ഒട്ടാവ : കാനഡയിലെ പ്രമുഖ ഭാഗ്യക്കുറിയായ ലോട്ടോ മാക്സിന്റെ (Lotto Max) 80 മില്യൺ ഡോളറിന്റെ ബമ്പർ സമ്മാനം ഇത്തവണയും ആർക്കും ലഭിച്ചില്ല. ശനിയാഴ്ച നടന്ന നറുക്കെടുപ്പിലും ജേതാവില്ലാതെ വന്നതോടെ തുടർച്ചയായ മൂന്നാം തവണയാണ് ലോട്ടോ മാക്സ് ജാക്ക്പോട്ട് അവകാശികളില്ലാതെ തുടരുന്നത്. ഇതോടെ ഡിസംബർ 23 ചൊവ്വാഴ്ച നടക്കുന്ന അടുത്ത നറുക്കെടുപ്പിലെ മൊത്തം സമ്മാനത്തുക ഏകദേശം 123 മില്യൺ ഡോളറായി ഉയരുമെന്ന് ഒന്റാറിയോ ലോട്ടറി ആൻഡ് ഗെയിമിംഗ് കോർപ്പറേഷൻ (OLG) അറിയിച്ചു.
പ്രധാന സമ്മാനം ആർക്കും ലഭിച്ചില്ലെങ്കിലും, ഉപസമ്മാനങ്ങളായ ‘മാക്സ് മില്യൺസ്’ (Maxmillions) നേടുന്നതിൽ ഒന്റാറിയോ പ്രവിശ്യയിലെ വരിക്കാർ മികച്ച നേട്ടം കൈവരിച്ചു. ഒരു മില്യൺ ഡോളർ വീതം സമ്മാനമുള്ള രണ്ട് ടിക്കറ്റുകൾ മിസ്സിസാഗയിൽ വിറ്റഴിച്ചവയാണ്. കൂടാതെ നയാഗ്ര ഫാൾസ്, വിൻഡ്സർ എന്നിവിടങ്ങളിൽ നിന്നും ഓരോ മില്യൺ ഡോളർ വീതം സമ്മാനത്തുകയുള്ള ടിക്കറ്റുകൾ വിറ്റഴിച്ചതായും ഒ.എൽ.ജി അധികൃതർ സ്ഥിരീകരിച്ചു.
ഒന്നിലധികം വരിക്കാർ ഒരേ നമ്പറുകൾ തിരഞ്ഞെടുത്തതിനാൽ ഇത്തവണ പല സമ്മാനത്തുകകളും വിജയികൾക്ക് വീതിച്ചു നൽകേണ്ടി വന്നു. പത്ത് ലക്ഷം ഡോളറിന്റെ സമ്മാനം കവാർത്ത ലേക്സ് മേഖലയിൽ നിന്നുള്ള ഒരാളും അറ്റ്ലാന്റിക് കാനഡയിൽ നിന്നുള്ള ഒരാളും ചേർന്ന് അഞ്ച് ലക്ഷം ഡോളർ വീതമായി പങ്കിട്ടു. സമാനമായ രീതിയിൽ തണ്ടർ ബേ, യോർക്ക് റീജിയൺ എന്നിവിടങ്ങളിൽ നിന്നുള്ള ടിക്കറ്റുടമകളും സമ്മാനത്തുക വീതിച്ചെടുത്തു. കൂടാതെ മിസ്സിസാഗ, ഓഷാവ, യോർക്ക് റീജിയൺ എന്നിവിടങ്ങളിൽ നിന്നുള്ള മൂന്ന് പേർ ഒരു മില്യൺ ഡോളറിന്റെ മറ്റൊരു സമ്മാനം തുല്യമായി പങ്കിട്ടതോടെ ഒരാൾക്ക് 3,33,333 ഡോളർ വീതവും ലഭിച്ചു.
ഇവയെ കൂടാതെ ‘എൻകോർ’ (Encore) സമ്മാനങ്ങളായ ഒരു ലക്ഷം ഡോളർ വീതം സാർണിയ, കേംബ്രിഡ്ജ് എന്നിവിടങ്ങളിൽ നിന്നുള്ള വരിക്കാർക്ക് ലഭിച്ചു. വലിയ തുക ലഭിച്ചില്ലെങ്കിലും പ്രവിശ്യയിലുടനീളം നിരവധി പേരുടെ ജീവിതം മാറ്റിമറിക്കുന്ന സമ്മാനങ്ങൾ ഇത്തവണ എത്തിയിട്ടുണ്ടെന്ന് അധികൃതർ വ്യക്തമാക്കി.
നിലവിൽ ജാക്ക്പോട്ട് ആർക്കും ലഭിക്കാത്ത സാഹചര്യത്തിൽ ചൊവ്വാഴ്ച നടക്കുന്ന നറുക്കെടുപ്പ് വൻ തുകയുടേതാകും. 80 മില്യൺ ഡോളർ പ്രധാന സമ്മാനവും ഒപ്പം ഒരു മില്യൺ ഡോളർ വീതം സമ്മാനമുള്ള 43 മാക്സ് മില്യൺസുകളും ഉൾപ്പെടെ ഏകദേശം 123 മില്യൺ ഡോളറാണ് അടുത്ത ആഴ്ചയിലെ ആകർഷണം.2009-ൽ ലോട്ടോ മാക്സ് ആരംഭിച്ചത് മുതൽ ഒന്റാറിയോയിലെ കളിക്കാർക്ക് 9.5 ബില്യൺ ഡോളറിലധികം സമ്മാനമായി ലഭിച്ചിട്ടുണ്ട്. ഇതിൽ 117 ജാക്ക്പോട്ടുകളും 957 മാക്സ് മില്യൺസ് സമ്മാനങ്ങളും ഉൾപ്പെടുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Lotto Max: $80 million jackpot remains unclaimed; next draw is Tuesday, amount to increase
