സുരക്ഷ അത്ര പോര! കാനഡയിൽ ഈ കമ്പനികളുടെ വാഹനങ്ങൾ തിരിച്ചുവിളിച്ചു

ഒട്ടാവ: കാനഡയിലെ വാഹന വിപണിയെ ആശങ്കയിലാഴ്ത്തി പ്രമുഖ നിർമ്മാതാക്കളായ ഫോർഡ്, ഹോണ്ട, ജനറൽ മോട്ടോഴ്സ് എന്നിവർ സുരക്ഷാ കാരണങ്ങളാൽ എൺപതിനായിരത്തിലധികം വാഹനങ്ങൾ തിരിച്ചുവിളിച്ചു. വിവിധ സാങ്കേതിക തകരാറുകൾ കണ്ടെത്തിയതിനെ തുടർന്നാണ് മൂന്ന് കമ്പനികളും തങ്ങളുടെ പ്രധാന മോഡലുകൾ പരിശോധനയ്ക്കായി തിരികെ ആവശ്യപ്പെട്ടിരിക്കുന്നത്. ഇതിൽ ഏറ്റവും കൂടുതൽ ബാധിച്ചിരിക്കുന്നത് ഫോർഡ് വാഹനങ്ങളെയാണ്. ഏകദേശം 50,000 വാഹനങ്ങളാണ് ഫോർഡ് തിരിച്ചുവിളിക്കുന്നത്. വാഹനം പാർക്കിംഗ് മോഡിലേക്ക് മാറ്റിയാലും തനിയെ നീങ്ങാൻ സാധ്യതയുള്ള ‘ഇന്റഗ്രേറ്റഡ് പാർക്ക് മൊഡ്യൂളി’ലെ പിഴവാണ് ഇതിന് കാരണമായി പറയുന്നത്. 2022 മുതൽ 2026 വരെയുള്ള കാലയളവിലെ എഫ്-150 ലൈറ്റ്‌നിംഗ്, മാവെറിക് ഹൈബ്രിഡ്, മസ്റ്റാങ് മാക്-ഇ എന്നീ മോഡലുകൾക്കാണ് ഈ മുന്നറിയിപ്പ് ബാധകമായിരിക്കുന്നത്.

ബ്രേക്ക് സംബന്ധമായ തകരാറിനെ തുടർന്നാണ് ഹോണ്ട തങ്ങളുടെ 11,000 അക്യുറ ഐ.എൽ.എക്സ് (ILX) വാഹനങ്ങൾ തിരിച്ചുവിളിക്കുന്നത്. ബ്രേക്ക് മാസ്റ്റർ സിലിണ്ടറിൽ നിന്ന് ഫ്ലൂയിഡ് ചോരാൻ സാധ്യതയുണ്ടെന്നും ഇത് ബ്രേക്കിന്റെ പ്രവർത്തനത്തെ ബാധിക്കുമെന്നും കണ്ടെത്തിയിട്ടുണ്ട്. 2016 മുതൽ 2020 വരെയുള്ള മോഡലുകൾക്കാണ് ഈ തകരാറുള്ളത്. അതേസമയം, ജനറൽ മോട്ടോഴ്സ് തങ്ങളുടെ 21,000 ഷെവർലേ ഇക്വിനോക്സ് ഇലക്ട്രിക് വാഹനങ്ങളിൽ സോഫ്റ്റ്‌വെയർ പ്രശ്നമാണ് കണ്ടെത്തിയിരിക്കുന്നത്. കാൽനടയാത്രക്കാർക്ക് മുന്നറിയിപ്പ് നൽകുന്ന സൗണ്ട് സിസ്റ്റം പ്രവർത്തിക്കാത്തതാണ് ഇവിടുത്തെ പ്രധാന പ്രശ്നം.

ബാധിക്കപ്പെട്ട വാഹനങ്ങളുടെ ഉടമകൾക്ക് കമ്പനികൾ നേരിട്ട് മെയിൽ വഴി അറിയിപ്പ് നൽകും. ഫോർഡ്, ഹോണ്ട ഉടമകൾ തങ്ങളുടെ ഡീലർഷിപ്പുകളുമായി ബന്ധപ്പെട്ട് തകരാർ സൗജന്യമായി പരിഹരിക്കേണ്ടതാണ്. എന്നാൽ ജനറൽ മോട്ടോഴ്സ് സോഫ്റ്റ്‌വെയർ അപ്‌ഡേറ്റ് വഴി വയർലെസ്സായി തന്നെ ഈ പ്രശ്നം പരിഹരിക്കുമെന്ന് അറിയിച്ചിട്ടുണ്ട്. കാനഡയിലുള്ള വാഹന ഉടമകൾ തങ്ങളുടെ വണ്ടിയിലെ വിൻ (VIN) നമ്പർ ഉപയോഗിച്ച് കമ്പനികളുടെ വെബ്സൈറ്റിൽ പരിശോധന നടത്തണമെന്ന് സുരക്ഷാ ഏജൻസികൾ നിർദ്ദേശിച്ചു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Ford, Honda, GM issue recalls impacting more than 80,000 vehicles in Canada