ഒട്ടാവ: അമേരിക്കയിലെ കാനഡയുടെ പുതിയ അംബാസഡറായി പ്രമുഖ ബിസിനസ് എക്സിക്യൂട്ടീവ് മാർക്ക് വൈസ്മാനെ നിയമിച്ച് പ്രധാനമന്ത്രി മാർക്ക് കാർണി. നിലവിലെ അംബാസഡർ കിർസ്റ്റൺ ഹിൽമാൻ സ്ഥാനമൊഴിയുന്നതിനെ തുടർന്നാണ് വൈസ്മാന്റെ ഈ നിയമനം. 2026 ഫെബ്രുവരി 15-ന് അദ്ദേഹം ഔദ്യോഗികമായി ചുമതലയേൽക്കും.
അമേരിക്കയുമായുള്ള വ്യാപാര ബന്ധം കടുത്ത പ്രതിസന്ധി നേരിടുന്ന സാഹചര്യത്തിലാണ് മാർക്ക് വൈസ്മാന്റെ നിയമനം എന്നത് ശ്രദ്ധേയമാണ്. യു.എസ്. പ്രസിഡന്റ് ഡൊണാൾഡ് ട്രംപ് കാനഡയ്ക്കെതിരെ പ്രഖ്യാപിച്ച വ്യാപാര യുദ്ധവും വിവിധ ഉൽപ്പന്നങ്ങൾക്ക് ഏർപ്പെടുത്തിയ നികുതിയും ഇരുരാജ്യങ്ങളും തമ്മിലുള്ള ബന്ധത്തിൽ വിള്ളലുണ്ടാക്കിയിട്ടുണ്ട്. ഈ പശ്ചാത്തലത്തിൽ, വരാനിരിക്കുന്ന വ്യാപാര ചർച്ചകളിൽ കാനഡയുടെ താൽപ്പര്യങ്ങൾ സംരക്ഷിക്കുക എന്ന ദൗത്യമാണ് വൈസ്മാന് മുന്നിലുള്ളത്.
കാനഡയിലെ പ്രമുഖ പെൻഷൻ ഫണ്ടുകളിൽ ഉന്നത പദവികൾ വഹിച്ചിട്ടുള്ള വൈസ്മാൻ, പ്രധാനമന്ത്രി മാർക്ക് കാർണിയുടെ അടുത്ത സുഹൃത്ത് കൂടിയാണ്. അമേരിക്കയുമായുള്ള ബന്ധം പുതുക്കേണ്ട ഈ നിർണ്ണായക ഘട്ടത്തിൽ, വൈസ്മാന്റെ സാമ്പത്തിക വിജ്ഞാനവും അനുഭവസമ്പത്തും രാജ്യത്തിന് വലിയ കരുത്താകുമെന്ന് പ്രധാനമന്ത്രി വാർത്താക്കുറിപ്പിൽ വ്യക്തമാക്കി. ജനുവരിയിൽ ആരംഭിക്കാനിരിക്കുന്ന യു.എസ് – കാനഡ – മെക്സിക്കോ (CUSMA) വ്യാപാര കരാർ പുനഃപരിശോധനാ ചർച്ചകളിൽ വൈസ്മാൻ പ്രധാന പങ്ക് വഹിക്കുമെന്നും അദ്ദേഹം കൂട്ടിച്ചേർത്തു.
അതേസമയം, വൈസ്മാന്റെ മുൻകാല നിലപാടുകൾക്കെതിരെ കാനഡയിലെ രാഷ്ട്രീയ കേന്ദ്രങ്ങളിൽ നിന്ന് പ്രതിഷേധം ഉയരുന്നുണ്ട്. രാജ്യത്തെ പാലുൽപ്പന്ന മേഖലയിലെ ‘സപ്ലൈ മാനേജ്മെന്റ്’ രീതിയെ അദ്ദേഹം മുൻപ് വിമർശിച്ചത് ക്യുബെക്കിലെ കർഷകർക്കിടയിൽ വലിയ ആശങ്കയ്ക്ക് കാരണമായിട്ടുണ്ട്. വൈസ്മാന്റെ നിയമനം ക്യുബെക്കിനോടുള്ള അവഗണനയാണെന്ന് ആരോപിച്ച് പ്രതിപക്ഷ പാർട്ടികൾ രംഗത്തെത്തിക്കഴിഞ്ഞു. എങ്കിലും, വൈസ്മാൻ ഒരു മികച്ച ബിസിനസ് വിദഗ്ധനാണെന്നും ട്രംപ് ഭരണകൂടവുമായി ഫലപ്രദമായ ചർച്ചകൾ നടത്താൻ അദ്ദേഹത്തിന് സാധിക്കുമെന്നും മുൻ ആൽബർട്ട പ്രീമിയർ ജേസൺ കെന്നി ഉൾപ്പെടെയുള്ളവർ അഭിപ്രായപ്പെട്ടു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Mark Wiseman appointed as Canada's new ambassador to the US; appointment in February
