വ്യാജ ടാക്സ് റീഫണ്ട് തട്ടിപ്പിന് ഇനി പൂട്ട് വീഴും; പുതിയ നിയന്ത്രണങ്ങളുമായി കാനഡ റെവന്യൂ ഏജൻസി

ഒട്ടാവ: കാനഡയുടെ നികുതി സംവിധാനത്തെ കബളിപ്പിച്ച് അന്താരാഷ്ട്ര കുറ്റവാളി സംഘങ്ങൾ കോടിക്കണക്കിന് ഡോളർ തട്ടിയെടുക്കുന്നത് തടയാൻ ലക്ഷ്യമിട്ടുള്ള പുതിയ നിയമ ഭേദഗതികൾ ഫെഡറൽ സർക്കാർ നിർദ്ദേശിച്ചു. ”കറൗസൽ സ്കീം’ എന്നറിയപ്പെടുന്ന വ്യാജ നികുതി റീഫണ്ട് തട്ടിപ്പിലൂടെ പൊതുഖജനാവിന് വലിയ നഷ്ടമുണ്ടായ സാഹചര്യത്തിൽ, ദ ഫിഫ്ത്ത് എസ്റ്റേറ്റ് നടത്തിയ അന്വേഷണത്തിന്റെ പശ്ചാത്തലത്തിലാണ് ഈ നടപടി. 2025-ലെ ബജറ്റിൽ ഉൾപ്പെടുത്തിയിട്ടുള്ള ഈ നിർദ്ദേശങ്ങൾ നികുതി തട്ടിപ്പുകാർക്ക് ജി.എസ്.ടി, എച്ച്.എസ്.ടി റീഫണ്ടുകൾ ക്ലെയിം ചെയ്യുന്നത് അസാധ്യമാക്കുമെന്ന് വിദഗ്ധർ വിലയിരുത്തുന്നു.

വ്യാജ കമ്പനികൾ വഴി സാധനങ്ങൾ കൈമാറ്റം ചെയ്യപ്പെടുന്നു എന്ന് വരുത്തിത്തീർത്ത് ഒടുവിൽ നികുതി റീഫണ്ട് കൈക്കലാക്കുന്ന രീതിയാണ് കറൗസൽ സ്കീം. ഈ തട്ടിപ്പിലൂടെ എത്ര തുക നഷ്ടമായെന്ന് കൃത്യമായി കണക്കാക്കാൻ നിലവിൽ മാർഗമില്ലെന്ന് കാനഡ റെവന്യൂ ഏജൻസി (CRA) സമ്മതിച്ചു. എങ്കിലും, 2017-18 നും 2022-23 നും ഇടയിൽ 1.1 ബില്യൺ ഡോളറിലധികം തുക ഇത്തരം ക്രമക്കേടുകളുമായി ബന്ധപ്പെട്ട് തിരിച്ചറിഞ്ഞിട്ടുണ്ടെന്ന് സി.ആർ.എ അറിയിച്ചു.

ടെലികമ്മ്യൂണിക്കേഷൻ മേഖലയിൽ മാത്രം 600 മില്യൺ ഡോളറിന്റെ തട്ടിപ്പുകൾ നടന്നതായും ഏജൻസി വ്യക്തമാക്കി. തട്ടിപ്പ് തടയുന്നതിനായി ‘റിവേഴ്സ് ചാർജ് മെക്കാനിസം’ നടപ്പിലാക്കാനാണ് സർക്കാർ ആലോചിക്കുന്നത്. ജി.എസ്.ടി അടയ്ക്കുന്ന രീതിയിൽ മാറ്റം വരുത്തുന്നതിലൂടെ തട്ടിപ്പുകാർക്ക് റീഫണ്ട് ലഭിക്കാനുള്ള സാഹചര്യം ഇല്ലാതാകും. ടെലികമ്മ്യൂണിക്കേഷൻ മേഖലയിലായിരിക്കും പുതിയ ഭേദഗതികൾ ആദ്യം നടപ്പിലാക്കുക.

യൂറോപ്യൻ രാജ്യങ്ങൾ വർഷങ്ങൾക്ക് മുൻപേ ഇത്തരം നടപടികൾ സ്വീകരിച്ചിരുന്നെങ്കിലും കാനഡ ഈ മാറ്റത്തിന് തയ്യാറാകാൻ വൈകിയെന്ന് നികുതി വിദഗ്ധർ വിമർശിച്ചു.
സി.ആർ.എ ഉദ്യോഗസ്ഥർ നൽകുന്ന വിവരം പ്രകാരം നൂറുകണക്കിന് മില്യൺ ഡോളർ ഇതിനോടകം ഹോങ്കോംഗ്, ദുബായ്, ഇസ്ലാമാബാദ് തുടങ്ങിയ ഇടങ്ങളിലേക്ക് തട്ടിപ്പുകാർ കടത്തിയിട്ടുണ്ട്.

2023 ഒക്ടോബറിൽ ഏജൻസി പ്രത്യേക ‘കറൗസൽ സ്കീം ടാസ്ക് ഫോഴ്സ്’ രൂപീകരിച്ചിരുന്നെങ്കിലും പലപ്പോഴും സാമ്പത്തിക മന്ത്രാലയം കർശന നടപടികൾ വൈകിപ്പിച്ചതായി ആരോപണമുണ്ട്. പുതിയ നിയമം നടപ്പിലാക്കുന്നതിലൂടെ അടുത്ത നാല് വർഷത്തിനുള്ളിൽ 90 മില്യൺ ഡോളറിന്റെ ഫെഡറൽ വരുമാനം സംരക്ഷിക്കാനാകുമെന്ന് ധനമന്ത്രാലയം വിലയിരുത്തുന്നു.

നിലവിൽ ടെലികമ്മ്യൂണിക്കേഷൻ മേഖലയിൽ മാത്രം നിയന്ത്രണം കൊണ്ടുവരുന്നത് കൊണ്ട് പൂർണ്ണമായ ഗുണം ലഭിക്കില്ലെന്ന് ഉദ്യോഗസ്ഥർക്കിടയിൽ അഭിപ്രായമുണ്ട്. കള്ളപ്പണം വെളുപ്പിക്കലിനും നികുതി തട്ടിപ്പിനും സാധ്യതയുള്ള മറ്റ് വ്യവസായ മേഖലകളിലേക്കും ഈ നിയമം വ്യാപിപ്പിക്കേണ്ടതുണ്ടെന്ന് വിദഗ്ധർ ചൂണ്ടിക്കാട്ടി. കുറ്റവാളികളെ പിടികൂടാൻ കനത്ത ക്രിമിനൽ നടപടികൾ തന്നെ വേണമെന്നും അല്ലാത്തപക്ഷം നികുതിദായകരുടെ പണം നഷ്ടമാകുന്നത് തുടരുമെന്നും നയതന്ത്ര വിദഗ്ധർ മുന്നറിയിപ്പ് നൽകി.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Fake tax refund fraud will now be cracked down on; Canada Revenue Agency with new regulations