ബ്രൗൺ യൂണിവേഴ്‌സിറ്റിയിൽ വെടിവെപ്പ്; രണ്ട് വിദ്യാർത്ഥികൾ കൊല്ലപ്പെട്ടു, എട്ടുപേർക്ക് പരിക്ക്

റോഡ് ഐലൻഡ്: റോഡ് ഐലൻഡിലെ പ്രശസ്തമായ ബ്രൗൺ യൂണിവേഴ്‌സിറ്റി കാമ്പസിൽ നടന്ന വെടിവെപ്പിൽ രണ്ട് പേർ കൊല്ലപ്പെട്ടു. എട്ട് പേർക്ക് ഗുരുതര പരിക്ക്. അക്രമിയെ ഇതുവരെ പിടികൂടാൻ കഴിഞ്ഞിട്ടില്ലെന്നും അന്വേഷണം പുരോഗമിക്കുകയാണെന്നും പ്രൊവിഡൻസ് മേയർ ബ്രെറ്റ് സ്‌മൈലി സ്ഥിരീകരിച്ചു. പരീക്ഷാ തിരക്കിനിടെയാണ് യൂണിവേഴ്‌സിറ്റി കാമ്പസിനെ ഞെട്ടിച്ചുകൊണ്ട് വെടിവെപ്പുണ്ടായത്.

ശനിയാഴ്ച പ്രാദേശിക സമയം ഏകദേശം 4:22ന് (ഇന്ത്യൻ സമയം ഞായറാഴ്ച പുലർച്ചെ 2:52) ഐവി ലീഗ് യൂണിവേഴ്‌സിറ്റി അധികൃതർ അടിയന്തര മുന്നറിയിപ്പ് നൽകി. ബാറുസ് ആൻഡ് ഹോളി എഞ്ചിനീയറിംഗ് ലാബിന് സമീപം തോക്കുധാരിയുണ്ടെന്നായിരുന്നു അറിയിപ്പ്.

പ്രാദേശിക സമയം 5:27ന് യൂണിവേഴ്‌സിറ്റി ഗവർണർ സ്ട്രീറ്റിന് സമീപം, ഏകദേശം രണ്ട് ബ്ലോക്കുകൾ അകലെ വെച്ച് വെടിയൊച്ചകൾ കേട്ടതായാണ് റിപ്പോർട്ട്. ഇതിന് തൊട്ടുപിന്നാലെ “ബ്രൗൺ യൂണിവേഴ്സിറ്റി പ്രദേശത്ത് നിരവധി പേർക്ക് വെടിയേറ്റു” എന്ന് പ്രൊവിഡൻസ് പോലീസ് ഡിപ്പാർട്ട്‌മെൻ്റ് അറിയിച്ചു. സംശയിക്കുന്ന ഒരാളെ കസ്റ്റഡിയിലെടുത്തതായി നേരത്തെ യൂണിവേഴ്‌സിറ്റി നൽകിയ അറിയിപ്പ് പിന്നീട് പിൻവലിച്ചു. “പോലീസ് ഇതുവരെ ആരെയും കസ്റ്റഡിയിലെടുത്തിട്ടില്ല, സംശയിക്കുന്നവർക്കായി തിരച്ചിൽ തുടരുന്നു” എന്നും അധികൃതർ വ്യക്തമാക്കി.

യുഎസ് പ്രസിഡൻ്റ് ഡൊണാൾഡ് ട്രംപും തൻ്റെ ഓൺലൈൻ പ്ലാറ്റ്‌ഫോമായ ട്രൂത്ത് സോഷ്യലിൽ പ്രതി കസ്റ്റഡിയിലായെന്ന പോസ്റ്റ് പിന്നീട് തിരുത്തി. വെടിവെപ്പിനെ തുടർന്ന് നിയമപാലകർ യൂണിവേഴ്‌സിറ്റി കാമ്പസിൽ തുടരുകയാണ്. അക്കാദമിക് സെമസ്റ്റർ അവസാനിക്കുന്ന സമയത്താണ് ഈ സംഭവം. കഴിഞ്ഞ വ്യാഴാഴ്ചയായിരുന്നു അവസാന ക്ലാസ്, ഡിസംബർ 20 വരെ അവസാന പരീക്ഷാ കാലയളവാണ്.

യുഎസിലെ ഏഴാമത്തെ പഴക്കമേറിയ യൂണിവേഴ്‌സിറ്റിയും ഐവി ലീഗ് കൂട്ടായ്മയുടെ ഭാഗവുമാണ് ബ്രൗൺ യൂണിവേഴ്‌സിറ്റി. 11,005 വിദ്യാർത്ഥികളാണ് ഇവിടെയുള്ളത്. ഈ ആഴ്ച ഒരു യൂണിവേഴ്‌സിറ്റി കാമ്പസിൽ ഉണ്ടാകുന്ന രണ്ടാമത്തെ പ്രധാന വെടിവെപ്പാണിത്. കേവലം നാല് ദിവസം മുൻപ്, ഡിസംബർ 9 ന്, കെൻ്റക്കി സ്റ്റേറ്റ് യൂണിവേഴ്‌സിറ്റി കാമ്പസിലുണ്ടായ വെടിവെപ്പിൽ ഒരു വിദ്യാർത്ഥി കൊല്ലപ്പെടുകയും മറ്റൊരാൾക്ക് ഗുരുതരമായി പരിക്കേൽക്കുകയും ചെയ്തിരുന്നു.

ഈ വർഷം ഡിസംബർ 9 വരെ യുഎസിൽ 73 സ്കൂൾ വെടിവെപ്പുകൾ നടന്നിട്ടുണ്ടെന്നാണ് കണക്ക്. വെടിവെപ്പ് സംഭവങ്ങൾ ട്രാക്ക് ചെയ്യുന്ന ലാഭേച്ഛയില്ലാതെ പ്രവർത്തിക്കുന്ന സംഘടനയായ ഗൺ വയലൻസ് ആർക്കൈവ്, ഈ വർഷം മാത്രം 389 ‘കൂട്ട വെടിവെപ്പുകൾ’ (മാസ് ഷൂട്ടിംഗ്‌സ്) രേഖപ്പെടുത്തിയിട്ടുണ്ട്.

brown-university-in-us-reports-active-shooter-situation-on-campus

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt