ടൊറന്റോ: ഹാമിൽട്ടൺ നഗരത്തിൽ കള്ളനോട്ടുകളുടെ പ്രചരണം വർധിക്കുന്നതായി മുന്നറിയിപ്പ് നൽകി പൊലീസ്. കള്ളനോട്ടുകൾക്കെതിരെ പൊതുജനങ്ങൾക്കും വ്യാപാര സ്ഥാപനങ്ങൾക്കും ജാഗ്രതാ നിർദേശം നൽകിയിട്ടുണ്ട്.
പ്രചരിക്കുന്ന 20 ഡോളർ, 50 ഡോളർ, 100 ഡോളർ നോട്ടുകൾ നിലവിലെ പോളിമർ നോട്ടുകൾക്ക് സമാനമായി ഉയർന്ന നിലവാരത്തിലാണ് നിർമ്മിച്ചിട്ടുള്ളത്. എന്നിരുന്നാലും, യഥാർത്ഥ നോട്ടുകളിലുള്ള സുരക്ഷാ സവിശേഷതകൾ ഈ വ്യാജ നോട്ടുകളിൽ ഇല്ലെന്നാണ് അധികൃതരുടെ കണ്ടെത്തൽ. റീട്ടെയിൽ സ്ഥാപനങ്ങളിലും, ഓൺലൈൻ പ്ലാറ്റ്ഫോമുകൾ വഴിയുള്ള വ്യക്തിഗത ഇടപാടുകളിലുമാണ് ഈ കള്ളനോട്ടുകൾ കൂടുതലായി കൈമാറ്റം ചെയ്യപ്പെടുന്നത്.
വ്യാജനോട്ടുകൾ തിരിച്ചറിയാനുള്ള വഴികൾ
വ്യാജ നോട്ടുകളെ തിരിച്ചറിയുന്നതിനായി ഹാമിൽട്ടൺ പൊലീസ് ചില പ്രധാന ലക്ഷണങ്ങൾ ചൂണ്ടിക്കാട്ടുന്നു: നോട്ടുകളിൽ ഒരേ സീരിയൽ നമ്പർ ആവർത്തിച്ചു കാണുക. ഹോളോഗ്രാഫിക് സ്ട്രിപ്പിലോ നോട്ടിന്റെ മറ്റ് ഭാഗങ്ങളിലോ ‘Prop Money’, ‘For Motion Picture Use’ പോലുള്ള ലിഖിതങ്ങൾ ഉണ്ടോ എന്ന് പരിശോധിക്കുക. ഹോളോഗ്രാഫിക് സ്ട്രിപ്പ് ഒട്ടിച്ചു വെച്ച ഒരു സ്റ്റിക്കർ പോലെ തോന്നുന്നുണ്ടെങ്കിൽ അത് വ്യാജനാകാൻ സാധ്യതയുണ്ട്.പ്രിൻ്റ് മങ്ങുകയോ വ്യക്തത കുറയുകയോ ചെയ്തിട്ടുണ്ടോ എന്ന് പരിശോധിക്കുക.
പൊലീസിൻ്റെ നിർദ്ദേശങ്ങൾ
പണം കൈകാര്യം ചെയ്യുമ്പോൾ നോട്ടുകൾ ശ്രദ്ധാപൂർവം പരിശോധിക്കണമെന്നും, സംശയം തോന്നുന്നവ സ്വീകരിക്കാതിരിക്കണമെന്നും പൊലീസ് അറിയിച്ചു. വ്യാജ കറൻസിയാണെന്ന് സംശയം തോന്നുന്ന സാഹചര്യത്തിൽ ഉടൻ തന്നെ പൊലീസിനെ അറിയിക്കണം. എന്നാൽ, പണം നൽകുന്ന വ്യക്തിക്ക് അത് കള്ളനോട്ടാണെന്ന് അറിയണമെന്നില്ലാത്തതിനാൽ, സ്വയം അപകടത്തിലാക്കുന്ന നടപടികൾ ഒഴിവാക്കണമെന്നും അധികൃതർ മുന്നറിയിപ്പ് നൽകി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Police warning public about counterfeit currency in Hamilton
