ഒട്ടാവ: കനേഡിയൻ സൈന്യത്തിൻ്റെ റിക്രൂട്ട്മെൻ്റ്, പരിശീലനം, സൈനികർക്കുള്ള ഭവന സൗകര്യങ്ങൾ എന്നിവ രാജ്യത്തിൻ്റെ ആവശ്യകതകൾ നിറവേറ്റുന്നതിൽ പരാജയപ്പെട്ടതായി ഓഡിറ്റർ ജനറൽ കാരെൻ ഹോർഗൻ പാർലമെൻ്റിൽ സമർപ്പിച്ച പുതിയ റിപ്പോർട്ടുകൾ പറയുന്നു. ലക്ഷക്കണക്കിന് അപേക്ഷകർ എത്തുന്നുണ്ടെങ്കിലും, പരിശീലന ശേഷിയിലെ കുറവും റിക്രൂട്ട്മെൻ്റ് നടപടികളിലെ കാലതാമസവും കാരണം സൈന്യത്തിന് വേണ്ടത്ര അംഗങ്ങളെ കണ്ടെത്താൻ കഴിയുന്നില്ലെന്ന് ഓഡിറ്റ് കണ്ടെത്തി.
2022 നും 2025 നും ഇടയിൽ 19,700-ൽ അധികം പുതിയ അംഗങ്ങളെ റിക്രൂട്ട് ചെയ്യാൻ CAF പദ്ധതിയിട്ടെങ്കിലും, 1,92,000 പേർ അപേക്ഷിച്ചതിൽ നിന്ന് ഏകദേശം 15,000 പേരെ മാത്രമാണ് റിക്രൂട്ട് ചെയ്തത്. റിക്രൂട്ട്മെൻ്റ് പ്രക്രിയ പൂർത്തിയാക്കാതെ ആയിരക്കണക്കിന് പേർ എന്തുകൊണ്ടാണ് പിന്മാറുന്നതെന്ന് സൈന്യം കൃത്യമായി രേഖപ്പെടുത്തുന്നില്ലെന്ന് ഓഡിറ്റ് റിപ്പോർട്ടിൽ പറയുന്നു.
100 മുതൽ 150 ദിവസങ്ങൾക്കുള്ളിൽ റിക്രൂട്ട്മെൻ്റ് പൂർത്തിയാക്കാൻ ലക്ഷ്യമിട്ടിരുന്നെങ്കിലും, പലപ്പോഴും അതിൻ്റെ ഇരട്ടി സമയം എടുക്കുന്നുണ്ട്. മാത്രമല്ല, റിക്രൂട്ട്മെൻ്റ് ലക്ഷ്യം കൈവരിച്ചാൽ പോലും, ആവശ്യമായ ഉദ്യോഗാർത്ഥികളെ പരിശീലിപ്പിക്കാൻ അടിസ്ഥാന പരിശീലന ശേഷി സൈന്യത്തിനില്ല. പൈലറ്റുമാർ, വെടിക്കോപ്പ് ടെക്നീഷ്യൻമാർ തുടങ്ങിയ സുപ്രധാന തസ്തികകളിൽ വൈദഗ്ധ്യമുള്ള അംഗങ്ങളെ ആകർഷിക്കാനും പരിശീലിപ്പിക്കാനും സൈന്യം വിഷമിക്കുന്നുണ്ടെന്നും റിപ്പോർട്ട് ചൂണ്ടിക്കാട്ടുന്നു. നിലവിൽ അംഗീകൃത എണ്ണം 71,500 റെഗുലർ സേനാംഗങ്ങളും 30,000 റിസർവ് അംഗങ്ങളുമാണെങ്കിലും, ഏപ്രിൽ വരെ യഥാക്രമം 65,154, 23,561 അംഗങ്ങൾ മാത്രമാണ് CAF-ൽ ഉണ്ടായിരുന്നത്.
സൈനികരെ ആകർഷിക്കുന്നതിനും നിലനിർത്തുന്നതിനും വേണ്ടി പ്രധാനമന്ത്രി മാർക്ക് കാർണി ഈ വേനൽക്കാലത്ത് ശമ്പള വർദ്ധനവും എൻട്രി ലെവൽ ശമ്പള വർദ്ധനവും പ്രഖ്യാപിച്ചിരുന്നു. NATO ലക്ഷ്യമായ 2% പ്രതിരോധ ചെലവിനടുത്ത് എത്താനുള്ള ലിബറൽ സർക്കാരിൻ്റെ 9.3 ബില്യൺ ഡോളറിൻ്റെ പുതിയ സൈനിക നിക്ഷേപത്തിൻ്റെ ഭാഗമാണിത്. എന്നിരുന്നാലും, ഈ പരിഷ്കാരങ്ങളുടെ ഫലം അളക്കാൻ ഓഡിറ്റ് ടീമിന് കഴിഞ്ഞില്ല. നിലവിലെ പ്രശ്നങ്ങൾ പരിഹരിക്കപ്പെടാത്തിടത്തോളം, ഭീഷണികളെ നേരിടാനും ദൗത്യങ്ങൾ പൂർത്തിയാക്കാനുമുള്ള സൈന്യത്തിൻ്റെ കഴിവിനെ ഇത് ബാധിക്കുമെന്ന് ഓഡിറ്റർ ഹോർഗൻ അഭിപ്രായപ്പെട്ടു.
സൈനികരുടെ മനോവീര്യത്തിനും ക്ഷേമത്തിനും നിർണായകമായ ഭവന സൗകര്യങ്ങൾ ഒരുക്കുന്നതിലും ദേശീയ പ്രതിരോധ വകുപ്പ് (DND) പരാജയപ്പെട്ടതായി രണ്ടാമത്തെ റിപ്പോർട്ട് വെളിപ്പെടുത്തുന്നു. എസ്ക്വിമാൾട്ട് (ബി.സി.), ഗേജ് ടൗൺ (എൻ.ബി.), ട്രെൻ്റൺ(ഒന്റാരിയോ) എന്നീ മൂന്ന് പ്രധാന സൈനിക താവളങ്ങളിലെ പരിശോധനയിൽ നിരവധി ക്വാർട്ടേഴ്സുകൾ മോശം അവസ്ഥയിലാണെന്ന് കണ്ടെത്തി. തിങ്ങി നിറഞ്ഞ താമസസ്ഥലം, വൈഫൈ പോലുള്ള ആധുനിക സൗകര്യങ്ങളുടെ അഭാവം, കുടിവെള്ള ലഭ്യതയില്ലായ്മ, ശരിയായ മലിനജല സംവിധാനങ്ങളുടെ തകരാർ തുടങ്ങിയ 227 ഹൈ-പ്രിയോറിറ്റി റിപ്പയറുകൾ ഓഡിറ്റർമാർ കണ്ടെത്തി.
ഭവനക്ഷാമം നികത്താൻ കനേഡിയൻ ഫോഴ്സ് ഹൗസിങ് ഏജൻസി വേണ്ടത്ര ആസൂത്രണം ചെയ്യുന്നില്ലെന്നും റിപ്പോർട്ടിൽ പറയുന്നു. 2019-ൽ 5,200 മുതൽ 7,200 വരെ അധിക റെസിഡൻഷ്യൽ യൂണിറ്റുകൾ ആവശ്യമുണ്ടെന്ന് DND പറഞ്ഞിരുന്നു. എന്നാൽ, ഏജൻസിയുടെ പുതിയ പദ്ധതികൾ നടപ്പിലായാലും കുറഞ്ഞത് 3,800 യൂണിറ്റുകളുടെ കുറവുണ്ടാകും. നിലവിൽ 3,700-ൽ അധികം അപേക്ഷകർ വെയിറ്റിങ് ലിസ്റ്റിൽ ഉള്ളപ്പോൾ 205 റെസിഡൻഷ്യൽ യൂണിറ്റുകൾ മാത്രമാണ് ലഭ്യമായത്. ദീർഘകാലമായുള്ള ഈ പ്രശ്നങ്ങളെക്കുറിച്ച് സർക്കാരിനും സൈന്യത്തിനും ബോധ്യമുണ്ടെന്നും, റിപ്പോർട്ടിലെ കണ്ടെത്തലുകൾ അംഗീകരിച്ച് മാറ്റങ്ങൾ വരുത്താൻ സർക്കാർ സമ്മതിച്ചിട്ടുണ്ടെന്നും റിപ്പോർട്ട് കൂട്ടിച്ചേർത്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Canadian Forces in Crisis: Recruitment, Housing Miss Targets, Auditor General Reports
