ഒട്ടാവ: പിസ്ത ഉൽപ്പന്നങ്ങളിൽ സാൽമൊണല്ല ബാധയേൽക്കാൻ സാധ്യതയുണ്ടെന്ന മുന്നറിയിപ്പിനെ തുടർന്ന് ഒട്ടാവ, എഡ്മന്റൺ എന്നിവിടങ്ങളിൽ കൂടുതൽ ഉൽപ്പന്നങ്ങൾ വിപണിയിൽ നിന്ന് തിരിച്ചുവിളിച്ചു. കനേഡിയൻ ഫുഡ് ഇൻസ്പെക്ഷൻ ഏജൻസി (CFIA) വെള്ളിയാഴ്ച രാത്രി പുറത്തിറക്കിയ അറിയിപ്പ് പ്രകാരം ഏഴ് ഉൽപ്പന്നങ്ങൾ കൂടിയാണ് തിരിച്ചുവിളിച്ചത്. നിലവിലുള്ള സാൽമൊണല്ല ബാധയുമായി ബന്ധപ്പെട്ടാണ് ഈ നടപടി. ഈ ഉൽപ്പന്നങ്ങൾ ഓൺലൈൻ വഴിയും ഒട്ടാവയിലെയും എഡ്മന്റണിലെയും കടകൾ വഴിയും വിറ്റഴിച്ചിരുന്നു.
കാനഡയിലെ പൊതുജനാരോഗ്യ ഏജൻസിയുടെ (PHAC) ഏറ്റവും പുതിയ കണക്കുകൾ പ്രകാരം, ഇതുവരെ 117 പേർക്ക് സാൽമൊണല്ല ബാധ സ്ഥിരീകരിക്കുകയും 17 പേരെ ആശുപത്രിയിൽ പ്രവേശിപ്പിക്കുകയും ചെയ്തിട്ടുണ്ട്. ഒരാഴ്ചക്കുള്ളിൽ ആശുപത്രിയിൽ പ്രവേശിപ്പിച്ചവരുടെ എണ്ണത്തിൽ ഒന്ന് വർദ്ധിക്കുകയും 12 പേർക്ക് പുതുതായി രോഗം സ്ഥിരീകരിക്കുകയും ചെയ്തു. രോഗബാധിതരിൽ ഭൂരിഭാഗവും ഒന്റാരിയോ, ക്യുബെക്ക് പ്രവിശ്യകളിലാണ്. സ്ഥിരീകരിച്ച കേസുകൾ മാത്രമാണ് ഈ കണക്കുകളിലുള്ളതെന്നും, റിപ്പോർട്ട് ചെയ്യപ്പെടാത്ത കേസുകൾ ഇതിലും കൂടുതലായിരിക്കാൻ സാധ്യതയുണ്ടെന്നും ഏജൻസി മുന്നറിയിപ്പ് നൽകി.
തിരിച്ചുവിളിച്ച ഉൽപ്പന്നങ്ങൾ ലഭിച്ചവർ ഉടൻ തന്നെ അവ ഉപേക്ഷിക്കുകയോ അല്ലെങ്കിൽ വാങ്ങിയ സ്ഥലങ്ങളിൽ തിരികെ ഏൽപ്പിക്കുകയോ ചെയ്യണമെന്ന് CFIA അറിയിച്ചു. ഒട്ടാവയിലെ ഐറിസ് സ്ട്രീറ്റിലെ സായിദ് നട്സ് (Saaid Nuts) എന്ന സ്ഥാപനത്തിൽ ജൂൺ 18 നും ഒക്ടോബർ 30 നും ഇടയിൽ വിറ്റഴിച്ചവയിൽ ഉൾപ്പെടുന്നവ: റോസ്റ്റഡ് പിസ്ത സോർ ലെമൺ സാൾട്ടഡ്, റോസ്റ്റഡ് പിസ്ത സാൾട്ടഡ്, റോസ്റ്റഡ് പിസ്ത സോർ ലെമൺ എന്നിവയാണ്. എഡ്മന്റണിലെ ഫ്രഷ് നട്സ് (Fresh Nuts) എന്ന സ്ഥാപനത്തിൽ ഏപ്രിൽ 8 നും ഒക്ടോബർ 29 നും ഇടയിൽ വിറ്റഴിച്ചവയിൽ റോസ്റ്റഡ് പിസ്ത ബാർബിക്യൂ, റോസ്റ്റഡ് പിസ്ത സാൾട്ടി, റോസ്റ്റഡ് പിസ്ത ലെമൺ, റോസ്റ്റഡ് പിസ്ത സാഫ്രൺ എന്നിവയും ഉൾപ്പെടുന്നു.
സാംക്രമിക രോഗഭീഷണി രൂക്ഷമായതിനെത്തുടർന്ന്, സെപ്റ്റംബർ അവസാനത്തോടെ ഇറാനിൽ നിന്ന് ഇറക്കുമതി ചെയ്യുന്ന പിസ്തയ്ക്കും പിസ്ത ഉൽപ്പന്നങ്ങൾക്കും CFIA മുൻകരുതൽ എന്ന നിലയിൽ നിരോധനം ഏർപ്പെടുത്തിയിരുന്നു. അന്വേഷണത്തിന്റെ കൂടുതൽ വിവരങ്ങളും ആരോഗ്യ സംരക്ഷണത്തിനുള്ള മാർഗ്ഗനിർദ്ദേശങ്ങളും PHAC യുടെ വെബ്സൈറ്റിൽ ലഭ്യമാണ്. തിരിച്ചുവിളിച്ച ഉൽപ്പന്നങ്ങളുടെ പൂർണ്ണമായ പട്ടിക CFIA യുടെ വെബ്സൈറ്റിൽ അപ്ഡേറ്റ് ചെയ്യുന്നുമുണ്ട്.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Pistachio eaters beware: 7 more products recalled in Canada; Salmonella threat behind it
