വാഷിങ്ടൺ: യുഎസ് പ്രസിഡന്റ് ഡോണൾഡ് ട്രംപിന്റെ ‘ഗോൾഡ് കാർഡ്’ (Gold Card) സ്ഥിരതാമസ പദ്ധതി യാഥാർത്ഥ്യമാകുന്നതിലേക്ക് ഒരു നിർണ്ണായക ചുവടുവയ്പ്പ് കൂടി. യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (USCIS) ‘ഗോൾഡ് കാർഡ് പ്രോഗ്രാമിനുള്ള ഇമിഗ്രന്റ് പെറ്റീഷൻ’ ആയ ഫോം I-140G യുടെ കരട് രൂപം പരിശോധനയ്ക്കായി ഓഫീസ് ഓഫ് മാനേaജ്മെന്റ് ആൻഡ് ബജറ്റിന് (OMB) സമർപ്പിച്ചു. ഇതോടെ ‘ഗോൾഡ് കാർഡ്’ ഉടമകൾക്ക് ഗ്രീൻ കാർഡ് (നിയമപരമായ സ്ഥിരതാമസം) നേടുന്നതിനുള്ള വഴി തുറന്നിരിക്കുകയാണ്.
2025 സെപ്തംബർ 19-ലെ എക്സിക്യൂട്ടീവ് ഓർഡർ 14351 പ്രകാരം സ്ഥാപിച്ച ഗോൾഡ് കാർഡ് പ്രോഗ്രാമിലൂടെ, വിദേശികൾക്ക് തൊഴിൽ അടിസ്ഥാനമാക്കിയുള്ള ഇമിഗ്രന്റ് വിസയ്ക്ക് അപേക്ഷിക്കാം. നിലവിലുള്ള ഗ്രീൻ കാർഡിന്റെ ഒരു നൂതന രൂപമാണ് ട്രംപ് കാർഡ് എന്ന് പ്രസിഡന്റ് ട്രംപ് ഇതിനെ വിശേഷിപ്പിച്ചിരുന്നു. ഈ പ്രക്രിയയുടെ ആദ്യപടിയാണ് ഫോം I-140G സമർപ്പിക്കുന്നത്.
ഗോൾഡ് കാർഡ് അപേക്ഷകർക്ക്, ഒരു വ്യക്തിക്ക് $15,000 ആണ് റീഫണ്ട് ചെയ്യാത്ത അപേക്ഷാ ഫീസ്. അപേക്ഷ അംഗീകരിക്കുകയും ആവശ്യപ്പെട്ട തൊഴിൽ അടിസ്ഥാനമാക്കിയുള്ള ക്ലാസിഫിക്കേഷനിൽ ഇമിഗ്രന്റ് വിസ നമ്പർ ലഭ്യമാവുകയും ചെയ്താൽ, വിദേശകാര്യ വകുപ്പുമായി (U.S. Department of State) കോൺസുലാർ പ്രോസസ്സിംഗ് പൂർത്തിയാക്കി ഇമിഗ്രന്റ് വിസ നേടി യുഎസിൽ നിയമപരമായ സ്ഥിരതാമസക്കാരായി (LPRs – ഗ്രീൻ കാർഡ് ഉടമകൾ) പ്രവേശിക്കാം. ഗോൾഡ് കാർഡ് അപേക്ഷകർക്ക് EB-1 അല്ലെങ്കിൽ EB-2 വിസ ഉടമകളെന്ന നിലയിലാണ് നിയമപരമായ സ്ഥിരതാമസം ലഭിക്കുക.
ഗോൾഡ് കാർഡ് ലഭിക്കുന്നതിനുള്ള പ്രധാന മാനദണ്ഡം യുഎസിനുള്ള സാമ്പത്തിക ‘സംഭാവന’യാണ്. വ്യക്തിഗതമായി അപേക്ഷിക്കുന്നയാൾ principal beneficiary, പങ്കാളി, ആശ്രിതരായ കുട്ടികൾ എന്നിവർക്ക് ഓരോരുത്തർക്കും $1 മില്യൺ വീതം സംഭാവന നൽകണം. ഒരു കോർപ്പറേഷനാണ് വ്യക്തിക്കായി അപേക്ഷിക്കുന്നതെങ്കിൽ, പ്രധാന അപേക്ഷകന് $2 മില്യൺ സംഭാവന നൽകേണ്ടിവരും. കൂടാതെ പങ്കാളി, കുട്ടികൾ എന്നിവർക്ക് ഓരോരുത്തർക്കും $1 മില്യൺ വീതം നൽകണം.
ഗോൾഡ് കാർഡ് ഉടമകൾക്ക് ഉടൻ യുഎസ് പൗരത്വം ലഭിക്കില്ല. പകരം, അവർക്ക് പൗരത്വത്തിലേക്കുള്ള ഒരു വഴിയായി ഇത് വർത്തിക്കും. നിയമപരമായ സ്ഥിരതാമസക്കാർക്ക് (ഗ്രീൻ കാർഡ് ഉടമകൾ) മാത്രമാണ് പൗരത്വം നേടുന്നതിനുള്ള ‘നാച്ചുറലൈസേഷൻ’ പ്രക്രിയയ്ക്ക് യോഗ്യതയുള്ളത്. ഗോൾഡ് കാർഡ് ലഭിക്കുന്നതോടെ അപേക്ഷകർക്ക് നിയമപരമായ സ്ഥിരതാമസ പദവി ലഭിക്കുമെന്നതിനാലാണ് അവർക്ക് പൗരത്വത്തിനായി പിന്നീട് അപേക്ഷിക്കാൻ കഴിയുന്നത്.
അതിസമ്പന്നരായ വിദേശികളെ ലക്ഷ്യമിട്ടുള്ള ഈ പദ്ധതിക്കായി, താൽപ്പര്യമുള്ളവർക്ക് trumpcard.gov എന്ന സർക്കാർ വെബ്സൈറ്റ് വഴി പ്രാഥമിക വിവരങ്ങൾ നൽകി അപേക്ഷിക്കാം. കൂടാതെ, $5 മില്യൺ വിലമതിക്കുന്ന ഒരു പുതിയ ട്രംപ് പ്ലാറ്റിനം കാർഡും പ്രഖ്യാപിച്ചിട്ടുണ്ട്. അപേക്ഷകന്റെ പേര്, പ്രദേശം, ഇമെയിൽ വിലാസം എന്നിവയാണ് വെബ്സൈറ്റിൽ പ്രാഥമികമായി നൽകേണ്ട വിവരങ്ങൾ.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Trump’s Gold Card: US Citizenship Services opens the way to obtain a green card
