ഒട്ടാവ: കാനഡയുടെ പരിസ്ഥിതി നയങ്ങളിൽ ജസ്റ്റിൻ ട്രൂഡോ സ്വീകരിച്ച നിലപാടുകളെ പരസ്യമായി തള്ളി പ്രധാനമന്ത്രി മാർക്ക് കാർണി രംഗത്തെത്തി. രാജ്യത്ത് പരിസ്ഥിതി സംബന്ധമായ നിയന്ത്രണങ്ങൾ അധികമാണെന്നും എന്നാൽ പ്രായോഗികമായ നടപടികളും ക്ലീൻ എനർജി നിക്ഷേപങ്ങളും കുറവാണെന്നും അദ്ദേഹം വിമർശിച്ചു. മാധ്യമങ്ങൾക്ക് നൽകിയ അഭിമുഖത്തിലാണ് ട്രൂഡോ സർക്കാരിന്റെ കാലാവസ്ഥാ കർമ്മപദ്ധതി ലക്ഷ്യങ്ങൾ കൈവരിക്കാൻ തൃപ്തികരമല്ലെന്ന് കാർണി വ്യക്തമാക്കിയത്.
തന്റെ ഭരണകൂടം റെഗുലേഷനുകളെക്കാൾ ഉപരിയായി പ്രായോഗികമായ പ്രവർത്തനങ്ങൾക്കാണ് മുൻഗണന നൽകുന്നതെന്ന് കാർണി പറഞ്ഞു. 2030-ഓടെ ഹരിതഗൃഹ വാതക പുറന്തള്ളൽ 40 മുതൽ 45 ശതമാനം വരെ കുറയ്ക്കുക എന്ന ലക്ഷ്യത്തിന്റെ പകുതിയിൽ മാത്രമാണ് രാജ്യം ഇപ്പോൾ എത്തിനിൽക്കുന്നതെന്ന് എൻവയോൺമെന്റ് ആൻഡ് ക്ലൈമറ്റ് ചേഞ്ച് കാനഡ പുറത്തുവിട്ട വിവരങ്ങൾ വ്യക്തമാക്കുന്നു. ഈ സാഹചര്യം കണക്കിലെടുത്ത് നിലവിലെ നയങ്ങളിൽ മാറ്റം വരുത്തേണ്ടത് അത്യാവശ്യമാണെന്ന് അദ്ദേഹം കൂട്ടിച്ചേർത്തു.
ആൽബർട്ടയുമായി ഒപ്പിട്ട പുതിയ ധാരണാപത്രത്തിന്റെ (MOU) ഭാഗമായി എണ്ണ പൈപ്പ് ലൈൻ പദ്ധതികൾക്ക് കാർണി പിന്തുണ അറിയിച്ചു. ഇതിനൊപ്പം ഫെഡറൽ ഓയിൽ ആൻഡ് ഗ്യാസ് എമിഷൻ ക്യാപ്, ക്ലീൻ ഇലക്ട്രിസിറ്റി റെഗുലേഷൻസ് (CER) എന്നിവ താൽക്കാലികമായി നിർത്തിവെക്കാനും തീരുമാനമായിട്ടുണ്ട്. കാർബൺ ക്യാപ്ചർ ആൻഡ് സ്റ്റോറേജ്, ആണവോർജ്ജം എന്നിവയിലൂടെ പരിസ്ഥിതി ലക്ഷ്യങ്ങൾ കൈവരിക്കാനാണ് പുതിയ നീക്കം. ഇതിന്റെ ഭാഗമായി വ്യാവസായിക കാർബൺ വില ടണ്ണിന് 130 ഡോളറായി ഉയർത്താനും ധാരണയായി.
ആൽബർട്ടയുമായുള്ള കരാറിൽ പ്രതിഷേധിച്ച് മുൻ പരിസ്ഥിതി മന്ത്രി സ്റ്റീവൻ ഗിൽബോൾട്ട് കാബിനറ്റിൽ നിന്ന് രാജിവെച്ചിരുന്നു. ഗിൽബോൾട്ടിന്റെ ആവശ്യപ്രകാരം കരാറിൽ ചില ഭേദഗതികൾ വരുത്തിയിരുന്നതായും എന്നാൽ അദ്ദേഹത്തിന്റെ രാജി വ്യക്തിപരമായ തീരുമാനമാണെന്നും പ്രധാനമന്ത്രി പറഞ്ഞു. എമിഷൻ ക്യാപ് നീക്കം ചെയ്യുന്നത് പരിസ്ഥിതി നയങ്ങളെ തകർക്കുമെന്നായിരുന്നു ഗിൽബോൾട്ടിന്റെ വാദം.
ബ്രിട്ടീഷ് കൊളംബിയ തീരത്തേക്കുള്ള പുതിയ പൈപ്പ് ലൈൻ പദ്ധതി കാനഡയുടെ താൽപ്പര്യങ്ങൾക്ക് ഗുണകരമാണെന്ന് പ്രധാനമന്ത്രി ചൂണ്ടിക്കാട്ടി. ആൽബർട്ട പ്രവിശ്യയുമായുള്ള കരാറിലെ നിബന്ധനകൾ പാലിച്ച് 2029-ഓടെ പൈപ്പ് ലൈൻ നിർമ്മാണം ആരംഭിക്കാനാണ് ഉദ്യോഗസ്ഥരുടെ നീക്കം. അതേസമയം, ആണവോർജ്ജ വികസനത്തിനായി 2027 ജനുവരി ഒന്നോടെ പ്രത്യേക തന്ത്രം രൂപീകരിക്കാൻ ആൽബർട്ട സർക്കാരും ഫെഡറൽ ഭരണകൂടവും സമ്മതിച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
More regulations, less action; Prime Minister Mark Carney rejects Trudeau’s environmental policies
