സാസ്കച്ചെവാൻ: ഡൽഹൗസി യൂണിവേഴ്സിറ്റിയിലെ അഗ്രി-ഫുഡ് അനലിറ്റിക്സ് ലാബ് പുറത്തിറക്കിയ ‘കനേഡിയൻ ഫുഡ് സെന്റിമെന്റ് ഇൻഡക്സ്: ഫാൾ 2025’ റിപ്പോർട്ട് പ്രകാരം, കാനഡയിലെ പൗരന്മാർക്കിടയിൽ ഭക്ഷ്യവില വർദ്ധനവ് സംബന്ധിച്ച ആശങ്കകൾ ശക്തമായി തുടരുന്നുണ്ട്. ഔദ്യോഗിക കണക്കുകൾ പ്രകാരം ഭക്ഷ്യവിലക്കയറ്റത്തിന്റെ തോത് കുറയുന്നുണ്ടെങ്കിലും, സാധാരണക്കാർക്ക് വിലയിൽ കാര്യമായ ആശ്വാസം ലഭിക്കുന്നില്ല. കഴിഞ്ഞ ഒരു വർഷത്തിനിടെ കനേഡിയൻ കുടുംബങ്ങളെ ഏറ്റവും കൂടുതൽ ബാധിച്ച ചെലവ് വർദ്ധനവ് ഭക്ഷ്യവസ്തുക്കളുടെ വിഭാഗത്തിലാണെന്നും റിപ്പോർട്ട് വ്യക്തമാക്കുന്നു.
ഭക്ഷ്യവിലക്കയറ്റം നേരിടാനായി കനേഡിയൻ പൗരന്മാർ ജീവിതശൈലിയിൽ വലിയ മാറ്റങ്ങൾ വരുത്തുന്നതായും റിപ്പോർട്ടിൽ വ്യക്തമാക്കിയിട്ടുണ്ട്. പകുതിയോളം പേരും സെയിൽ, ഡിസ്കൗണ്ടുകൾ എന്നിവ സജീവമായി തേടുന്നു. വില കുറഞ്ഞ ബ്രാൻഡുകളിലേക്ക് മാറുകയും, ഡിസ്കൗണ്ട് സ്റ്റോറുകൾ സന്ദർശിക്കുകയും, പ്രീമിയം മാംസങ്ങൾ, ഐസ്ക്രീം പോലുള്ള അത്യാവശ്യമല്ലാത്ത സാധനങ്ങൾ വെട്ടിക്കുറയ്ക്കുകയും ചെയ്യുന്ന ശീലം വർദ്ധിച്ചു.
കാനഡയിലെ ഏറ്റവും ദുർബലമായ ഭക്ഷ്യസുരക്ഷാ മേഖലകളിൽ ഉൾപ്പെടുന്ന ആൽബർട്ട, സാസ്കച്ചെവാൻ, മാനിറ്റോബ എന്നിവിടങ്ങളിൽ, ഭക്ഷ്യവസ്തുക്കൾ വാങ്ങാൻ വേണ്ടി സേവിംഗ്സ് ഉപയോഗിക്കുകയോ അല്ലെങ്കിൽ പണം കടം വാങ്ങുകയോ ചെയ്യേണ്ടിവന്ന കുടുംബങ്ങളുടെ എണ്ണം 44 ശതമാനം വരെയാണ്. കാനഡയിലെ മൊത്തം കുടുംബങ്ങളിൽ 25.5 ശതമാനവും ഭക്ഷ്യസുരക്ഷാ ഭീഷണിയിലാണെന്നും ഇത് റെക്കോർഡ് നിലയാണെന്നും റിപ്പോർട്ടിൽ പറയുന്നു. വില വർദ്ധനവ് കാരണം ഭക്ഷണക്രമത്തിൽ പോലും മാറ്റങ്ങൾ വന്നിട്ടുണ്ട്. ഉയർന്ന മാംസവില കാരണം, പരമ്പരാഗത ഭക്ഷണരീതി പിന്തുടരുന്നവരുടെ എണ്ണം കുറഞ്ഞു.
പ്രോട്ടീൻ വില വർദ്ധനവ് ഏറ്റവും കൂടുതൽ ബാധിക്കുന്നത് മൂന്നോ അതിലധികമോ കുട്ടികളുള്ള വലിയ കുടുംബങ്ങളെയാണ്. ഈ വിഭാഗത്തിൽ, ഭക്ഷണം വാങ്ങാൻ സേവിംഗ്സ് ഉപയോഗിക്കേണ്ടി വന്നവരുടെ എണ്ണം 65 ശതമാനമാണ്. ഈ സാമ്പത്തിക സമ്മർദ്ദങ്ങൾക്കിടയിലും, പൗരന്മാർ സുസ്ഥിരതയ്ക്കും സുതാര്യതയ്ക്കും പ്രാധാന്യം നൽകുന്നുണ്ട്. പകുതിയിലധികം പേരും ഇപ്പോൾ പ്രാദേശികമായി ഉൽപ്പാദിപ്പിക്കുന്ന ഭക്ഷണങ്ങൾ തിരഞ്ഞെടുക്കാൻ ശ്രദ്ധിക്കുന്നു, ഇത് ഒരു വർഷം മുൻപുള്ളതിനേക്കാൾ വലിയ വർദ്ധനവാണ്.
ഭക്ഷ്യവസ്തുക്കൾക്ക് നികുതി ഒഴിവാക്കണം എന്ന കാര്യത്തിൽ കനേഡിയൻ പൗരന്മാർക്ക് ഏകകണ്ഠമായ അഭിപ്രായമാണുള്ളത്. 86 ശതമാനത്തിലധികം പേരും എല്ലാ ഭക്ഷ്യവസ്തുക്കളിൽ നിന്നുമുള്ള റീട്ടെയിൽ നികുതി എടുത്തുമാറ്റുന്നതിനെ പിന്തുണയ്ക്കുന്നു. ഭക്ഷ്യവില വർദ്ധനവ് കാരണം പൗരന്മാർ കടുത്ത ബുദ്ധിമുട്ടിലാണെന്നും, ഈ പ്രതിസന്ധി നേരിടാൻ നയരൂപകർത്താക്കൾ ശക്തമായ പരിഷ്കാരങ്ങൾ കൊണ്ടുവരണം എന്നും റിപ്പോർട്ട് ആവശ്യപ്പെടുന്നു. വരുമാനം പരിഗണിക്കാതെ എല്ലാ കുടുംബങ്ങൾക്കും പോഷകഗുണമുള്ള ഭക്ഷണം ലഭ്യമാക്കാൻ കഴിയുന്ന അടിസ്ഥാനപരമായ മാറ്റങ്ങൾ ഉണ്ടാകേണ്ടത് അത്യാവശ്യമാണെന്നും റിപ്പോർട്ട് അടിവരയിടുന്നു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Families in Canada unable to afford rising prices; Saskatchewan in deep crisis
