വാഷിംഗ്ടൺ: കുടിയേറ്റ നടപടികളിൽ പരിശോധന കർശനമാക്കുന്നതിന്റെ ഭാഗമായി, 20 രാജ്യങ്ങളിൽ നിന്നുള്ള അപേക്ഷകൾ സ്വീകരിക്കുന്നത് യുഎസ് ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി (DHS) താൽക്കാലികമായി നിർത്തിവച്ചു. ജനുവരി ഒന്ന് മുതൽ പ്രാബല്യത്തിൽ വന്ന യാത്രാ നിയന്ത്രണങ്ങളുടെ വിപുലീകരണത്തിന് പിന്നാലെയാണ് ഈ പുതിയ നടപടി. വിസ, ഗ്രീൻ കാർഡ്, പൗരത്വം, അഭയം (Asylum) എന്നിവയ്ക്കായി സമർപ്പിച്ചിട്ടുള്ള എല്ലാ അപേക്ഷകളുടെയും നടപടികൾ ഇതോടെ തടസ്സപ്പെടും.
യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (USCIS) വ്യാഴാഴ്ച പുറത്തിറക്കിയ ഔദ്യോഗിക മെമ്മോയിലാണ് ഈ തീരുമാനമുള്ളത്. പുതിയ അപേക്ഷകൾ നിർത്തിവയ്ക്കുന്നതിനൊപ്പം, 2021 മുതൽ ഈ രാജ്യങ്ങളിൽ നിന്നുള്ള കുടിയേറ്റക്കാർ നൽകിയ അപേക്ഷകൾ വീണ്ടും പുനഃപരിശോധിക്കാനും ഭരണകൂടം തീരുമാനിച്ചിട്ടുണ്ട്. ദേശീയ സുരക്ഷ ഉറപ്പാക്കുന്നതിന്റെ ഭാഗമായാണ് പരിശോധനകൾ കർശനമാക്കുന്നതെന്നാണ് ഔദ്യോഗിക വിശദീകരണം.
നൈജീരിയ, അംഗോള, സെനഗൽ, ടാൻസാനിയ, സിംബാബ്വെ, ലൈബീരിയ, സിയറ ലിയോൺ, ഗാംബിയ, എറിത്രിയ, മൗറിറ്റാനിയ, ബുർക്കിന ഫാസോ, സൗത്ത് സുഡാൻ, ജിബൂട്ടി, ഗിനിയ, ഐവറി കോസ്റ്റ്, പലസ്തീൻ അതോറിറ്റി, അഫ്ഗാനിസ്ഥാൻ, ബർമ്മ/മ്യാൻമർ, ലാവോസ്, കിർഗിസ്ഥാൻ തുടങ്ങി ഭൂരിഭാഗം ആഫ്രിക്കൻ രാജ്യങ്ങളാണ് പുതുതായി നിയന്ത്രണം ഏർപ്പെടുത്തിയ പട്ടികയിലുള്ളത്. കഴിഞ്ഞ മാസം യാത്രാ നിയന്ത്രണമുള്ള രാജ്യങ്ങളുടെ പട്ടിക 19-ൽ നിന്ന് 39 ആയി ട്രംപ് ഭരണകൂടം ഉയർത്തിയിരുന്നു. പലസ്തീൻ അതോറിറ്റിയെയും ഈ പട്ടികയിൽ ഉൾപ്പെടുത്തിയിട്ടുണ്ട്. വിസ കാലാവധി ലംഘിക്കുന്നതും രേഖകളിലെ തട്ടിപ്പുകളും തടയുക എന്ന ലക്ഷ്യത്തോടെയാണ് ഈ നീക്കമെന്ന് ആഭ്യന്തര സുരക്ഷാ വകുപ്പ് വ്യക്തമാക്കി.
ഉയർന്ന അപകടസാധ്യതയുള്ള രാജ്യങ്ങളിൽ നിന്ന് എത്തുന്നവർ ദേശീയ സുരക്ഷയ്ക്ക് ഭീഷണിയാകുന്നില്ലെന്ന് ഉറപ്പാക്കാൻ തങ്ങൾ പ്രതിജ്ഞാബദ്ധമാണെന്ന് USCIS മെമ്മോയിൽ പറയുന്നു. താങ്ക്സ്ഗിവിംഗ് വാരാന്ത്യത്തിൽ രണ്ട് നാഷണൽ ഗാർഡ് സൈനികർക്ക് നേരെ വെടിയുതിർത്ത സംഭവത്തിൽ ഒരു അഫ്ഗാൻ പൗരൻ അറസ്റ്റിലായതിന് പിന്നാലെയാണ് കുടിയേറ്റ നിയമങ്ങൾ കൂടുതൽ കർക്കശമാക്കാൻ ഭരണകൂടം നീക്കം തുടങ്ങിയത്.
അതേസമയം, കായിക താരങ്ങൾക്ക് ഈ നിയന്ത്രണങ്ങളിൽ ഇളവ് നൽകിയിട്ടുണ്ട്.
വരാനിരിക്കുന്ന ലോകകപ്പ്, ഒളിമ്പിക്സ് എന്നിവയിൽ പങ്കെടുക്കുന്ന കായികതാരങ്ങൾക്കും അവരുടെ ടീമംഗങ്ങൾക്കും വിസ നടപടികളിൽ തടസ്സമുണ്ടാകില്ല. എന്നാൽ മറ്റ് വിഭാഗങ്ങളിൽപ്പെട്ട അപേക്ഷകർക്ക് ഈ തീരുമാനം വലിയ തിരിച്ചടിയാകും.
ബൈഡൻ ഭരണകാലത്ത് അഭയാർഥികളായി രാജ്യത്ത് പ്രവേശിച്ചവരുടെ രേഖകൾ വീണ്ടും പരിശോധിക്കുമെന്ന് ഏജൻസി നേരത്തെ പ്രഖ്യാപിച്ചിരുന്നു. ഇതിന് പിന്നാലെയാണ് അഭയ അപേക്ഷകളുടെ പ്രോസസ്സിംഗ് അനിശ്ചിതകാലത്തേക്ക് നിർത്തിവച്ചിരിക്കുന്നത്. കുടിയേറ്റ അപേക്ഷകളുടെ വലിയ ബാക്ക്ലോഗ് നിലനിൽക്കെയാണ് പുതിയ നിയന്ത്രണങ്ങൾ കൂടി വരുന്നത് എന്നത് അപേക്ഷകരെ ആശങ്കയിലാക്കുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Dramatic change in immigration policy; US temporarily suspends applications from these 20 countries
