ഒന്റാരിയോ; പ്രവിശ്യയിൽ മഴയെത്തുമെങ്കിലും അതിനു കാരണം നിലവിൽ ദുർബലമായിക്കൊണ്ടിരിക്കുന്ന ‘മെലിസ’ ചുഴലിക്കാറ്റല്ല. ബുധനാഴ്ച ഒന്റാരിയോയുടെ മിക്ക ഭാഗങ്ങളിലും നല്ല വെയിലായിരുന്നെങ്കിലും, നാളെ, വ്യാഴാഴ്ച (ഒക്ടോബർ 30) മുതൽ മഴ പെയ്യാൻ സാധ്യതയുണ്ട്.
എന്നാൽ ഈ മഴയ്ക്ക് കാരണം ടെക്സാസിൽ രൂപം കൊണ്ട ഒരു ന്യൂനമർദ്ദമാണ് (low pressure system). ഇത് വടക്കോട്ട് ഒന്റാരിയോയിലേക്ക് നീങ്ങിക്കൊണ്ടിരിക്കുകയാണെന്ന് Environment and Climate Change Canada-യിലെ കാലാവസ്ഥാ നിരീക്ഷകനായ സ്റ്റീവൻ ഫ്ലിസ്ഫെഡർ അറിയിച്ചു. ചില കാലാവസ്ഥാ പ്രവചകർ മെലിസയുടെ സ്വാധീനം ഒന്റാരിയോയിൽ ഉണ്ടാകുമെന്ന് സൂചിപ്പിച്ചിരുന്നു. എന്നാൽ ന്യൂനമർദ്ദവും മെലിസ ചുഴലിക്കാറ്റും തമ്മിൽ നേരിയ ഇടപെടൽ മാത്രമേ ഉണ്ടാകൂ. അത് മഴയുടെ അളവിൽ കാര്യമായ വർദ്ധനവ് വരുത്താൻ സാധ്യതയില്ലെന്നും, മഴയുടെ പ്രധാന കാരണം ന്യൂനമർദ്ദം മാത്രമാണെന്നും ഫ്ലിസ്ഫെഡർ വ്യക്തമാക്കുന്നു.
കാറ്റഗറി 5 ചുഴലിക്കാറ്റായി ജമൈക്കയിൽ ആഞ്ഞടിച്ച ശേഷം ദുർബലമായ മെലിസ, ഇപ്പോൾ ക്യൂബയും കടന്ന് അറ്റ്ലാന്റിക് സമുദ്രത്തിലൂടെ നീങ്ങുകയാണ്. ഈ ചുഴലിക്കാറ്റ് കാനഡയുടെ തീരങ്ങളിൽ എത്താൻ സാധ്യതയില്ല. ഇതിന്റെ ഈർപ്പം പ്രധാനമായും കിഴക്കൻ കാനഡയിലും (മാരിടൈംസ് പ്രവിശ്യകളും ക്യുബെക്കിന്റെ ചില ഭാഗങ്ങളും) മാത്രമേ കാര്യമായി ബാധിക്കാൻ സാധ്യതയുള്ളൂ, ഒന്റാരിയോയെ കാര്യമായി ബാധിക്കില്ല.
അതേസമയം, ഒക്ടോബർ 31-ന് ഹാലോവീൻ ആഘോഷത്തിനായി കുട്ടികൾ ‘ട്രീറ്റ് ഓർ ട്രിക്ക്’ ചെയ്യാൻ ഇറങ്ങുമ്പോൾ മഴയുണ്ടാകുമോ എന്നത് ഒന്റാരിയോയിലെ സ്ഥലങ്ങൾക്കനുസരിച്ച് വ്യത്യാസപ്പെടും. വൈകുന്നേരം ഏകദേശം 6:30-ഓടെ, തെക്ക്-പടിഞ്ഞാറൻ ഒന്റാരിയോയിലും മധ്യ ഒന്റാരിയോയുടെ മിക്ക ഭാഗങ്ങളിലും മഴ മാറും എന്നാണ് കണക്കാക്കുന്നത്. എന്നാൽ ബ്രേസ്ബ്രിഡ്ജ് മുതൽ കോബർഗ് വരെയുള്ള കിഴക്കൻ ഭാഗങ്ങളിലും ജോർജിയൻ ബേയുടെ തെക്കൻ പ്രദേശങ്ങളിലും അപ്പോഴും മഴ തുടരാൻ സാധ്യതയുണ്ട്.
കൃത്യമായ വിവരങ്ങൾക്കും ഏറ്റവും പുതിയ അപ്ഡേറ്റുകൾക്കുമായി കനേഡിയൻ ഗവൺമെന്റിന്റെ ഔദ്യോഗിക കാലാവസ്ഥാ വെബ്സൈറ്റായ weather.gc.ca സന്ദർശിക്കുകയോ ‘WeatherCAN’ ആപ്പ് ഉപയോഗിക്കുകയോ ചെയ്യാവുന്നതാണ്.
ontario-rain-warning-melissa-hurricane-threat-latest-weather-updates
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
