കാൻബെറ: ഓസ്ട്രേലിയൻ രാഷ്ട്രീയത്തിൽ വീണ്ടും മതപരമായ വസ്ത്രധാരണത്തെ ചൊല്ലി വലിയ വിവാദം ഉടലെടുത്തിരിക്കുകയാണ്. വലതുപക്ഷ രാഷ്ട്രീയ നേതാവും വൺ നേഷൻ പാർട്ടിയുടെ തലവനുമായ പോളിൻ ഹാൻസൺ, പാർലമെന്റിൽ ബുർഖ ധരിച്ചെത്തിയ നടപടിയാണ് രാജ്യത്ത് പുതിയ ചർച്ചകൾക്ക് തിരികൊളുത്തിയിരിക്കുന്നത്.
ബുർഖ പൂർണ്ണമായി ധരിച്ച് സെനറ്റ് ഹാളിൽ പ്രവേശിച്ച ശേഷം, അത് ഊരിമാറ്റിയ ഹാൻസൺ, പൊതുസ്ഥലങ്ങളിൽ മുഖം മറയ്ക്കുന്ന വസ്ത്രങ്ങൾക്ക് നിരോധനം വേണമെന്ന് ആവശ്യപ്പെട്ടു. ഈ ‘പ്രകടനത്തിനെതിരെ’ ശക്തമായ പ്രതിഷേധമാണ് ഓസ്ട്രേലിയൻ രാഷ്ട്രീയ രംഗത്തും പൊതുസമൂഹത്തിലും ഉയർന്നിരിക്കുന്നത്.
മുസ്ലിം സ്ത്രീകൾ ധരിക്കുന്ന ഈ മത-സാംസ്കാരിക വസ്ത്രത്തെ അപമാനിക്കുന്നതിന് തുല്യമാണ് ഹാൻസന്റെ നടപടിയെന്ന് വ്യാപകമായി ആരോപണമുയർന്നു. മനുഷ്യാവകാശ സംഘടനകൾ ഈ നീക്കത്തെ, രാജ്യത്ത് വിഭാഗീയത വളർത്താൻ ലക്ഷ്യമിട്ടുള്ള ‘രാഷ്ട്രീയ നാടകം’ എന്ന് വിശേഷിപ്പിച്ചു. മന്ത്രിമാരും സെനറ്റർമാരും ഹാൻസന്റെ നടപടി “മാന്യതയില്ലാത്തതും “അവഹേളനപരമായതെന്നും തുറന്നടിച്ച് വിമർശിച്ചു.
പ്രധാനമന്ത്രിയുടെ ഓഫീസും അറ്റോർണി ജനറലും വിഷയത്തിൽ സംയുക്തമായി പ്രതികരിച്ചു. മതവിശ്വാസത്തിന്റെ പേരിൽ ഒരാളുടെ വസ്ത്രധാരണത്തെ കളിയാക്കുന്നതും, രാഷ്ട്രീയ നേട്ടത്തിനായി ഉപയോഗിക്കുന്നതും ഒരു ആരോഗ്യകരമായ ജനാധിപത്യത്തിന് ചേർന്നതല്ല എന്ന് അവർ വ്യക്തമാക്കി.
ബുർഖ വിവാദത്തിനൊപ്പം, ഹാൻസന്റെ പേരിലുള്ള മറ്റൊരു നിയമപരമായ പോരാട്ടവും തുടരുകയാണ്. ഗ്രീൻസ് സെനറ്ററായ മെഹ്റീൻ ഫറൂഖിയെ ലക്ഷ്യമിട്ട് “പാക്കിസ്ഥാനിലേക്ക് മടങ്ങിപ്പോകൂ” എന്ന പരാമർശം നടത്തിയതിന് ഫെഡറൽ കോടതി നൽകിയ ജാതിവിവേചന വിധി ചോദ്യം ചെയ്ത് അവർ അപ്പീൽ നൽകിയിരിക്കുകയാണ്. നിലവിലെ നിയമങ്ങൾ “വളരെ കർശനമാണ്” എന്നാണ് ഈ വിഷയത്തിൽ ഹാൻസൺ സ്വീകരിച്ച നിലപാട്.
വിദഗ്ധരുടെ വിലയിരുത്തൽ അനുസരിച്ച്, അടുത്ത തിരഞ്ഞെടുപ്പ് മുന്നിൽ കണ്ട് മാധ്യമശ്രദ്ധ പിടിച്ചുപറ്റാനുള്ള ശ്രമമാണ് ഹാൻസൺ നടത്തിയത്. എന്നാൽ, പൊതുജനങ്ങളിൽ നിന്ന് ശക്തമായ എതിർപ്പ് ഉയരുന്ന ഈ സാഹചര്യത്തിൽ, അവരുടെ പാർട്ടിയായ വൺ നേഷന് രാഷ്ട്രീയപരമായി ഇത് തിരിച്ചടിയാകാൻ സാധ്യതയുണ്ടെന്നും വിലയിരുത്തപ്പെടുന്നു.
മതസ്വാതന്ത്ര്യം, സാംസ്കാരിക ബഹുമാനം, പാർലമെന്റിന്റെ മാന്യത തുടങ്ങിയ സുപ്രധാന വിഷയങ്ങൾ വീണ്ടും ഓസ്ട്രേലിയയിൽ ദേശീയ ചർച്ചകൾക്ക് വഴി തുറന്നിരിക്കുകയാണ്. ഹാൻസന്റെ ഈ പ്രവൃത്തി രാജ്യത്തിന്റെ രാഷ്ട്രീയ മണ്ഡലത്തിൽ കൂടുതൽ ചേരിതിരിവിനും അഭിപ്രായവ്യത്യാസങ്ങൾക്കും കാരണമാകുമോ എന്ന് കണ്ടറിയണം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
pauline-hanson-burqa-controversy-australian-senate-dramatic-scenes
