വീണ്ടും മത്സരത്തിനൊരുങ്ങി മുകേഷ്; കൊല്ലത്ത് ചർച്ചയായി ചിന്ത ജെറോമിന്റെ പേരും; സി.പി.ഐ.എമ്മിൽ വൻ അഴിച്ചുപണി

തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പിൽ വീണ്ടും ജനവിധി തേടാനുള്ള താത്പര്യം പ്രകടിപ്പിച്ച് കൊല്ലം എം.എൽ.എ എം. മുകേഷ് രംഗത്തെത്തി. പാർട്ടി ഏൽപ്പിച്ച ഉത്തരവാദിത്തങ്ങൾ വിജയകരമായി പൂർത്തിയാക്കിയെന്ന ആത്മവിശ്വാസമുണ്ടെന്നും, പാർട്ടി ആവശ്യപ്പെട്ടാൽ വീണ്ടും മത്സരിക്കാൻ തയ്യാറാണെന്നും അദ്ദേഹം മാധ്യമങ്ങളോട് പറഞ്ഞു. ജനസേവനത്തിന് എം.എ.എ പദവി നിർബന്ധമല്ലെങ്കിലും പാർട്ടിയുടെ തീരുമാനത്തിനൊപ്പം നിൽക്കാനാണ് തന്റെ തീരുമാനമെന്നും അദ്ദേഹം വ്യക്തമാക്കി.

പൊതുപ്രവർത്തനത്തോടൊപ്പം തന്നെ സിനിമാ കരിയറും മുന്നോട്ട് കൊണ്ടുപോകാനാണ് തീരുമാനമെന്ന് മുകേഷ് അറിയിച്ചു. കഴിഞ്ഞ രണ്ട് തവണയായി കൊല്ലം മണ്ഡലത്തെ പ്രതിനിധീകരിക്കുന്ന മുകേഷ്, പാർട്ടിയുടെ നിലപാടിന് അനുസൃതമായി മാത്രമേ അന്തിമ തീരുമാനമെടുക്കൂ എന്നും കൂട്ടിച്ചേർത്തു. അതേസമയം, തദ്ദേശ തിരഞ്ഞെടുപ്പിലുണ്ടായ തിരിച്ചടി മറികടക്കാൻ സി.പി.ഐ.എം സംസ്ഥാന വ്യാപകമായി വലിയ അഴിച്ചുപണിക്കാണ് ഒരുങ്ങുന്നത്.

യുവനേതാക്കളെ മുൻനിർത്തി വോട്ടർമാരിലും പ്രവർത്തകരിലും പുതിയ ആവേശം നിറയ്ക്കാനാണ് സി.പി.ഐ.എം ലക്ഷ്യമിടുന്നത്. ഇതിന്റെ ഭാഗമായി പ്രമുഖ യുവനേതാക്കളെ വിവിധ മണ്ഡലങ്ങളിലേക്ക് പാർട്ടി പരിഗണിച്ചു വരികയാണ്. കൊല്ലം മണ്ഡലത്തിൽ മുകേഷിന് പുറമെ ചിന്ത ജെറോമിന്റെ പേരും സജീവമായി ചർച്ച ചെയ്യപ്പെടുന്നുണ്ട്. ജില്ലയിൽ വിജയസാധ്യതയുള്ള യുവരക്തത്തെ പരീക്ഷിക്കാനാണ് ഒരു വിഭാഗം നേതാക്കളുടെ താല്പര്യം.

ഡി.വൈ.എഫ്.ഐ സംസ്ഥാന ഭാരവാഹികളായ വി. വസീഫിനെ എലത്തൂരിലോ കുന്നമംഗലത്തോ പരിഗണിക്കുമ്പോൾ, സംസ്ഥാന സെക്രട്ടറി വി.കെ. സനോജിനെ കണ്ണൂർ ജില്ലയിലെ മട്ടന്നൂർ അല്ലെങ്കിൽ തളിപ്പറമ്പ് മണ്ഡലങ്ങളിൽ മത്സരിപ്പിക്കാനാണ് സാധ്യത. കെ.കെ. ഷൈലജ ഇത്തവണ മത്സരരംഗത്തില്ലെങ്കിൽ സനോജിനെ മട്ടന്നൂരിലേക്ക് പരിഗണിക്കാനാണ് പാർട്ടിയിലെ പ്രാഥമിക ധാരണ. എലത്തൂർ മണ്ഡലം എൻ.സി.പിയിൽ നിന്ന് ഏറ്റെടുക്കുന്നതടക്കമുള്ള രാഷ്ട്രീയ നീക്കങ്ങളും സി.പി.ഐ.എം ചർച്ച ചെയ്യുന്നുണ്ട്.

യുവനിരയിൽ നിന്ന് എസ്.എഫ്.ഐ മുൻ അഖിലേന്ത്യ പ്രസിഡന്റ് വി.പി. സാനു തവനൂരിലും, എസ്.എഫ്.ഐ സംസ്ഥാന സെക്രട്ടറി പി.എം. ആർഷോ ഷൊർണ്ണൂരിലും ജനവിധി തേടിയേക്കുമെന്നാണ് സൂചന. വരാനിരിക്കുന്ന സംസ്ഥാന സമിതി യോഗങ്ങളിൽ സ്ഥാനാർത്ഥി നിർണ്ണയവുമായി ബന്ധപ്പെട്ട കൂടുതൽ വ്യക്തതയുണ്ടാകും. ഭരണത്തുടർച്ച ലക്ഷ്യമിട്ടുള്ള തന്ത്രപരമായ നീക്കങ്ങളുടെ ഭാഗമായാണ് ഈ അഴിച്ചുപണി.

Mukesh is preparing to contest again; Chinta Jerome's name is being discussed in Kollam


കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt