ഒട്ടാവ: അടുത്ത മാസം നാലാം തീയതി അവതരിപ്പിക്കാനിരിക്കുന്ന ഫെഡറൽ ബജറ്റിന് മുന്നോടിയായി, കാനഡയുടെ ധനകാര്യസ്ഥിതി കൂടുതൽ കടുത്ത പ്രതിസന്ധിയിലേക്കാണ് നീങ്ങുന്നതെന്ന് പുതിയ വിശകലനം വ്യക്തമാക്കുന്നു. യുഎസ് താരിഫുകൾക്കെതിരായ പ്രതികാര താരിഫുകൾ ഒഴിവാക്കാനുള്ള ഒട്ടാവയുടെ നീക്കവും, വ്യക്തിഗത ആദായനികുതി ഇളവുകളും സർക്കാർ വരുമാനത്തിൽ തിരിച്ചടിയുണ്ടാക്കുമെന്ന് ഡെസ്ജാർഡിൻസ് റിപ്പോർട്ട് മുന്നറിയിപ്പു നൽകുന്നു. ഡെസ്ജാർഡിൻസിന്റെ ഡെപ്യൂട്ടി ചീഫ് ഇക്കണോമിസ്റ്റ് റാൻഡൽ ബാർട്ട്ലെറ്റ് റിപ്പോർട്ടിൽ ചൂണ്ടിക്കാട്ടുന്നത്, സാമ്പത്തിക മാന്ദ്യമോ മഹാമാരിയോ ഇല്ലാത്ത സാഹചര്യത്തിൽ കാനഡ നേരിടാനിരിക്കുന്നതാണ് ഏറ്റവും വലിയ ഫെഡറൽ ധനക്കമ്മിയെന്ന്.
നിലവിലെ സാമ്പത്തിക വർഷത്തിൽ 74.5 ബില്യൺ ഡോളർ എന്ന നിലയിലേക്ക് ധനക്കമ്മി ഉയരുമെന്നാണ് കണക്കാക്കുന്നത്. ഇത് പാർലമെന്ററി ബജറ്റ് ഓഫീസറുടെ പ്രവചനത്തേക്കാൾ ഏകദേശം 6 ബില്യൺ ഡോളർ കൂടുതലാണ്. പ്രതിരോധം, അടിസ്ഥാന സൗകര്യ വികസനം എന്നിവയ്ക്കായുള്ള വർധിച്ച ചെലവുകളാണ് ഈ വർഷം ഫെഡറൽ സർക്കാരിൻ്റെ കമ്മി ഉയർത്തുന്ന ഒരു പ്രധാന ഘടകം. ഇതിനു പുറമെ, വേനൽക്കാലത്ത് നടപ്പിലാക്കിയ ആദായനികുതി വെട്ടിച്ചുരുക്കലും അമേരിക്കൻ താരിഫുകൾക്കെതിരായ പ്രതിരോധ താരിഫുകൾ ഒഴിവാക്കിയതുമാണ് ധനസ്ഥിതി മോശമാക്കിയ മറ്റു കാരണങ്ങൾ.
നികുതിയിളവുകളും താരിഫ് ഒഴിവാക്കലുകളും രാജ്യത്തിന്റെ സാമ്പത്തിക വളർച്ചയെ ഉത്തേജിപ്പിക്കുമെങ്കിലും, അതുവഴിയുണ്ടാകുന്ന വരുമാന വർദ്ധനവ് നികുതി വരുമാനത്തിലെ കുറവിനെ മറികടക്കാൻ പര്യാപ്തമാകില്ലെന്നാണ് ഡെസ്ജാർഡിൻസ് വിലയിരുത്തുന്നത്. അമേരിക്കയുമായുള്ള വ്യാപാരത്തിലെ അനിശ്ചിതത്വം കാനഡയുടെ കടബാധ്യതയിൽ കൂടുതൽ സമ്മർദ്ദമുണ്ടാക്കാൻ സാധ്യതയുണ്ടെന്നും അതിനാൽ, രാജ്യത്തിന്റെ ശക്തമായ ആഗോള ക്രെഡിറ്റ് റേറ്റിംഗ് നിസ്സാരമായി കാണരുതെന്നും ബാർട്ട്ലെറ്റ് മുന്നറിയിപ്പ് നൽകുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
American ‘tariff cuts’ backfire: Ottawa’s financial situation will worsen, Desjardins report
