശിപ്പിക്കുന്നതെന്ന് അദ്ദേഹം പറഞ്ഞു. ഇറാൻകാരുടെ രക്തം ട്രംപിന്റെ കൈകളിൽ പുരണ്ടിരിക്കുകയാണെന്നും, അട്ടിമറി ശ്രമങ്ങളിലൂടെ ഇസ്ലാമിക് റിപ്പബ്ലിക്കിനെ തകർക്കാൻ കഴിയില്ലെന്നും അദ്ദേഹം പ്രസംഗത്തിൽ വ്യക്തമാക്കി. ആയിരക്കണക്കിന് അനുയായികൾ ‘അമേരിക്കയ്ക്ക് മരണം’ എന്ന മുദ്രാവാക്യങ്ങളുമായാണ് ഖമനയിയുടെ പ്രസംഗത്തെ സ്വീകരിച്ചത്.
സാമ്പത്തിക പ്രതിസന്ധിയും വിലക്കയറ്റവും മൂലമാണ് ഡിസംബർ 28-ന് ഇറാനിൽ പ്രതിഷേധം ആരംഭിച്ചത്. എന്നാൽ ഇത് പെട്ടെന്നുതന്നെ ഖമനയി വിരുദ്ധ പ്രക്ഷോഭമായി മാറുകയായിരുന്നു. ഡോളറിനെതിരെ ഇറാനിയൻ റിയാലിന്റെ മൂല്യം ഇടിയുകയും പണപ്പെരുപ്പം 40 ശതമാനത്തിന് മുകളിൽ എത്തുകയും ചെയ്തതോടെ ജനങ്ങൾ തെരുവിലിറങ്ങി. നിലവിൽ രാജ്യത്തെ 31 പ്രവിശ്യകളിലേക്കും പ്രക്ഷോഭം വ്യാപിച്ചിട്ടുണ്ട്. സ്ഥിതിഗതികൾ നിയന്ത്രിക്കാൻ സർക്കാർ ഇന്റർനെറ്റ് ഷട്ട്ഡൗൺ ഏർപ്പെടുത്തുകയും അന്താരാഷ്ട്ര ആശയവിനിമയങ്ങൾ വിച്ഛേദിക്കുകയും ചെയ്തിരിക്കുകയാണ്.
പ്രതിഷേധക്കാരെ പിന്തുണച്ച് ട്രംപ് നേരത്തെ തന്നെ രംഗത്തെത്തിയിരുന്നു.
സമാധാനപരമായി പ്രതിഷേധിക്കുന്നവർക്ക് നേരെ വെടിവെപ്പുണ്ടായാൽ അമേരിക്ക ശക്തമായി ഇടപെടുമെന്നും, ഇറാൻ്റെ ഭരണപരാജയത്തിന് കാരണം ഖമനയി മാത്രമാണെന്നും ട്രംപ് ആരോപിച്ചിരുന്നു. ഖമനയി രാജ്യം വിടാൻ ഒരുങ്ങുകയാണെന്ന തരത്തിലുള്ള പരാമർശങ്ങളും ട്രംപ് നടത്തിയിരുന്നു. ഇതിന് മറുപടിയായാണ് “ബൂട്ട്സ് ഓൺ ഗ്രൗണ്ട്” (സൈനിക നീക്കം) ഇല്ലാതെ തന്നെ ഇറാനെ തകർക്കാൻ കഴിയുമെന്ന ട്രംപിന്റെ ഭീഷണിയെ ഖമനയി തള്ളിക്കളഞ്ഞത്.
പ്രക്ഷോഭം അടിച്ചമർത്താൻ ഇറാൻ സുരക്ഷാ സേനയ്ക്ക് ഖമനയി നിർദ്ദേശം നൽകിയതോടെ സംഘർഷം കൂടുതൽ രൂക്ഷമാകാനാണ് സാധ്യത. ഇതിനകം 60-ലധികം പേർ കൊല്ലപ്പെട്ടതായാണ് റിപ്പോർട്ടുകൾ സൂചിപ്പിക്കുന്നത്. പ്രക്ഷോഭകാരികളെ വിദേശ ഏജന്റുകളായി മുദ്രകുത്തി കടുത്ത ശിക്ഷ നൽകുമെന്ന് ഇറാൻ ജുഡീഷ്യറിയും വ്യക്തമാക്കിയിട്ടുണ്ട്. അമേരിക്കയുടെയും ഇസ്രായേലിന്റെയും പിന്തുണയോടെ നടക്കുന്ന ഗൂഢാലോചനയാണ് ഈ പ്രതിഷേധങ്ങളെന്നാണ് ഇറാൻ്റെ ഔദ്യോഗിക നിലപാട്.
