വാഷിംഗ്ടൺ: ഇറാനിൽ സാമ്പത്തിക പ്രതിസന്ധിക്കും വിലക്കയറ്റത്തിനുമെതിരെ സർക്കാർ വിരുദ്ധ പ്രതിഷേധങ്ങൾ നൂറോളം നഗരങ്ങളിലേക്ക് വ്യാപിക്കുന്നതിനിടെ, മധ്യേഷ്യൻ മേഖല ലക്ഷ്യമാക്കി അമേരിക്ക വൻതോതിൽ സൈനിക വിന്യാസം നടത്തുന്നതായി റിപ്പോർട്ടുകൾ. യുഎസ് വ്യോമസേനയുടെ കരുത്തുറ്റ വിമാനങ്ങളായ സി-5 ഗാലക്സി, സി-17 ഗ്ലോബ് മാസ്റ്ററുകൾ എന്നിവയ്ക്കൊപ്പം ആകാശത്തുവെച്ച് ഇന്ധനം നിറയ്ക്കുന്ന കെ.സി-135 ടാങ്കർ വിമാനങ്ങളും യുകെയിലെ പ്രധാന വ്യോമതാവളങ്ങളിൽ എത്തിയതായാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. വെനസ്വേലൻ പ്രസിഡന്റ് നിക്കോളാസ് മഡുറോയെ ജനുവരി ആദ്യവാരം രഹസ്യ ഓപ്പറേഷനിലൂടെ പിടികൂടിയതിന് പിന്നാലെയാണ് അമേരിക്കയുടെ ഈ പുതിയ നീക്കമെന്നത് ആഗോളതലത്തിൽ വലിയ ചർച്ചയായിട്ടുണ്ട്.
പ്രത്യേക ഓപ്പറേഷനുകളിൽ വൈദഗ്ധ്യമുള്ള, ‘നൈറ്റ് സ്റ്റാക്കേഴ്സ്’ എന്നറിയപ്പെടുന്ന അമേരിക്കയുടെ 160-ാമത് സ്പെഷ്യൽ ഓപ്പറേഷൻസ് ഏവിയേഷൻ റെജിമെന്റും പുതിയ വിന്യാസത്തിൽ ഉൾപ്പെട്ടിട്ടുണ്ടെന്ന സൂചനകൾ അഭ്യൂഹങ്ങൾക്ക് ആക്കം കൂട്ടുന്നു. ഇതിന് പുറമെ ചിനൂക്ക്, ബ്ലാക്ക് ഹോക്ക് ഹെലികോപ്റ്ററുകളും എസി-130 ജെ ഗോസ്റ്റ്റൈഡർ ഗൺഷിപ്പുകളും ബ്രിട്ടനിലെ ആർ.എ.എഫ് ഫെയർഫോർഡ് ഉൾപ്പെടെയുള്ള സൈനിക കേന്ദ്രങ്ങളിൽ സജ്ജമാക്കിയിട്ടുണ്ടെന്ന് പ്രതിരോധ നിരീക്ഷകർ ചൂണ്ടിക്കാട്ടുന്നു. വെനസ്വേലയിലേതിന് സമാനമായ ഒരു മിന്നൽ നീക്കം ഇറാനിലും അമേരിക്ക ലക്ഷ്യമിടുന്നുണ്ടോ എന്നാണ് ലോകം ഉറ്റുനോക്കുന്നത്.
സാമ്പത്തിക തകർച്ചയും റിയാലിന്റെ മൂല്യത്തകർച്ചയും മൂലം ദുരിതത്തിലായ ജനങ്ങൾ തെരുവിലിറങ്ങിയ പശ്ചാത്തലത്തിൽ, പ്രതിഷേധക്കാർക്ക് നേരെ ഇറാൻ സുരക്ഷാസേന വെടിയുതിർത്താൽ അമേരിക്ക മിണ്ടാതിരിക്കില്ലെന്ന് പ്രസിഡന്റ് ഡോണൾഡ് ട്രംപ് വ്യക്തമാക്കിയിട്ടുണ്ട്. ‘ലോക്ക്ഡ് ആൻഡ് ലോഡഡ്’ എന്നാണ് അദ്ദേഹം തന്റെ സോഷ്യൽ മീഡിയ പോസ്റ്റിലൂടെ ഇറാൻ ഭരണകൂടത്തിന് നൽകിയ മുന്നറിയിപ്പ്. സമാധാനപരമായ പ്രതിഷേധക്കാരെ കൊന്നൊടുക്കിയാൽ അമേരിക്ക അവരുടെ രക്ഷയ്ക്കെത്തുമെന്നും തങ്ങൾ അതിനായി തയ്യാറെടുത്തു കഴിഞ്ഞെന്നും ട്രംപ് പ്രഖ്യാപിച്ചതോടെ മേഖലയിൽ യുദ്ധസമാനമായ അന്തരീക്ഷമാണ് നിലനിൽക്കുന്നത്.
നിലവിൽ സമുദ്രമേഖലയിലെ റഷ്യൻ ബന്ധമുള്ള എണ്ണക്കപ്പലുകളെ പിടികൂടാനാണ് ഈ സൈനിക നീക്കമെന്ന് ചില ഔദ്യോഗിക വൃത്തങ്ങൾ സൂചിപ്പിക്കുന്നുണ്ടെങ്കിലും, ഇറാന്റെ വ്യോമാതിർത്തിക്ക് സമീപം അമേരിക്കയുടെ അത്യാധുനിക നിരീക്ഷണ വിമാനമായ പി-8 പോസിഡൺ പ്രത്യക്ഷപ്പെട്ടത് സ്ഥിതിഗതികൾ ഗുരുതരമാണെന്ന് തെളിയിക്കുന്നു. അമേരിക്കൻ സേനയുടെ ചലനങ്ങൾ നിരീക്ഷിക്കുന്നതിനായി ഇറാൻ തങ്ങളുടെ വ്യോമ പ്രതിരോധ സംവിധാനങ്ങൾ അതീവ ജാഗ്രതയിലാക്കിയിട്ടുണ്ട്. തങ്ങളുടെ ആഭ്യന്തര കാര്യങ്ങളിൽ ഇടപെടാൻ അമേരിക്ക ശ്രമിച്ചാൽ കനത്ത പ്രത്യാഘാതം നേരിടേണ്ടി വരുമെന്ന് ഇറാന്റെ പരമോന്നത നേതാവ് ആയത്തുള്ള അലി ഖമേനി തിരിച്ചടിച്ചു.
അതേസമയം, അമേരിക്കൻ പ്രതിരോധ വകുപ്പ് ഈ നീക്കങ്ങളെക്കുറിച്ച് ഔദ്യോഗികമായ സ്ഥിരീകരണങ്ങളൊന്നും ഇതുവരെ പുറത്തുവിട്ടിട്ടില്ല. എങ്കിലും, എഫ്-16, എഫ്-22, എഫ്-35 യുദ്ധവിമാനങ്ങളുടെ അധിക വിന്യാസം മേഖലയിൽ പ്രതിരോധം ശക്തമാക്കുന്നതിന്റെ ഭാഗമാണെന്ന് പെന്റഗൺ സൂചിപ്പിക്കുന്നു. വെനസ്വേലയിലെ മഡുറോയുടെ അറസ്റ്റിന് ശേഷം ട്രംപ് ഭരണകൂടം കൂടുതൽ ശക്തമായ സൈനിക നിലപാടുകൾ സ്വീകരിക്കുന്നത് മധ്യേഷ്യയിലെ രാഷ്ട്രീയ സമവാക്യങ്ങൾ തന്നെ മാറ്റാൻ സാധ്യതയുണ്ട്. ഇറാനിൽ ഒരു ഭരണമാറ്റത്തിനാണോ അതോ നേരിട്ടുള്ള പ്രത്യാക്രമണത്തിനാണോ അമേരിക്ക കോപ്പുകൂട്ടുന്നതെന്ന കാര്യത്തിൽ വരും ദിവസങ്ങളിൽ കൂടുതൽ വ്യക്തത വരും.
*കാനഡയിലെ ഏറ്റവും പുതിയ വാർത്തകൾക്കായി:*
https://chat.whatsapp.com/Ghtm5bIjsVN8SItyDlaj3Q?mode=wwt
US military preparations aimed at Central Asia: Rumors of possible military move in Iran*
