ഒട്ടാവ: കാനഡയിലെ ഇന്ത്യൻ പൗരന്മാരുടെ സുരക്ഷയിൽ കടുത്ത ആശങ്ക രേഖപ്പെടുത്തി ഇന്ത്യൻ ഹൈക്കമ്മീഷണർ ദിനേശ് പട്നായിക്. അടുത്തിടെ കനേഡിയൻ മാധ്യമത്തിന് നൽകിയ അഭിമുഖത്തിലാണ്, കാനഡയിൽ ഇന്ത്യക്കാർ നേരിടുന്ന വർദ്ധിച്ചുവരുന്ന സുരക്ഷാ ഭീഷണികളെക്കുറിച്ച് അദ്ദേഹം തുറന്നു സംസാരിച്ചത്.
പട്നായിക്കിന്റെ പ്രധാന ചോദ്യങ്ങൾ:
“ഇന്ത്യക്കാർക്ക് കാനഡ സുരക്ഷിതമാണോ? കാനഡ സ്വയം സുരക്ഷിതമാണോ? ഈ പ്രശ്നം സൃഷ്ടിക്കുന്നത് കാനഡക്കാരാണ്. നിങ്ങൾ കാനഡയിൽ എന്താണ് സംഭവിക്കുന്നതെന്ന് നോക്കുന്നുണ്ടോ? വാൻകൂവറിൽ ഒരു റെസ്റ്റോറന്റിന് നേരെ മൂന്നാം തവണയും ആക്രമണം ഉണ്ടായി. ഒരു ഇന്ത്യക്കാരന്റെ ഉടമസ്ഥതയിലുള്ള റെസ്റ്റോറന്റിന് നേരെ വെടിവയ്പ്പ് നടന്നു.”
“ഇവിടെ ഇന്ത്യക്കാർ സുരക്ഷിതരല്ലെന്ന് തോന്നുന്നു. അവരുടെ സുരക്ഷിതത്വം നമ്മൾ ഉറപ്പാക്കേണ്ടതുണ്ടോ? ഇവിടെ എന്താണ് സംഭവിക്കുന്നത്? ഇന്ത്യയിലെ കനേഡിയൻ ഹൈക്കമ്മീഷണർക്ക് സംരക്ഷണം ആവശ്യമില്ല, പക്ഷേ കാനഡയിലെ ഇന്ത്യൻ ഹൈക്കമ്മീഷണർക്ക് സംരക്ഷണം ആവശ്യമാണ്,” ദിനേശ് പട്നായിക് അഭിമുഖത്തിൽ വ്യക്തമാക്കി.
രണ്ട് വർഷത്തോളം നീണ്ട നയതന്ത്രബന്ധത്തിലെ തകർച്ചയ്ക്ക് ശേഷം ഇന്ത്യയും കാനഡയും ബന്ധം പൂർവ്വസ്ഥിതിയിലാക്കാൻ ശ്രമിക്കുന്നതിനിടെയാണ് ദിനേശ് പട്നായിക്കിനെ കേന്ദ്രസർക്കാർ പുതിയ ഹൈക്കമ്മീഷണറായി നിയമിക്കുന്നത്. ഇന്ത്യയിലെ കാനഡയുടെ പുതിയ ഹൈക്കമ്മീഷണറായി ക്രിസ്റ്റഫർ കൂട്ടറെയും കാനഡ നിയമിച്ചിരുന്നു.
അതേസമയം, കാനഡയിൽ നിന്ന് നാടുകടത്തപ്പെടുന്ന ഇന്ത്യക്കാരുടെ എണ്ണവും വർധിച്ചു വരികയാണ്. കനേഡിയൻ ബോർഡർ സർവീസസ് ഏജൻസിയുടെ (CBSA) ഏറ്റവും പുതിയ കണക്കുകൾ പ്രകാരം, 2025 ജൂലൈ 28 വരെ 1,891 ഇന്ത്യക്കാരെ കാനഡയിൽ നിന്ന് നാടുകടത്തി. കഴിഞ്ഞ വർഷം ഈ സംഖ്യ 1,997 ആയിരുന്നു. 2019-ൽ ഇത് വെറും 625 ആയിരുന്നു എന്നതും കണക്കിലെടുക്കുമ്പോൾ നാടുകടത്തൽ നിരക്കിലെ കുത്തനെയുള്ള വർദ്ധനവ് ആശങ്കാജനകമാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Indian High Commissioner Expresses Safety Concerns for Indians in Canada
