സൂസൻ ഹോൾട്ടിൻ്റെ വാഗ്ദാനം നടപ്പിൽ; ന്യൂ ബ്രൺസ്‌വിക്കിൽ പെട്രോൾ വില ഉടൻ കുറയും

ഫ്രെഡറിക്‌ടൺ: ന്യൂ ബ്രൺസ്‌വിക്കിലെ ലിബറൽ സർക്കാർ പ്രഖ്യാപിച്ച കാർബൺ നികുതി ഇളവ് വഴി ഇന്ധനവില ലിറ്ററിന് ഏകദേശം 8 സെൻ്റ് കുറയും. ഈ വർഷം ഡിസംബർ ഒന്നിന് ഈ തീരുമാനം പ്രാബല്യത്തിൽ വരും. കഴിഞ്ഞ തിരഞ്ഞെടുപ്പ് പ്രചാരണ വേളയിൽ പ്രീമിയർ സൂസൻ ഹോൾട്ട് നൽകിയ പ്രധാന വാഗ്ദാനങ്ങളിലൊന്നാണ് ഇപ്പോൾ നടപ്പിലാക്കുന്നത്. 2022-ൽ കൊണ്ടുവന്ന ‘കാർബൺ അഡ്ജസ്റ്റർ ടാക്സ്’ എന്ന നികുതി പൂർണ്ണമായി ഒഴിവാക്കും. ഇന്ധനം ശുദ്ധീകരിക്കാൻ കമ്പനികൾക്ക് വരുന്ന അധികച്ചെലവാണ് ഈ നികുതിയായി ഈടാക്കിയിരുന്നത്. ഇത് ഒഴിവാക്കുന്നതോടെ, ആഴ്ചയിൽ ഒരു തവണ വണ്ടിയിൽ പെട്രോൾ അടിക്കുന്ന ഒരു സാധാരണ കുടുംബത്തിന് വർഷംതോറും $150 മുതൽ $200 വരെ (ഏകദേശം ₹9,000 മുതൽ ₹12,000 വരെ) ലാഭിക്കാൻ കഴിയുമെന്നാണ് സർക്കാർ പറയുന്നത്. ഉയർന്ന ജീവിതച്ചെലവിൽ വലയുന്ന ജനങ്ങൾക്ക് ഈ തീരുമാനം വലിയൊരു ആശ്വാസമാവുമെന്നും സർക്കാർ വിലയിരുത്തുന്നു.

ഈ നികുതി ഒഴിവാക്കുന്നതിന് മുന്നോടിയായി റീട്ടെയിലർമാർ, മൊത്തവ്യാപാരികൾ, പൊതുജനങ്ങൾ എന്നിവരുമായി വിശദമായ ചർച്ചകൾ നടത്തിയതായി പ്രകൃതി വിഭവ വകുപ്പ് മന്ത്രി ജോൺ ഹെറോൺ അറിയിച്ചു. എന്നാൽ ഈ നടപടി ചെറുകിട ഗ്രാമീണ പെട്രോൾ സ്റ്റേഷനുകൾക്ക് തിരിച്ചടിയായേക്കാം എന്ന ആശങ്ക അദ്ദേഹം പങ്കുവെച്ചു. നഗരങ്ങളിലെ സ്റ്റേഷനുകളേക്കാൾ വരുമാനം കുറവായതിനാൽ, നികുതി കുറയ്ക്കുന്നതിലൂടെയുണ്ടാകുന്ന ആഘാതം അവർക്ക് താങ്ങാൻ കഴിഞ്ഞെന്ന് വരില്ല. എന്നാൽ, ഉപഭോക്താക്കളെ സംരക്ഷിക്കാനും വ്യാപാരികളുടെ ആവശ്യങ്ങൾ നിറവേറ്റാനുമുള്ള സംവിധാനങ്ങൾ പ്രവിശ്യയിലെ ഊർജ്ജ റെഗുലേറ്റർക്കുണ്ടെന്നും മന്ത്രി കൂട്ടിച്ചേർത്തു.

അതേസമയം, സർക്കാരിൻ്റെ ഈ നീക്കം ചെറുകിട ബിസിനസ്സുകളെയും ഗ്യാസ് സ്റ്റേഷനുകളെയും അപകടത്തിലാക്കുമെന്ന് പ്രോഗ്രസ്സീവ് കൺസർവേറ്റീവ് നേതാവ് ഗ്ലെൻ സാവോയി വിമർശിച്ചു. ഈ കുറവ് വഴി ചെലവ് തിരിച്ചുപിടിക്കാൻ കഴിയാതെ വന്നാൽ, സ്റ്റേഷനുകൾ അടച്ചുപൂട്ടേണ്ടി വരും. അങ്ങനെ സംഭവിച്ചാൽ ഇന്ധനം തേടി ജനങ്ങൾക്ക് കൂടുതൽ ദൂരം സഞ്ചരിക്കേണ്ടി വരുമെന്നും, അത് കൂടുതൽ പണച്ചെലവിന് കാരണമാകുമെന്നും അദ്ദേഹം ചൂണ്ടിക്കാട്ടി. ഈ തീരുമാനം സർക്കാർ അവകാശപ്പെടുന്നതുപോലെ ജനങ്ങളെ സഹായിക്കില്ലെന്നും അദ്ദേഹം കൂട്ടിച്ചേർത്തു. ജനങ്ങൾക്ക് ലാഭമുണ്ടാക്കാനുള്ള സർക്കാരിൻ്റെ നീക്കം എങ്ങനെയാണ് യാഥാർത്ഥ്യത്തിൽ ഉപകരിക്കുക എന്ന കാര്യത്തിൽ വ്യക്തത വരാൻ ഡിസംബർ ഒന്ന് വരെ കാത്തിരിക്കേണ്ടതുണ്ട്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Susan Holt's promise is being fulfilled; petrol prices will soon be reduced in New Brunswick