തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പ് വോട്ടെണ്ണൽ പുരോഗമിക്കുമ്പോൾ സംസ്ഥാനത്ത് യുഡിഎഫ് അപ്രതീക്ഷിത മുന്നേറ്റം നടത്തുകയാണ്. ഗ്രാമ, ബ്ലോക്ക്, ജില്ലാ പഞ്ചായത്തുകൾ, മുനിസിപ്പാലിറ്റികൾ, കോർപ്പറേഷനുകൾ തുടങ്ങി ത്രിതല തിരഞ്ഞെടുപ്പിന്റെ എല്ലാ മേഖലകളിലും യുഡിഎഫ് ലീഡ് നിലനിർത്തുകയാണ്. 2010-ന് ശേഷം ചരിത്രത്തിൽ ആദ്യമായാണ് യുഡിഎഫ് ഇത്രയും ശക്തമായ മുന്നേറ്റം കാഴ്ചവെക്കുന്നത്. എൽഡിഎഫിന്റെ ശക്തികേന്ദ്രങ്ങളിൽ പോലും വൻ മുന്നേറ്റമാണ് യുഡിഎഫ് നടത്തുന്നത് എന്ന സൂചനകൾ നിലവിലെ രാഷ്ട്രീയ ചിത്രം മാറ്റിയെഴുതാൻ സാധ്യതയുണ്ട്.
വോട്ടെണ്ണൽ മൂന്ന് മണിക്കൂർ പിന്നിട്ടപ്പോൾ പുറത്തുവരുന്ന ഈ സൂചനകൾ, വരാനിരിക്കുന്ന നിയമസഭാ തിരഞ്ഞെടുപ്പിൽ നിർണ്ണായകമായ സ്വാധീനം ചെലുത്താൻ സാധ്യതയുണ്ട്. യുഡിഎഫ് പോലും പ്രതീക്ഷിക്കാത്ത തരത്തിലാണ് മുന്നേറ്റം രേഖപ്പെടുത്തുന്നത്. അതേസമയം, ഭരണകക്ഷിയായ എൽഡിഎഫിന് കാര്യമായ തിരിച്ചടി നേരിടുന്നുണ്ടെങ്കിലും, ബിജെപിക്ക് ഈ തിരഞ്ഞെടുപ്പിൽ അവരുടെ നേട്ടം വർദ്ധിപ്പിക്കാൻ കഴിഞ്ഞു. മുൻ തിരഞ്ഞെടുപ്പിൽ 23 പഞ്ചായത്തുകളിൽ ലീഡ് നേടിയ സ്ഥാനത്ത് ഇത്തവണ 33 പഞ്ചായത്തുകളിലാണ് ബിജെപി മുന്നിലുള്ളത്. കൂടാതെ ഒരു കോർപ്പറേഷനിലും ബിജെപി ലീഡ് നിലനിർത്തുന്നുണ്ട്.
കോർപ്പറേഷനുകളിലാണ് യുഡിഎഫ് ഏറ്റവും വലിയ ‘ഞെട്ടിക്കൽ’ മുന്നേറ്റം കാഴ്ചവെക്കുന്നത്. എൽഡിഎഫിന്റെ കുത്തക കോർപ്പറേഷനായിരുന്ന കൊല്ലം അടക്കമുള്ള നഗരസഭകളിൽ യുഡിഎഫ് മുന്നേറുകയാണ്. കൊച്ചി കോർപ്പറേഷനിലും യുഡിഎഫ് ഭരണം പിടിച്ചെടുത്തേക്കും എന്ന സൂചനകളാണ് നിലവിലുള്ളത്. തൃശൂർ, കൊല്ലം, കോഴിക്കോട്, കൊച്ചി കോർപ്പറേഷനുകളിലാണ് യുഡിഎഫ് ശക്തമായ മുന്നേറ്റം. തൃശൂരിൽ 45 സീറ്റുകളിൽ യുഡിഎഫ് മുന്നിട്ട് നിൽക്കുമ്പോൾ എൽഡിഎഫിന് 28 സീറ്റുകളിലാണ് ലീഡുള്ളത്. കണ്ണൂരിലും യുഡിഎഫ് മുന്നേറ്റം രേഖപ്പെടുത്തുന്നുണ്ട്.
കഴിഞ്ഞ തിരഞ്ഞെടുപ്പിൽ കണ്ണൂർ ഒഴികെയുള്ള അഞ്ച് കോർപ്പറേഷനുകളിലും എൽഡിഎഫ് ആയിരുന്നു വിജയിച്ചത് എന്ന സാഹചര്യത്തിലാണ് ഇത്തവണത്തെ യുഡിഎഫിന്റെ മുന്നേറ്റം ശ്രദ്ധേയമാകുന്നത്. കോഴിക്കോട് കോർപ്പറേഷനിൽ യുഡിഎഫ് അപ്രതീക്ഷിത മുന്നേറ്റം കാഴ്ചവെച്ചെങ്കിലും എൽഡിഎഫ് ശക്തമായ തിരിച്ചുവരവിനുള്ള ശ്രമങ്ങൾ നടത്തുന്നുണ്ട്. അതേസമയം, പാലക്കാട് നഗരസഭയിൽ യുഡിഎഫ് നേരിയ തോതിൽ പിന്നോട്ട് പോകുമ്പോൾ തലസ്ഥാന നഗരിയായ തിരുവനന്തപുരത്ത് എൻഡിഎ (ബിജെപി) ആണ് ലീഡ് ചെയ്യുന്നത്.
സംസ്ഥാനത്തിന്റെ ഗ്രാമപ്രദേശങ്ങൾ മുതൽ നഗരങ്ങൾ വരെ നീളുന്ന ഈ അപ്രതീക്ഷിത തിരഞ്ഞെടുപ്പ് ഫലം കേരള രാഷ്ട്രീയത്തിൽ പുതിയ ചലനങ്ങൾ സൃഷ്ടിക്കുമെന്നാണ് വിലയിരുത്തൽ. ത്രിതല പഞ്ചായത്തുകളിലെ ലീഡ് നില അന്തിമമാകുമ്പോൾ സംസ്ഥാനത്തെ രാഷ്ട്രീയ ശക്തികളുടെ യഥാർത്ഥ ചിത്രം വ്യക്തമാകും.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
UDF performs well in local elections: Huge lead at all levels after 15 years
