അമേരിക്കൻ യാത്രകൾ ഒഴിവാക്കി കാനഡക്കാർ; അതിർത്തി കടന്നുള്ള വിനോദസഞ്ചാരത്തിൽ വൻ വർധനവെന്ന് സ്റ്റാറ്റിസ്റ്റിക്സ് കാനഡ

ഒട്ടാവ : അവധിദിന യാത്രകൾക്ക് തുടക്കമായതോടെ അമേരിക്കയിൽ നിന്നുള്ള കനേഡിയൻ സന്ദർശകരുടെ എണ്ണത്തിൽ വർധനവ് രേഖപ്പെടുത്തി. എന്നാൽ, കാനഡയിൽ നിന്നുള്ള സഞ്ചാരികൾ അമേരിക്കൻ യാത്രകൾ വൻതോതിൽ കുറയ്ക്കുന്നതായാണ് സ്റ്റാറ്റിസ്റ്റിക്സ് കാനഡ പുറത്തുവിട്ട പുതിയ കണക്കുകൾ വ്യക്തമാക്കുന്നത്. ഒക്ടോബറിൽ അമേരിക്കയിൽ നിന്നുള്ള കാനഡ സന്ദർശനങ്ങൾ 18,14,406 ആയി ഉയർന്നു. ഇത് മുൻവർഷത്തെ അപേക്ഷിച്ച് മൂന്ന് ശതമാനം കൂടുതലാണ്.

കാനഡയിൽ നിന്നുള്ള അമേരിക്കൻ യാത്രകളിൽ 26.3 ശതമാനത്തിന്റെ കുറവാണ് ഇത്തവണ രേഖപ്പെടുത്തിയത്. റോഡ് മാർഗമുള്ള യാത്രകളിൽ 30.2 ശതമാനവും വിമാന യാത്രകളിൽ 15 ശതമാനവും കുറവുണ്ടായി. നിലവിലെ യു.എസ് ഭരണകൂടവുമായുള്ള രാഷ്ട്രീയ അസ്വസ്ഥതകളും നയതന്ത്രപരമായ തർക്കങ്ങളുമാണ് കാനഡക്കാരെ അമേരിക്കൻ യാത്രകളിൽ നിന്ന് പിന്തിരിപ്പിക്കുന്നത് എന്ന് ട്രാവൽ സെക്യുർ ഇൻക് പ്രസിഡന്റ് മാർട്ടിൻ ഫയർസ്റ്റോൺ വ്യക്തമാക്കി.

ടൊറന്റോ പിയേഴ്സൺ അന്താരാഷ്ട്ര വിമാനത്താവളത്തിൽ ഡിസംബർ 17 മുതൽ ജനുവരി 5 വരെയുള്ള കാലയളവിൽ 32 ലക്ഷം യാത്രക്കാരെയാണ് പ്രതീക്ഷിക്കുന്നത്. വിമാനത്താവളത്തിലെ ആഭ്യന്തര യാത്രക്കാരുടെ എണ്ണത്തിൽ വർധനയുണ്ടായെങ്കിലും അതിർത്തി കടന്നുള്ള അമേരിക്കൻ യാത്രകളിൽ കുറവുണ്ടായതായി ഗ്രേറ്റർ ടൊറന്റോ എയർപോർട്ട് അതോറിറ്റി (GTAA) അറിയിച്ചു. പിയേഴ്സൺ വിമാനത്താവളം വഴി കഴിഞ്ഞ വർഷത്തെ അപേക്ഷിച്ച് 0.7 ശതമാനം വർധനയോടെ 3.58 കോടി യാത്രക്കാർ ഇതിനകം സഞ്ചരിച്ചിട്ടുണ്ട്.

സമാനമായ പ്രവണതയാണ് വാൻകൂവർ അന്താരാഷ്ട്ര വിമാനത്താവളത്തിലും (YVR) പ്രകടമാകുന്നത്. വിമാനത്താവളം മൊത്തം യാത്രക്കാരുടെ എണ്ണത്തിൽ റെക്കോർഡ് നേട്ടത്തിലേക്ക് നീങ്ങുമ്പോഴും അമേരിക്കയിലേക്കും തിരിച്ചുമുള്ള യാത്രക്കാരുടെ എണ്ണത്തിൽ 5.9 ശതമാനം ഇടിവ് രേഖപ്പെടുത്തി. ഒക്ടോബർ അവസാനം വരെയുള്ള കണക്കുകൾ പ്രകാരം 53 ലക്ഷം അമേരിക്കൻ സഞ്ചാരികളാണ് വാൻകൂവർ വിമാനത്താവളം വഴി യാത്ര ചെയ്തത്.

മറ്റ് വിദേശ രാജ്യങ്ങളിൽ നിന്ന് കാനഡയിലേക്കെത്തുന്നവരുടെ എണ്ണത്തിലും വലിയ വർധനവുണ്ട്. ഒക്ടോബറിൽ 5,48,992 വിദേശ സഞ്ചാരികളാണ് കാനഡയിലെത്തിയത്. ഇത് മുൻവർഷത്തെക്കാൾ 11.7 ശതമാനം കൂടുതലാണെന്ന് സ്റ്റാറ്റിസ്റ്റിക്സ് കാനഡ അറിയിച്ചു. യൂറോപ്പിൽ നിന്നുള്ള സഞ്ചാരികളുടെ എണ്ണത്തിൽ 10.5 ശതമാനവും ഏഷ്യയിൽ നിന്നുള്ളവരുടെ എണ്ണത്തിൽ 14.9 ശതമാനവും വർധന രേഖപ്പെടുത്തിയിട്ടുണ്ട്.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Canadians avoid US trips; Statistics Canada reports huge increase in cross-border tourism