പ്രശസ്ത പഞ്ചാബി ഗായകൻ തേജി കഹ്ലോണിന് കാനഡയിൽ വെടിയേറ്റു. കുപ്രസിദ്ധ ഗുണ്ടാത്തലവൻ രോഹിത് ഗോദാരയുടെ സംഘമാണ് ആക്രമണത്തിന് പിന്നിലെന്ന് അവകാശപ്പെട്ട് ഭീഷണിയുമായി രംഗത്തെത്തി.
കഹ്ലോണിനെതിരായ ആക്രമണത്തിന്റെ ഉത്തരവാദിത്തം ഏറ്റെടുത്തുകൊണ്ട്, മഹേന്ദർ സരൺ ദിലാന, രാഹുൽ റിനൗ, വിക്കി ഫൽവാൻ എന്നിവരടങ്ങുന്ന ഗോദാര സംഘാംഗങ്ങൾ സമൂഹമാധ്യമങ്ങളിൽ പോസ്റ്റ് ഇട്ടു. എതിരാളികൾക്ക് ആയുധങ്ങളും പണവും നൽകുന്നു എന്നും, തങ്ങൾക്കെതിരെ ഒറ്റുകാരനായി (‘മുഖ്ബിരി’) പ്രവർത്തിക്കുന്നു എന്നും ആരോപിച്ചാണ് ആക്രമണം നടത്തിയതെന്നും ഇവർ വ്യക്തമാക്കി.
പോസ്റ്റിലെ ഭീഷണി ഇങ്ങനെ:
“തേജി കഹ്ലോനെതിരേ കാനഡയിൽ വെടിവെപ്പ് നടത്തിയത് ഞങ്ങളാണ്. അദ്ദേഹത്തിന്റെ വയറ്റിലാണ് വെടിയേറ്റത്. ഇതുകൊണ്ട് അയാൾ കാര്യങ്ങൾ മനസ്സിലാക്കിയെങ്കിൽ നല്ലത്. ഇല്ലെങ്കിൽ അടുത്ത തവണ ഞങ്ങൾ അയാളെ തീർക്കും.”
ബിസിനസുകാർക്കും മുന്നറിയിപ്പ്:
ഗായകനെ ആക്രമിച്ച ശേഷം, ഗോദാര സംഘം ബിസിനസുകാർ, ബിൽഡർമാർ, ഹവാലാ ഇടപാടുകാർ എന്നിവരുൾപ്പെടെയുള്ള പൊതുജനങ്ങൾക്കും മുന്നറിയിപ്പ് നൽകി. “ആരെങ്കിലും, അറിയാതെയാണെങ്കിൽ പോലും, ഞങ്ങളുടെ ശത്രുക്കളെ സഹായിക്കുകയോ പിന്തുണയ്ക്കുകയോ ചെയ്താൽ, അവരുടെ കുടുംബങ്ങളെ പോലും ഞങ്ങൾ വെറുതെ വിടില്ല, അവരെ ഞങ്ങൾ നശിപ്പിക്കും. ഇതൊരു തുടക്കം മാത്രമാണ്, അടുത്തത് എന്താണെന്ന് കാത്തിരുന്ന് കാണുക,” എന്നായിരുന്നു ഭീഷണി.
ദേശീയ അന്വേഷണ ഏജൻസി (NIA) തിരയുന്ന ഗുണ്ടാത്തലവന്മാരാണ് രോഹിത് ഗോദാരയും ഗോൾഡി ബ്രാറും. നേരത്തെ അമേരിക്കയിൽ വെച്ച് ലോറൻസ് ബിഷ്ണോയിയുടെ അടുത്ത അനുയായിയായ ഹരി ബോക്സറിന് വെടിയേറ്റ സംഭവത്തിലും ഗോദാര സംഘം ഉത്തരവാദിത്തം ഏറ്റെടുത്തിരുന്നു.
കാനഡയിലും യുഎസിലും ഇന്ത്യൻ ഗുണ്ടാസംഘങ്ങൾ തമ്മിലുള്ള ആക്രമണങ്ങൾ വർധിക്കുന്ന പശ്ചാത്തലത്തിൽ, ഈ സംഭവം പഞ്ചാബി സമൂഹത്തിൽ ആശങ്ക വർദ്ധിപ്പിച്ചിട്ടുണ്ട്. കനേഡിയൻ പോലീസ് സംഭവത്തിൽ അന്വേഷണം ആരംഭിച്ചു.
🍁 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Punjabi Singer Shot By Rohit Godara Gang In Canada, Then A Warning To Rivals
