റെജീന: റെജീന നഗരസഭയുടെ 2026-ലേക്കുള്ള പ്രവർത്തന ബജറ്റ് കൗൺസിൽ പാസാക്കി. അഞ്ചുദിവസം നീണ്ടുനിന്ന വാദപ്രതിവാദങ്ങൾക്കും ചർച്ചകൾക്കും ഒടുവിൽ വെള്ളിയാഴ്ച വൈകുന്നേരമാണ് ബജറ്റിന് അംഗീകാരം ലഭിച്ചത്. 10.9 ശതമാനമാണ് വർധനവ്. റെജീനയുടെ ചരിത്രത്തിലെ ഏറ്റവും ഉയർന്ന നികുതി വർധനവിനാണ് (Mill Rate) ഇത്തവണ കൗൺസിൽ അംഗീകാരം നൽകിയിരിക്കുന്നത്.
വാശിയേറിയ വോട്ടിംഗിനൊടുവിൽ 5-നെതിരെ 6 വോട്ടുകൾക്കാണ് ബജറ്റ് പാസായത്. മേയർ ചാഡ് ബച്ചിൻസ്കിയുടെ വോട്ട് ബജറ്റ് തീരുമാനിക്കുന്നതിൽ നിർണ്ണായകമായി. മേയറെ കൂടാതെ കൗൺസിലർമാരായ വിക്ടോറിയ ഫ്ലോറസ്, ഡേവിഡ് ഫ്രോ, ജേസൺ മാൻസിനെല്ലി, ഷോബ്ന റാഡോൺസ്, സാറാ ടേൺബുൾ എന്നിവർ ബജറ്റിനെ അനുകൂലിച്ചു. നഗരത്തിന്റെ സാമ്പത്തിക ഭദ്രത ഉറപ്പാക്കാൻ ഇത്തരം കടുത്ത തീരുമാനങ്ങൾ അനിവാര്യമാണെന്ന് മേയർ ചർച്ചയിൽ വ്യക്തമാക്കി.
നികുതി വർധനവിലൂടെ ശരാശരി ഒരു കുടുംബത്തിന് മാസം 23 ഡോളറിന്റെ അധികബാധ്യത ഉണ്ടാകുമെന്നാണ് കണക്കാക്കുന്നത്. ഇതിനുപുറമെ വാട്ടർ യൂട്ടിലിറ്റി നിരക്കുകളിൽ 7.82 ശതമാനവും, ലൈബ്രറി നികുതിയിൽ 9.35 ശതമാനവും വർധനവുണ്ടാകും. ബസ് യാത്രക്കൂലിയിൽ പത്ത് ശതമാനം വർധനവ് വരുത്താൻ തീരുമാനിച്ചെങ്കിലും ഇത് സംബന്ധിച്ച അന്തിമ നിയമനിർമ്മാണം ഫെബ്രുവരിയിൽ നടക്കും. പാർക്കിംഗ് ടിക്കറ്റ് നിരക്കിൽ 10 ഡോളറിന്റെയും പാർക്കിംഗ് മീറ്റർ നിരക്കിൽ മണിക്കൂറിന് 0.50 ഡോളറിന്റെയും വർധനവ് പ്രാബല്യത്തിൽ വരും.
പൊതുഗതാഗതം, കമ്മ്യൂണിറ്റി ഗ്രാന്റുകൾ തുടങ്ങിയവയിൽ വലിയ വെട്ടിക്കുറയ്ക്കലുകൾ വരുത്തരുതെന്ന പൊതുജനങ്ങളുടെ ആവശ്യം കൗൺസിൽ അംഗീകരിച്ചു. ഇത്തരം സേവനങ്ങളെ ബാധിക്കാതെ, നഗരസഭയുടെ ഭരണപരമായ ചിലവുകളിലാണ് ഭേദഗതികൾ വരുത്തിയത്. കൺസൾട്ടിംഗ് സേവനങ്ങൾ, പെസ്റ്റ് കൺട്രോൾ, യൂട്ടിലിറ്റി ഫീസുകൾ എന്നിവയിൽ നിന്ന് ലക്ഷക്കണക്കിന് ഡോളർ ലാഭിക്കാനാണ് പദ്ധതി. ഹെറിറ്റേജ് ഗ്രാന്റ് പ്രോഗ്രാമിൽ നിന്നും 1,30,000 ഡോളർ വെട്ടിക്കുറച്ചു.
ബജറ്റിനെതിരെ കൗൺസിലിൽ ശക്തമായ വിമർശനങ്ങളും ഉയർന്നു. സേവനങ്ങളിൽ കുറവ് വരുത്തുകയും എന്നാൽ നിരക്കുകൾ വർധിപ്പിക്കുകയും ചെയ്യുന്നത് നഗരത്തിലെ ജീവിതം ദുസ്സഹമാക്കുമെന്ന് കൗൺസിലർ ഷാനൺ സച്ചിഡ്നിയാക് പറഞ്ഞു. എന്നാൽ, മുൻകാലങ്ങളിൽ ജനപ്രീതി ലക്ഷ്യമിട്ട് നികുതി കുറച്ചു നിർത്തിയതാണ് ഇപ്പോൾ വലിയ വർധനവിന് കാരണമായതെന്ന് ബജറ്റിനെ അനുകൂലിച്ചവർ വാദിച്ചു. നഗരത്തിന്റെ ഭാവി സുരക്ഷിതമാക്കാൻ കൃത്യമായ കണക്കുകളുടെ അടിസ്ഥാനത്തിലുള്ള ഇത്തരം നടപടികൾ വേണമെന്നും അവർ കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Taxes to increase in Regina; 2026 budget passed after debate
