വെനസ്വേലയിലെ സൈനിക നടപടി: കരീബിയൻ വ്യോമപാത അടച്ചു; റദ്ദാക്കിയത്, നൂറുകണക്കിന് വിമാനങ്ങൾ

വാഷിംഗ്ടൺ/സാൻ ജുവാൻ: അപ്രതീക്ഷിത സൈനിക നീക്കത്തിലൂടെ വെനസ്വേലൻ പ്രസിഡന്റ് നിക്കോളാസ് മഡുറോയെ അമേരിക്കൻ സൈന്യം പിടികൂടി. ശനിയാഴ്ച പുലർച്ചെ നടന്ന സൈനിക നടപടിയിലൂടെ മഡുറോയെ പിടികൂടുകയും രാജ്യത്തിന് പുറത്തേക്ക് കൊണ്ടുപോവുകയും ചെയ്തതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. ഈ സംഭവത്തെത്തുടർന്ന് കരീബിയൻ മേഖലയിലുടനീളം വ്യോമഗതാഗതം പൂർണ്ണമായും തടസ്സപ്പെട്ടു. തിരക്കേറിയ വിനോദസഞ്ചാര സീസണിൽ ഉണ്ടായ ഈ പ്രതിസന്ധി ആയിരക്കണക്കിന് യാത്രക്കാരെ ദുരിതത്തിലാഴ്ത്തി.

സൈനിക നടപടിയുടെ പശ്ചാത്തലത്തിൽ വെനസ്വേലയ്ക്ക് മുകളിലൂടെയുള്ള വിമാന സർവീസുകൾ ശനിയാഴ്ച മുതൽ നിരോധിച്ചിരിക്കുകയാണ്. സുരക്ഷാ കാരണങ്ങളാൽ അമേരിക്കൻ ഫെഡറൽ ഏവിയേഷൻ അഡ്മിനിസ്‌ട്രേഷൻ (FAA) ഏർപ്പെടുത്തിയ നിയന്ത്രണങ്ങൾ കാരണം പ്രമുഖ വിമാനക്കമ്പനികൾ നൂറുകണക്കിന് സർവീസുകൾ റദ്ദാക്കി. പ്യൂർട്ടോ റിക്കോ, വിർജിൻ ഐലൻഡ്‌സ്, അരുബ തുടങ്ങിയ പ്രധാന കേന്ദ്രങ്ങളിലേക്കുള്ള യാത്രയെയാണ് നിയന്ത്രണങ്ങൾ സാരമായി ബാധിച്ചത്. വരും ദിവസങ്ങളിലും ഈ തടസ്സം തുടരാൻ സാധ്യതയുണ്ടെന്നാണ് മുന്നറിയിപ്പ്.

പ്യൂർട്ടോ റിക്കോയിലെ അന്താരാഷ്ട്ര വിമാനത്താവളത്തിലും സമീപ പ്രദേശങ്ങളിലും എഫ്.എ.എ താൽക്കാലിക നിയന്ത്രണങ്ങൾ ഏർപ്പെടുത്തി. വെനസ്വേലയിലെ സൈനിക സാഹചര്യവുമായി ബന്ധപ്പെട്ട സുരക്ഷാ മുൻകരുതലിന്റെ ഭാഗമായാണ് ഈ നടപടിയെന്ന് സാൻ ജുവാനിലെ ലൂയിസ് മുനോസ് മറൈൻ വിമാനത്താവള അധികൃതർ അറിയിച്ചു. ഇതേത്തുടർന്ന് അമേരിക്കൻ വിമാനക്കമ്പനികൾ ഈ മേഖലയിലേക്കുള്ള ഒട്ടുമിക്ക വാണിജ്യ സർവീസുകളും നിർത്തിവച്ചു. എന്നാൽ വിദേശ വിമാനങ്ങൾക്കും സൈനിക വിമാനങ്ങൾക്കും ഈ നിയന്ത്രണം ബാധകമല്ലെന്ന് അധികൃതർ വ്യക്തമാക്കിയിട്ടുണ്ട്.

വ്യോമപാത അടച്ചതോടെ ജെറ്റ് ബ്ലൂ മാത്രം ഏകദേശം 215 വിമാനങ്ങളാണ് റദ്ദാക്കിയത്. അതേസമയം, ഡൊമിനിക്കൻ റിപ്പബ്ലിക്, ജമൈക്ക എന്നിവിടങ്ങളിലേക്കുള്ള സർവീസുകളെ നിലവിലെ നിയന്ത്രണങ്ങൾ ബാധിച്ചിട്ടില്ല. യുണൈറ്റഡ്, സൗത്ത് വെസ്റ്റ്, അമേരിക്കൻ എയർലൈൻസ്, ഡെൽറ്റ തുടങ്ങിയ കമ്പനികളും തങ്ങളുടെ സർവീസുകളിൽ മാറ്റം വരുത്തി.

ടിക്കറ്റ് റദ്ദാക്കിയ യാത്രക്കാർക്ക് അധിക നിരക്കില്ലാതെ പുതിയ തീയതികളിലേക്ക് ടിക്കറ്റ് മാറ്റാനോ അല്ലെങ്കിൽ പണം തിരികെ നൽകാനോ ഉള്ള സൗകര്യം കമ്പനികൾ വാഗ്ദാനം ചെയ്തിട്ടുണ്ട്. യാത്രാ തടസ്സം നേരിട്ട 20-ഓളം ദ്വീപ് രാജ്യങ്ങളിലേക്കുള്ള വിമാനങ്ങൾക്ക് ഡെൽറ്റയും അമേരിക്കൻ എയർലൈൻസും പ്രത്യേക യാത്രാ ഇളവുകൾ പ്രഖ്യാപിച്ചു.

സ്ഥിതിഗതികൾ നിരീക്ഷിച്ചുവരികയാണെന്നും സുരക്ഷ ഉറപ്പാക്കിയ ശേഷം സർവീസുകൾ പുനരാരംഭിക്കുമെന്നും വിമാനക്കമ്പനികൾ അറിയിച്ചു. വിമാനത്താവളങ്ങളിലേക്ക് പുറപ്പെടുന്നതിന് മുമ്പ് വിമാനങ്ങളുടെ നിലവിലെ സ്ഥിതി നേരിട്ട് പരിശോധിക്കണമെന്ന് യാത്രക്കാർക്ക് നിർദ്ദേശം നൽകിയിട്ടുണ്ട്.

Maduro-s-capture-disrupts-Caribbean-holiday-travel-hundreds-of-flights-canceled

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt