ദുൽഖർ സൽമാനെ നായകനാക്കി സെൽവമണി സെൽവരാജ് തിരക്കഥയും സംവിധാനവും നിർവഹിക്കുന്ന ‘കാന്ത’യുടെ ട്രെയിലർ പ്രേക്ഷക ശ്രദ്ധ നേടി മുന്നേറുകയാണ്. പ്രഖ്യാപനം മുതൽക്കേ ഏറെ ആകാംഷയോടെ കാത്തിരുന്ന ചിത്രമാണിത്. ദുൽഖർ സൽമാൻ്റെ ഉടമസ്ഥതയിലുള്ള വേഫേറർ ഫിലിംസും റാണ ദഗ്ഗുബതിയുടെ സ്പിരിറ്റ് മീഡിയയും ചേർന്നാണ് ഈ ബിഗ് ബഡ്ജറ്റ് ചിത്രം നിർമ്മിച്ചിരിക്കുന്നത്. ‘ദ ഹണ്ട് ഫോർ വീരപ്പൻ’ എന്ന നെറ്റ്ഫ്ലിക്സ് ഡോക്യുമെന്ററി സീരീസിലൂടെ ശ്രദ്ധേയനായ തമിഴ് സംവിധായകൻ സെൽവമണി സെൽവരാജിന്റെ ചലച്ചിത്ര ലോകത്തേക്കുള്ള വരവ് കൂടിയാണ് ‘കാന്ത’.
ട്രെയിലർ നൽകുന്ന സൂചനകൾ അനുസരിച്ച്, ഒരു സിനിമയ്ക്കുള്ളിലെ സിനിമയുടെ കഥയാണ് ‘കാന്ത’ പറയുന്നത്. താരത്തിൻ്റെ പതിവ് നായക സങ്കൽപ്പങ്ങളിൽ നിന്നും വ്യത്യസ്തമായി, വില്ലൻ ഭാവങ്ങളുള്ള ഒരു കഥാപാത്രമായാണ് ദുൽഖർ സൽമാൻ ഈ ചിത്രത്തിൽ എത്തുന്നത്. കൂടാതെ, റാണ ദഗ്ഗുബതി പോലീസ് വേഷത്തിൽ എത്തുന്നു എന്നതും ട്രെയിലറിലെ പ്രധാന ആകർഷണമാണ്. രണ്ട് വലിയ കലാകാരന്മാർക്കിടയിൽ സംഭവിക്കുന്ന ഈഗോ, പ്രണയം, കല, വൈകാരികത എന്നിവയെ ചുറ്റിപ്പറ്റിയുള്ള ഒരു വമ്പൻ പ്രശ്നമാണ് ചിത്രത്തിന്റെ കാതലെന്നാണ് അണിയറപ്രവർത്തകർ നൽകുന്ന വിവരങ്ങൾ. 1950-കളിലെ മദ്രാസാണ് ചിത്രത്തിന്റെ പ്രധാന പശ്ചാത്തലം.
മലയാളത്തിൽ ഒട്ടേറെ മികച്ച സിനിമകൾ നിർമ്മിച്ചിട്ടുള്ള വേഫേറർ ഫിലിംസിന്റെ ആദ്യ അന്യഭാഷാ നിർമ്മാണ സംരംഭം കൂടിയാണ് തമിഴിൽ ഒരുക്കിയ ‘കാന്ത’. തമിഴ് കൂടാതെ തെലുങ്ക്, ഹിന്ദി എന്നീ ഭാഷകളിലും ചിത്രം റിലീസ് ചെയ്യും. അടുത്തിടെ ബ്ലോക്ക്ബസ്റ്റർ വിജയം നേടിയ തെലുങ്ക് ചിത്രം ലക്കി ഭാസ്കറിന് ശേഷം ദുൽഖർ സൽമാൻ നായകനായി എത്തുന്ന ചിത്രം കൂടിയാണ് ‘കാന്ത’. ആകർഷകമായ ദൃശ്യങ്ങളും, അഭിനേതാക്കളുടെ പ്രകടന സാധ്യതകളും ട്രെയിലറിൽ വ്യക്തമാണ്.
നവംബർ 14-ന് ലോകമെമ്പാടുമുള്ള തിയേറ്ററുകളിൽ ‘കാന്ത’ റിലീസിനെത്തും. ട്രെയിലറിന് ലഭിക്കുന്ന ഗംഭീര വരവേൽപ്പ് സൂചിപ്പിക്കുന്നത് പോലെ, പ്രേക്ഷകരെ മുൾമുനയിൽ നിർത്തുന്ന ഒരു ത്രില്ലർ വിരുന്ന് തന്നെയാകും ഈ ദുൽഖർ ചിത്രം സമ്മാനിക്കുക.
