ഇമിഗ്രേഷൻ കൺസൾട്ടന്റിന്റെ അനാസ്ഥ ; ഒട്ടാവയിൽ നാടുകടത്തൽ ഭീഷണിയിൽ ഒരു ബ്രസീലിയൻ കുടുംബം!

ഒട്ടാവ: കാനഡയിൽ സ്ഥിരതാമസമാക്കാൻ സ്വപ്നം കണ്ട ബ്രസീലിയൻ കുടുംബത്തിൻ്റെ ജീവിതമാണ് ലൈസൻസുള്ള ഇമിഗ്രേഷൻ കൺസൾട്ടൻ്റിൻ്റെ അനാസ്ഥ കാരണം തകർന്നത്. 2016-ൽ മതപരമായ ജോലിക്കുള്ള വിസയിൽ ഒട്ടാവയിലെത്തിയ പൗലോ, ലൈല മിറ ദമ്പതികളും അവരുടെ മൂന്ന് പെൺമക്കളും, ഇപ്പോൾ നാടുകടത്തൽ ഭീഷണി നേരിടുകയാണ്. തങ്ങളുടെ ഇമിഗ്രേഷൻ രേഖകൾ കൃത്യമായി കൈകാര്യം ചെയ്യാൻ ഏൽപ്പിച്ച കൺസൾട്ടൻ്റ്, ഫയൽ കൃത്യമായി സമർപ്പിക്കാതിരിക്കുകയും തുടർന്ന് ബന്ധപ്പെടാൻ കഴിയാതെ വരികയും ചെയ്തതാണ് കുടുംബത്തിന് വിനയായത്.

ഒൻപത് വർഷത്തോളം ഒട്ടാവയിൽ ജോലി ചെയ്യുകയും കുടുംബത്തെ വളർത്തുകയും ചെയ്ത മിറ ദമ്പതികൾക്ക്, രാജ്യത്ത് പദവി ഇല്ലെന്നും സ്വമേധയാ രാജ്യം വിടണമെന്നും ആവശ്യപ്പെട്ടുകൊണ്ടുള്ള ഫെഡറൽ ഇമിഗ്രേഷൻ ഉദ്യോഗസ്ഥരിൽ നിന്നുള്ള കത്ത് ലഭിച്ചു. ഏറ്റവും ഇളയ മകൾ ഹന്ന കാനഡയിൽ ജനിച്ചതാണ്. “എനിക്ക് ബ്രസീലിലേക്ക് തിരിച്ചുപോകാൻ ആഗ്രഹമില്ല, കാരണം എൻ്റെ ജീവിതം ഇവിടെയാണ്. എൻ്റെ ഇളയ മകൾ ഇവിടെയാണ് ജനിച്ചത്, അവൾക്ക് ഇവിടെ താമസിക്കാനാണ് ആഗ്രഹം,” എന്ന് ലൈല കണ്ണീരോടെ പ്രതികരിച്ചിരുന്നു.

2023-ൽ സ്ഥിരതാമസത്തിനായി അപേക്ഷിക്കുന്നതിനും, മകൾ ഈസ്റ്ററിന് വർക്ക് പെർമിറ്റ് നേടുന്നതിനും വേണ്ടിയാണ് കുടുംബം അന റെക്വൽ അപാരീസിയോ പെർഡോമോയെ നിയമിച്ചത്. അവർക്ക് എക്സ്പ്രസ് എൻട്രിക്ക് യോഗ്യതയില്ലെന്നും, മാനുഷികവും സഹാനുഭൂതിപരവുമായ (Humanitarian and Compassionate) കാരണങ്ങൾ മുൻനിർത്തി പി.ആർ. നേടാമെന്നും പെർഡോമോ അവരെ വിശ്വസിപ്പിച്ചു. 2025 ജനുവരിയിൽ, വിസയുടെ കാലാവധി തീരാനിരിക്കെ, കരാർ ഒപ്പിടാതെ തന്നെ പൗലോ 3,000 ഡോളർ കൺസൾട്ടൻ്റിന് കൈമാറി. എന്നാൽ, പിന്നീട് കൺസൾട്ടൻ്റ് കോളുകൾക്കും ഇ-മെയിലുകൾക്കും പ്രതികരിച്ചില്ല. ഓഫീസിൽ പോയപ്പോൾ അവർ താമസം മാറിയതായി അറിയാൻ കഴിഞ്ഞു.

കൺസൾട്ടൻ്റിനെ കണ്ടെത്താൻ കഴിയാതെ വന്നപ്പോൾ ലൈല ഇമിഗ്രേഷൻ റെഫ്യൂജീസ് സിറ്റിസൺഷിപ്പ് കാനഡയിൽ വിളിച്ചപ്പോഴാണ് ഞെട്ടിക്കുന്ന സത്യങ്ങൾ പുറത്തുവന്നത്. തങ്ങളുടെ വർക്ക് പെർമിറ്റ് അപേക്ഷകൾ നിരസിച്ചെന്നും, അപേക്ഷയിൽ രേഖകൾ കുറവുണ്ടായിരുന്നു എന്നും, ഫീസ് അടയ്ക്കാതെ കിടന്നിരുന്നുവെന്നും കുടുംബം അറിഞ്ഞു. താൽക്കാലിക താമസ പദവി (Temporary Resident Status) നഷ്ടപ്പെട്ട വിവരം മെയ് 29-ന് ഐ.ആർ.സി.സി. കൺസൾട്ടൻ്റിൻ്റെ വിലാസത്തിൽ അയച്ചെങ്കിലും, ആ വിവരം പെർഡോമോ കുടുംബത്തെ അറിയിച്ചില്ല. മറ്റൊരു പരാതിയെ തുടർന്ന് ഈ വർഷം ജൂൺ 24-ന് കോളേജ് ഓഫ് ഇമിഗ്രേഷൻ ആൻഡ് സിറ്റിസൺഷിപ്പ് കൺസൾട്ടൻ്റ്സ് (CICC) പെർഡോമോയുടെ ലൈസൻസ് സസ്പെൻഡ് ചെയ്യുകയും, ആവശ്യമായ രേഖകൾ നൽകാത്തതിനെ തുടർന്ന് നവംബറിൽ ലൈസൻസ് റദ്ദാക്കുകയും ചെയ്തു.

കുടുംബത്തിന് സംഭവിച്ചത് “ദുരന്തമാണ്” എന്ന് ഒട്ടാവ ഇമിഗ്രേഷൻ അഭിഭാഷകൻ വാറൻ ക്രിയേറ്റ്‌സ് പ്രതികരിച്ചു. വഞ്ചകരായ കൺസൾട്ടൻ്റുമാരുടെ ഇരകളാകുന്നവർക്ക് ഇമിഗ്രേഷൻ വിഭാഗം സാധാരണയായി ഇളവുകൾ നൽകാറില്ലെന്നും അദ്ദേഹം പറഞ്ഞു. താൽക്കാലിക വർക്ക് പെർമിറ്റ് ലഭിക്കുന്നതിന് ശ്രമിക്കാൻ സാധിക്കുമെങ്കിലും, അത് ലഭിക്കുന്നതുവരെ കുടുംബത്തിന് ബ്രസീലിലേക്ക് മടങ്ങേണ്ടി വന്നേക്കാം. ഈ വർഷം ആദ്യ മൂന്ന് പാദങ്ങളിൽ 18,785 പേരെ രാജ്യം നാടുകടത്തിയ സാഹചര്യത്തിൽ, മിറ കുടുംബത്തിൻ്റെ ഭാവി ആശങ്കയിലാണ്.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Immigration consultant’s negligence; A Brazilian family in Ottawa faces deportation!