യുഎസ് ഗ്രീൻ കാർഡ് നിയമങ്ങൾ കർശനമാക്കുന്നു; വിവാഹം മാത്രം പോരാ, ഒരുമിച്ചുള്ള താമസം ഇനി നിർബന്ധം

വാഷിംഗ്ടൺ: അമേരിക്കൻ ഗ്രീൻ കാർഡ് നേടുന്നതിനുള്ള മാനദണ്ഡങ്ങൾ കൂടുതൽ കർശനമാക്കി യുഎസ് ഇമിഗ്രേഷൻ. ഒരു അമേരിക്കൻ പൗരനെ വിവാഹം കഴിച്ചതുകൊണ്ട് മാത്രം ഇനി ഗ്രീൻ കാർഡ് ലഭിക്കില്ലെന്നും, ദമ്പതികൾ ഒരേ മേൽക്കൂരയ്ക്ക് കീഴിൽ താമസിക്കുന്നുണ്ടെന്ന് ഉറപ്പുവരുത്തേണ്ടത് അത്യാവശ്യമാണെന്നും പ്രമുഖ ഇമിഗ്രേഷൻ അറ്റോർണി ബ്രാഡ് ബെർൺസ്റ്റൈൻ മുന്നറിയിപ്പ് നൽകി.

വിവാഹിതരായ ശേഷവും ജോലി, പഠനം അല്ലെങ്കിൽ മറ്റ് വ്യക്തിപരമായ കാരണങ്ങളാൽ മാറി താമസിക്കുന്ന ദമ്പതികളുടെ ഗ്രീൻ കാർഡ് അപേക്ഷകൾ നിരസിക്കപ്പെടാൻ സാധ്യതയുണ്ടെന്ന് ബെർൺസ്റ്റൈൻ വ്യക്തമാക്കി. ദമ്പതികൾ ഒരുമിച്ച് താമസിക്കുന്നുണ്ടോ എന്നതിനാണ് ഇമിഗ്രേഷൻ ഉദ്യോഗസ്ഥർ പ്രഥമ പരിഗണന നൽകുന്നത്. വേർപിരിഞ്ഞു താമസിക്കുന്നത് വിവാഹ തട്ടിപ്പായി കണക്കാക്കി അന്വേഷണം നടത്താനും അപേക്ഷകൾ തള്ളിക്കളയാനും നിലവിലെ നിയമസാഹചര്യത്തിൽ സാധ്യത കൂടുതലാണ്.

ഡൊണാൾഡ് ട്രംപ് ഭരണകൂടത്തിന് കീഴിൽ ഇമിഗ്രേഷൻ നടപടികളിൽ വലിയ മാറ്റങ്ങളാണ് വരുത്തിയിരിക്കുന്നത്. വിവാഹം കേവലം രേഖകളിൽ മാത്രമാണോ അതോ യഥാർത്ഥമാണോ എന്ന് കണ്ടെത്താൻ യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (USCIS) സൂക്ഷ്മ പരിശോധന നടത്തും. വിലാസങ്ങളിലെ മാറ്റം ശ്രദ്ധയിൽപ്പെട്ടാൽ ഉദ്യോഗസ്ഥർ നേരിട്ട് പരിശോധനയ്ക്കെത്താനും സാധ്യതയുണ്ട്. കുടിയേറ്റ ആനുകൂല്യം ലഭിക്കാൻ വേണ്ടി മാത്രം നടത്തുന്ന വിവാഹങ്ങളെ പ്രതിരോധിക്കുകയാണ് ഇതിലൂടെ ലക്ഷ്യമിടുന്നത്.

അമേരിക്കയിലെ സുരക്ഷാ സാഹചര്യങ്ങൾ കണക്കിലെടുത്ത് ഗ്രീൻ കാർഡ് ഉടമകളുടെ പശ്ചാത്തല പരിശോധനയും ശക്തമാക്കിയിട്ടുണ്ട്. നേരത്തെ ‘ആശങ്കാജനകമായ രാജ്യങ്ങൾ’ എന്ന് തരംതിരിച്ചിരുന്ന 19 രാജ്യങ്ങളിൽ നിന്നുള്ള ഗ്രീൻ കാർഡ് ഉടമകളെ സമഗ്രമായ പരിശോധനയ്ക്ക് വിധേയമാക്കാൻ പ്രസിഡന്റ് ഉത്തരവിട്ടു. ഇതിനുപുറമെ, ഗ്രീൻ കാർഡ് അപേക്ഷകരുടെ വർക്ക് പെർമിറ്റ് കാലാവധി 18 മാസമായി വെട്ടിക്കുറയ്ക്കുകയും ചെയ്തിട്ടുണ്ട്.

കുടിയേറ്റം നിയന്ത്രിക്കുന്നതിന്റെ ഭാഗമായി ഗ്രീൻ കാർഡ് ലോട്ടറി സമ്പ്രദായം (Diversity Visa) താൽക്കാലികമായി നിർത്തിവച്ചതും ഇതിനോടകം വലിയ ചർച്ചകൾക്ക് വഴിവെച്ചിട്ടുണ്ട്. വിവാഹം മുഖേന ഗ്രീൻ കാർഡിന് അപേക്ഷിക്കുന്നവർ എല്ലാ നിയമവശങ്ങളും കൃത്യമായി പാലിക്കുന്നുണ്ടെന്ന് ഉറപ്പുവരുത്തണമെന്ന് അധികൃതർ നിർദ്ദേശിക്കുന്നു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

US tightens green card rules; Marriage is not enough, cohabitation is now mandatory