സസ്കറ്റൂൺ: സസ്കച്ചെവാനിലെ ഗ്രാമീണ, വടക്കൻ മേഖലകളിലെ സ്ത്രീകൾക്ക് സ്തനാർബുദ പരിശോധന കൂടുതൽ എളുപ്പമാക്കുന്നതിനായി പുതിയ മാമോഗ്രഫി ബസ് ജനുവരിയിൽ മുതൽ യാത്ര തുടങ്ങുന്നു. 2002 മുതൽ പ്രവർത്തനത്തിലുണ്ടായിരുന്ന പഴയ മൊബൈൽ യൂണിറ്റിന് പകരമായാണ് ഈ പുതിയ ബസ് എത്തുന്നത്. വ്യാഴാഴ്ച സസ്കാറ്റൂണിൽ നടന്ന ചടങ്ങിൽ സസ്കച്ചെവാൻ ഹെൽത്ത് അതോറിറ്റിയും (SHA) ക്യാൻസർ ഫൗണ്ടേഷനും ചേർന്ന് പുതിയ മാമോഗ്രഫി ബസ് ഉദ്ഘാടനം ചെയ്തു.
അടുത്ത വർഷം ഏകദേശം 14,000 സ്ത്രീകൾക്ക് ഈ പുതിയ യൂണിറ്റിലൂടെ പരിശോധന നടത്താൻ സാധിക്കുമെന്ന് ക്യാൻസർ ഏജൻസി പ്രസിഡന്റും സി.ഇ.ഒയുമായ ഡെബ് ബുലിച്ച് അറിയിച്ചു. സംസ്ഥാനത്തെ ആകെ സ്തനാർബുദ പരിശോധനകളുടെ മൂന്നിലൊന്നും നിലവിൽ മൊബൈൽ യൂണിറ്റുകൾ വഴിയാണ് നടക്കുന്നത്. പരിശോധനയിലൂടെ രോഗം നേരത്തെ കണ്ടെത്തുന്നത് മികച്ച ചികിത്സ ഉറപ്പാക്കാനും രോഗമുക്തിക്കും സഹായിക്കുമെന്ന് അവർ വ്യക്തമാക്കി.
നിലവിലുള്ള വാഹനത്തേക്കാൾ കാര്യക്ഷമവും കുറഞ്ഞ അളവിൽ റേഡിയേഷൻ ഉപയോഗിക്കുന്നതുമായ അത്യാധുനിക മെഷീനുകളാണ് പുതിയ ബസ്സിലുള്ളതെന്ന് ഹെൽത്ത് അതോറിറ്റി ചീഫ് ഓപ്പറേറ്റിംഗ് ഓഫീസർ ഡെറക് മില്ലർ പറഞ്ഞു. നഗരങ്ങളിലെ വലിയ ആശുപത്രികളിൽ ലഭിക്കുന്ന അതേ നിലവാരത്തിലുള്ള പരിശോധനാ സൗകര്യങ്ങൾ ഈ വാഹനത്തിലൂടെ ഗ്രാമീണ മേഖലകളിലും ലഭ്യമാകും. ഏകദേശം 42 ഓളം ഗ്രാമീണ കേന്ദ്രങ്ങളിൽ ജനുവരി മുതൽ ഈ ബസ് സന്ദർശനം നടത്തും.
സംസ്ഥാനത്ത് സ്തനാർബുദ പരിശോധനയ്ക്കുള്ള പ്രായപരിധിയിൽ അടുത്തിടെ ഇളവുകൾ വരുത്തിയിരുന്നു. 45 വയസ്സും അതിനുമുകളിലും പ്രായമുള്ള സ്ത്രീകൾക്ക് ഇപ്പോൾ ഡോക്ടറുടെ ശുപാർശയില്ലാതെ തന്നെ നേരിട്ട് പരിശോധനയ്ക്ക് അപേക്ഷിക്കാം. 2026 ജൂലൈയോടെ പരിശോധനാ പ്രായപരിധി 40 ആയി കുറയ്ക്കാനാണ് സർക്കാർ ലക്ഷ്യമിടുന്നത്. ഈ മാറ്റം കൂടുതൽ സ്ത്രീകൾക്ക് പുതിയ മൊബൈൽ യൂണിറ്റിന്റെ സേവനം പ്രയോജനപ്പെടുത്താൻ അവസരമൊരുക്കും.
23 വർഷത്തെ സേവനത്തിന് ശേഷമാണ് പഴയ വാഹനം മാറ്റുന്നതെന്ന് ആരോഗ്യ മന്ത്രി ജെറമി കോക്രിൾ അറിയിച്ചു. നിരന്തരമായ യാത്രകൾ മൂലം പഴയ വാഹനത്തിന്റെ കാര്യക്ഷമത കുറഞ്ഞ സാഹചര്യത്തിലാണ് പുതിയ നടപടി. 2026 അവസാനത്തോടെ രണ്ടാമതൊരു മാമോഗ്രഫി ബസ് കൂടി സർവീസിനായി നിരത്തിലിറക്കാൻ പദ്ധതിയുണ്ടെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Breast cancer screening now available at Saskatchewan's doorstep; new mobile mammography bus coming
