വാഷിങ്ടൺ: അമേരിക്കൻ കുടിയേറ്റ നയങ്ങളിൽ കടുത്ത നിലപാടുകൾ സ്വീകരിച്ചിരുന്ന യുഎസ് പ്രസിഡന്റ് ഡൊണാൾഡ് ട്രംപ് വിദേശ വിദ്യാർത്ഥികളുടെ വിഷയത്തിൽ നിലപാട് തിരുത്തിയിരിക്കുന്നു. ‘മേക്ക് അമേരിക്ക ഗ്രേറ്റ് എഗെയ്ൻ’ (മാഗ) എന്ന സ്വന്തം അജണ്ടയിൽ നിന്ന് പിൻവലിഞ്ഞ ട്രംപ്, അമേരിക്കൻ സർവകലാശാലകളിൽ പഠിക്കാൻ വിദേശ വിദ്യാർത്ഥികളെ അനുവദിക്കണമെന്ന് ആവശ്യപ്പെട്ടു. രാജ്യത്തെ ഉന്നത വിദ്യാഭ്യാസ സമ്പ്രദായത്തെ സാമ്പത്തികമായി ശക്തമായി നിലനിർത്തുന്നതിൽ വിദേശ വിദ്യാർത്ഥികൾക്ക് നിർണായക പങ്കുണ്ടെന്നാണ് യുഎസ് പ്രസിഡന്റ് ഫോക്സ് ന്യൂസിനോട് സംസാരിക്കവെ അഭിപ്രായപ്പെട്ടത്.
ചൈനയിൽ നിന്നും മറ്റ് രാജ്യങ്ങളിൽ നിന്നുമുള്ള വിദ്യാർത്ഥികളുടെ എണ്ണത്തിൽ കുത്തനെ കുറവുണ്ടാകുന്നത് അമേരിക്കയിലെ പകുതിയോളം കോളേജുകളെ അടച്ചുപൂട്ടലിലേക്ക് നയിക്കുമെന്ന കണ്ടെത്തലിന്റെ അടിസ്ഥാനത്തിലാണ് ഈ വിഷയത്തിൽ ട്രംപ് മുൻ നിലപാടുകൾക്കെതിരെ വാദിച്ചത്.
ലോകത്തിന്റെ വിവിധ ഭാഗങ്ങളിൽ നിന്നും നമ്മുടെ രാജ്യത്തേക്ക് വരുന്ന പകുതിയോളം വിദ്യാർത്ഥികളെ ഒഴിവാക്കി നമ്മുടെ മുഴുവൻ സർവ്വകലാശാല-കോളേജ് സംവിധാനത്തെയും നശിപ്പിക്കാൻ നിങ്ങൾ ആഗ്രഹിക്കുന്നുണ്ടോ, ഇല്ലല്ലോ? എനിക്കും അത് ചെയ്യാൻ താത്പര്യമില്ല,” ട്രംപ് പറഞ്ഞു.
അന്താരാഷ്ട്ര വിദ്യാർത്ഥികളിൽ നിന്ന് കോടിക്കണക്കിന് ഡോളറാണ് രാജ്യത്തിന് ലഭിക്കുന്നതെന്നും, പല വിദേശ വിദ്യാർത്ഥികളും സ്വദേശീയരെക്കാൾ ഇരട്ടിയിലധികം പണം നൽകുന്നുണ്ടെന്നും അദ്ദേഹം ചൂണ്ടിക്കാട്ടി. ഇതിനെ ഒരു ബിസിനസ് കാഴ്ചപ്പാടായി കാണാനാണ് താൻ ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തു.
അന്താരാഷ്ട്ര വിദ്യാർത്ഥികളെ പ്രത്യേകമായി ലക്ഷ്യംവെച്ചുള്ള ട്രംപിന്റെ രണ്ടാം ഭരണകൂടത്തിന്റെ കുടിയേറ്റ നയങ്ങളിൽ നിന്ന് തികച്ചും വിഭിന്നമാണ് അദ്ദേഹത്തിന്റെ പുതിയ പരാമർശങ്ങൾ. ജനുവരിയിൽ അധികാരത്തിൽ വന്നതിന് ശേഷം, ആയിരക്കണക്കിന് വിസകൾ റദ്ദാക്കുകയും, പലസ്തീൻ അനുകൂല പ്രവർത്തനങ്ങളിൽ ഏർപ്പെട്ട വിദ്യാർത്ഥികളെ അറസ്റ്റ് ചെയ്യുകയും, അപേക്ഷാ നടപടികളിൽ കർശനമായ നിബന്ധനകൾ ഏർപ്പെടുത്തുകയും ചെയ്ത ചരിത്രം ട്രംപിനുണ്ട്. ഹാർവാർഡ്, സ്റ്റാൻഫോർഡ് തുടങ്ങിയ പ്രമുഖ സ്ഥാപനങ്ങളുമായുള്ള നിയമ പോരാട്ടങ്ങളും ഈ കാലയളവിൽ ഉണ്ടായി. സ്റ്റുഡന്റ് വിസകൾക്കുള്ള അഭിമുഖങ്ങൾ നിർത്തിവെക്കാനും പിന്നീട് അപേക്ഷകരുടെ സോഷ്യൽ മീഡിയ പ്രൊഫൈലുകളിൽ കൂടുതൽ കർശനമായ പരിശോധനകൾ ഏർപ്പെടുത്താനും ട്രംപ് ഭരണകൂടം ശ്രമിച്ചിരുന്നു.
എങ്കിലും, സാമ്പത്തിക ലാഭത്തിന്റെ പ്രാധാന്യം കണക്കിലെടുത്ത്, പ്രത്യേകിച്ച് ചൈനയിൽ നിന്നുള്ള വിദ്യാർത്ഥികളുടെ എണ്ണം കുറയ്ക്കുന്നത് ഉന്നത വിദ്യാഭ്യാസ സമ്പ്രദായത്തിന് വരുത്തുന്ന നഷ്ടം തിരിച്ചറിഞ്ഞാണ് ട്രംപിന്റെ ഈ മലക്കംമറിയൽ. ഇത് അമേരിക്കൻ വിദ്യാഭ്യാസ സ്ഥാപനങ്ങൾക്ക് ഒരു ആശ്വാസ വാർത്തയാകാൻ സാധ്യതയുണ്ട്. എന്നാൽ അദ്ദേഹത്തിന്റെ മുൻകാല കുടിയേറ്റ നിലപാടുകൾ പരിഗണിക്കുമ്പോൾ, ഈ മാറ്റം എത്രത്തോളം ദീർഘകാലാടിസ്ഥാനത്തിൽ നിലനിൽക്കുമെന്നും വരാനിരിക്കുന്ന തിരഞ്ഞെടുപ്പിൽ ഇതിന്റെ സ്വാധീനം എന്തായിരിക്കുമെന്നും കണ്ടറിയേണ്ടതുണ്ട്.
