ഒട്ടാവ: കാനഡയിലെ ‘ബെർത്ത് ടൂറിസം’ നിരക്കുകൾ കോവിഡ് കാലത്തെ ഇടിവിന് ശേഷം വീണ്ടും കുത്തനെ ഉയരുന്നതായി പുതിയ റിപ്പോർട്ടുകൾ. കാനഡയിൽ സന്ദർശകരായി എത്തുന്നവരും താൽക്കാലിക താമസക്കാരുമായ വിദേശികളിൽ നിന്നുള്ള പ്രസവങ്ങളുടെ എണ്ണം പ്രീ-പാൻഡെമിക് കാലത്തെ നിലയിലേക്ക് തിരിച്ചെത്തിയെന്നാണ് കണക്കുകൾ വ്യക്തമാക്കുന്നത്. 2021-നും 2024-നും ഇടയിൽ നോൺ-റെസിഡന്റ് വിഭാഗത്തിലുള്ള പ്രസവങ്ങൾ 2,245-ൽ നിന്ന് 5,430 ആയി ഉയർന്നു, അതായത് ഇരട്ടിയിലധികം വർദ്ധനവാണ് ഈ ചുരുങ്ങിയ കാലയളവിൽ രേഖപ്പെടുത്തിയത്.
രാജ്യത്തെ ആകെ പ്രസവങ്ങളിൽ ഏകദേശം രണ്ട് ശതമാനത്തിൽ താഴെ മാത്രമാണ് ഇത്തരത്തിലുള്ള ബെർത്ത് ടൂറിസം വഴി നടക്കുന്നത്. 2020-22 കാലയളവിൽ ഇത് 0.7 ശതമാനമായി കുറഞ്ഞിരുന്നെങ്കിലും, 2024-25 വർഷങ്ങളിൽ ഇത് 1.5 ശതമാനമായി വീണ്ടും വർദ്ധിച്ചു. കാനഡയിലെ പ്രവിശ്യകളിൽ ഒന്റാറിയോയിലാണ് ഇത്തരത്തിലുള്ള പ്രസവങ്ങൾ ഏറ്റവും കൂടുതൽ നടക്കുന്നത്. തൊട്ടുപിന്നാലെ ക്യുബെക്ക്, ബ്രിട്ടീഷ് കൊളംബിയ, ആൽബർട്ട എന്നീ പ്രവിശ്യകളുമാണുള്ളത്.
കാനഡയിൽ ജനിക്കുന്ന കുഞ്ഞുങ്ങൾക്ക് സ്വയമേവ പൗരത്വം ലഭിക്കുന്ന ‘ബെർത്ത് റൈറ്റ് സിറ്റിസൺഷിപ്പ്’ നിയമത്തെച്ചൊല്ലി രാഷ്ട്രീയ ചർച്ചകളും സജീവമാണ്. പൗരത്വം ലഭിക്കുന്നതിന് മാതാപിതാക്കളിൽ ഒരാളെങ്കിലും പൗരനോ സ്ഥിരതാമസമോ ഉള്ളയാളായിരിക്കണമെന്ന് നിബന്ധന വെക്കണമെന്ന കൺസർവേറ്റീവ് പാർട്ടിയുടെ നിർദ്ദേശം പാർലമെന്റിൽ തള്ളപ്പെട്ടു. നിലവിലെ നിയമമനുസരിച്ച് കുഞ്ഞുങ്ങൾക്ക് ജനനത്തിലൂടെയുള്ള പൗരത്വം തുടരും. കൂടാതെ വിദേശത്ത് ജനിച്ച കനേഡിയൻ പൗരന്മാരുടെ അടുത്ത തലമുറകൾക്കും പൗരത്വം നേടുന്നത് പുതിയ നിയമപരിഷ്കാരത്തിലൂടെ എളുപ്പമാക്കിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada sees increase in birth tourism
