കാലിഫോർണിയ: പ്രമുഖ സോഫ്റ്റ്വെയർ കമ്പനിയായ ‘സോഹോ’ (Zoho) സഹസ്ഥാപകൻ ശ്രീധർ വെമ്പുവും മുൻഭാര്യ പ്രമീള ശ്രീനിവാസനും തമ്മിലുള്ള വിവാഹമോചനക്കേസിൽ നിർണ്ണായക ഉത്തരവുമായി കാലിഫോർണിയ കോടതി. പ്രമീളയുടെ അവകാശങ്ങൾ സംരക്ഷിക്കുന്നതിനായി 1.7 ബില്യൺ ഡോളർ (ഏകദേശം 14,000 കോടിയിലധികം രൂപ) കോടതിയിൽ ബോണ്ടായി കെട്ടിവെക്കാനാണ് ജഡ്ജി ഉത്തരവിട്ടത്. 2025 ജനുവരിയിൽ കോടതി പുറപ്പെടുവിച്ച ഈ ഉത്തരവിനെക്കുറിച്ചുള്ള വിവരങ്ങൾ പ്രമുഖ വാർത്താ മാധ്യമമായ ‘ദ ന്യൂസ് മിനിറ്റാണ്’ കഴിഞ്ഞ ദിവസം പുറത്തുവിട്ടത്.
വിവാഹമോചന നടപടികൾക്കിടെ കമ്പനിയുടെ ഘടനയിൽ വരുത്തുന്ന മാറ്റങ്ങൾ പ്രമീളയുടെ ഓഹരി പങ്കാളിത്തത്തെ ബാധിക്കുമെന്ന് ചൂണ്ടിക്കാട്ടിയാണ് കോടതി ഇടപെടൽ. സോഹോയുടെ യു.എസ് ഉപകമ്പനികളുടെ പുനഃസംഘടന കോടതി തടഞ്ഞു. കൂടാതെ, ശ്രീധർ വെമ്പുവിന്റെയും സഹസ്ഥാപകൻ ടോണി തോമസിന്റെയും വ്യക്തിഗത ആസ്തികൾ മേൽനോട്ടം വഹിക്കാൻ ഒരു റിസീവറെയും കോടതി നിയമിച്ചു. എന്നാൽ, ഇത്രയും വലിയ തുക ബോണ്ട് നൽകാൻ തനിക്ക് കഴിയില്ലെന്നാണ് ശ്രീധർ വെമ്പു കോടതിയെ അറിയിച്ചിട്ടുള്ളത്.
ഉത്തരവ് വന്ന് ഒരു വർഷം പിന്നിട്ടിട്ടും ശ്രീധർ വെമ്പു തുക അടച്ചിട്ടില്ലെന്നും ഇത് കോടതി അലക്ഷ്യമാണെന്നും റിപ്പോർട്ടുകൾ സൂചിപ്പിക്കുന്നു. വിവിധ ഹിയറിംഗുകളിലായി 150 മില്യൺ ഡോളർ വരെ നൽകാമെന്ന് അദ്ദേഹം അറിയിച്ചെങ്കിലും കോടതി നിർദ്ദേശിച്ച 1.7 ബില്യൺ ഡോളർ നൽകാൻ ഇതുവരെ തയ്യാറായിട്ടില്ല. വിഷയത്തിൽ പ്രതികരണം തേടിയ മാധ്യമപ്രവർത്തകർക്ക് മറുപടി നൽകാൻ സോഹോയുടെ പി.ആർ സംഘം വിസമ്മതിച്ചു.
അതേസമയം, കോടതി ഉത്തരവിനെതിരെ ശ്രീധർ വെമ്പുവിന്റെ അഭിഭാഷകൻ ക്രിസ്റ്റഫർ മെൽച്ചർ രംഗത്തെത്തി. കോടതിയെ തെറ്റിദ്ധരിപ്പിച്ചാണ് ഇത്തരമൊരു ഉത്തരവ് സമ്പാദിച്ചതെന്നും 1.7 ബില്യൺ ഡോളർ എന്നത് യുക്തിരഹിതമായ തുകയാണെന്നും അദ്ദേഹം പറഞ്ഞു. ഉത്തരവ് അസാധുവാണെന്നും ഇതിനെതിരെ അപ്പീൽ നൽകിയിട്ടുണ്ടെന്നും അദ്ദേഹം എക്സിൽ (ട്വിറ്റർ) കുറിച്ചു. ഈ പോസ്റ്റ് ശ്രീധർ വെമ്പു തന്നെ റീപോസ്റ്റ് ചെയ്തിട്ടുണ്ട്. എന്നാൽ ശ്രീധർ വെമ്പുവിന്റെ അഭിഭാഷകന്റെ ആരോപണങ്ങൾ പ്രമീളയുടെ അഭിഭാഷകൻ ജോൺ ഫാർലി തള്ളി.
ബഹുമാനപ്പെട്ട ജഡ്ജി ആരുടെയും വഞ്ചിതനായിട്ടല്ല വിധി പുറപ്പെടുവിച്ചതെന്നും കോടതി ഉത്തരവ് ഇപ്പോഴും നിലനിൽക്കുന്നുണ്ടെന്നും അദ്ദേഹം വ്യക്തമാക്കി. വസ്തുതകൾ മാറ്റാൻ ജഡ്ജിയെ അധിക്ഷേപിക്കുന്നത് കൊണ്ട് കഴിയില്ലെന്നും ഫാർലി കൂട്ടിച്ചേർത്തു. 2021-ൽ ശ്രീധർ വെമ്പു തന്നെ ഫയൽ ചെയ്ത വിവാഹമോചന ഹർജിയിലെ വിചാരണയ്ക്ക് മുന്നോടിയായുള്ള നടപടികളാണ് ഇപ്പോൾ നടക്കുന്നത്. മൂന്ന് പതിറ്റാണ്ടോളമായി കാലിഫോർണിയയിൽ സ്ഥിരതാമസമാക്കിയിരുന്ന ശ്രീധർ 2019 അവസാനത്തോടെയാണ് ഇന്ത്യയിലേക്ക് മാറിയത്. ഓട്ടിസം ബാധിച്ച മകന്റെ സംരക്ഷണം ഉൾപ്പെടെയുള്ള വിഷയങ്ങൾ കേസിന്റെ ഭാഗമായി നിലനിൽക്കുന്നുണ്ട്.
vembus-lawyer-claims-17-billion-bond-order-invalid-pramilas-lawyer-says-it-remains-in-force
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
