ബി.സി.യിൽ ഭവന പ്രതിസന്ധി: കോണ്ടോ വിൽപ്പന കുറഞ്ഞതോടെ സറേയിലെ പുതിയ പ്രോജക്റ്റുകൾ തടഞ്ഞുവെച്ച് ഡെവലപ്പർമാർ

സറേ: ബ്രിട്ടിഷ് കൊളംബിയയിലെ സറേ ഉൾപ്പെടെയുള്ള പ്രധാന നഗരങ്ങളിൽ കോണ്ടോമിനിയം വിൽപ്പന കുത്തനെ ഇടിഞ്ഞതോടെ, ഭാവിയിലെ ഭവന നിർമ്മാണ പദ്ധതികൾ നിർത്തിവെച്ച് ഡെവലപ്പർമാർ. നിർമ്മാണച്ചെലവിലെ വർധനവും സാമ്പത്തിക അനിശ്ചിതത്വവും കാരണം സാധാരണക്കാർക്ക് താങ്ങാനാവുന്ന വിലയിൽ വീടുകൾ നിർമ്മിക്കാൻ സാധിക്കാത്തതാണ് പ്രതിസന്ധിക്ക് പ്രധാന കാരണം.

സറേയിലെ പ്രധാന ഡെവലപ്പർമാരിൽ ഒരാളായ ജോനാഥൻ മീഡ്‌സിന്റെ നേതൃത്വത്തിലുള്ള സ്‌ട്രീറ്റ്‌സൈഡ് കമ്പനി കഴിഞ്ഞ വർഷം തങ്ങളുടെ കോണ്ടോ പ്രീ-സെയിൽ ലക്ഷ്യം അതിവേഗം കൈവരിച്ചിരുന്നു. നിർമ്മാണത്തിനായി ധനസഹായം ഉറപ്പാക്കാൻ ഏകദേശം 60 ശതമാനം യൂണിറ്റുകൾ വിൽക്കേണ്ട സ്ഥാനത്ത്, നാല് മാസത്തിനുള്ളിൽ തന്നെ അത് പൂർത്തിയാക്കാൻ മീഡ്‌സിന് കഴിഞ്ഞിരുന്നു.

എന്നാൽ നിലവിലെ സാഹചര്യത്തിൽ വിൽപ്പന പൂർണ്ണമായും നിലച്ചതായി മീഡ്‌സ് പറയുന്നു. “ഞങ്ങളുടെ എതിരാളികളെല്ലാം ഇതേ അവസ്ഥയിലാണ്. ഇത് അക്ഷരാർത്ഥത്തിൽ അപ്രത്യക്ഷമായിരിക്കുന്നു. ആദ്യമായി വീട് വാങ്ങുന്നവർക്കോ നിക്ഷേപകർക്കോ ആത്മവിശ്വാസമില്ല,” അദ്ദേഹം കൂട്ടിച്ചേർത്തു. വളരുന്ന ജനസംഖ്യക്ക് അനുസൃതമായി 2026-ഓടെ 13,000 ഭവന യൂണിറ്റുകൾ നിർമ്മിക്കാൻ ലക്ഷ്യമിടുന്ന സറേ സിറ്റിയിൽ, ഹൈ-ഡെൻസിറ്റി കോണ്ടോ ഡെവലപ്‌മെൻ്റ് അപേക്ഷകൾ കുറഞ്ഞതായി നഗരസഭാ അധികൃതർ വ്യക്തമാക്കുന്നു. കാനഡ മോർട്ട്‌ഗേജ് ആൻഡ് ഹൗസിംഗ് കോർപ്പറേഷൻ്റെ (CMHC) കണക്കനുസരിച്ച്, മെട്രോ വാൻകൂവറിൽ ഏകദേശം 2,500 പുതിയ കോണ്ടോകൾ വിറ്റഴിയാതെ ഒഴിഞ്ഞുകിടക്കുന്ന സാഹചര്യത്തിലാണ് പുതിയ നിർമ്മാണ പ്രവർത്തനങ്ങളിലെ ഈ മന്ദത.

നിർമ്മാണച്ചെലവുകൾ, ഡെവലപ്‌മെൻ്റ് ഫീസുകൾ, മൊത്തത്തിലുള്ള സാമ്പത്തിക അനിശ്ചിതത്വം എന്നിവ ഉൾപ്പെടെയുള്ള നിലവിലെ വിപണി സാഹചര്യങ്ങൾ ശരാശരി വാങ്ങുന്നവർക്ക് താങ്ങാനാവുന്ന വിലയിൽ വീടുകൾ നിർമ്മിക്കുന്നത് വെല്ലുവിളിയാക്കുന്നുവെന്ന് സ്‌ട്രീറ്റ്‌സൈഡിൻ്റെ വൈസ് പ്രസിഡൻ്റ് കൂടിയായ മീഡ്‌സ് അഭിപ്രായപ്പെട്ടു. ഇതിനെ തുടർന്ന്, പത്ത് വർഷം കൊണ്ട് പൂർത്തിയാക്കേണ്ടിയിരുന്ന, നോർത്ത് സറേയിലെ 1,000 യൂണിറ്റുകളുള്ള ഒരു മൾട്ടി-ബിൽഡിംഗ് പദ്ധതി സ്‌ട്രീറ്റ്‌സൈഡ് താൽക്കാലികമായി നിർത്തിവെച്ചിരിക്കുകയാണ്.

ഭവന നിർമ്മാണത്തിൻ്റെ ചിലവ് കുറയ്ക്കുന്നതിന് പ്രാദേശിക സർക്കാരുകൾക്ക് ഇടപെടാൻ കഴിയുന്ന ഒരു പ്രധാന മേഖലയാണ് മുൻകൂറായി ഈടാക്കുന്ന ഫീസുകൾ എന്ന് ഡെവലപ്പർമാർ ചൂണ്ടിക്കാട്ടുന്നു. ഡെവലപ്‌മെൻ്റ് കോസ്റ്റ് ചാർജസ് (DCCs), കമ്മ്യൂണിറ്റി അമെനിറ്റി ചാർജസ് (CACs) തുടങ്ങിയ ഫീസുകൾ ഡെവലപ്പർമാർ മുനിസിപ്പൽ, റീജിയണൽ സർക്കാരുകൾക്ക് നൽകേണ്ടതുണ്ട്. ഈ തുക പൊതുവെ പാർക്കുകൾ, ജലം, ഡ്രെയിനേജ്, ഗതാഗതം, അഗ്നിശമന സേവനം തുടങ്ങിയ അടിസ്ഥാന സൗകര്യങ്ങൾ മെച്ചപ്പെടുത്താൻ ഉപയോഗിക്കുന്നു.

ഈ ഫീസുകൾ ഒരു യൂണിറ്റിൻ്റെ മൊത്തം ചെലവിൻ്റെ 25 മുതൽ 30 ശതമാനം വരെ വർദ്ധിപ്പിക്കാൻ കാരണമാകുന്നുവെന്ന് ഹോംബിൽഡേഴ്സ് അസോസിയേഷൻ ഓഫ് വാൻകൂവർ (HAVAN) പറയുന്നു. നിലവിൽ 600,000 ഡോളറിന് വിൽക്കുന്ന ഒരു സാധാരണ കോണ്ടോ യൂണിറ്റിന്, ഈ ഫീസുകളുടെ ചെലവ് 60,000 ഡോളർ മുതൽ 85,000 ഡോളർ വരെയാണ്. ഇത് പകുതിയായി കുറച്ചാൽ കൂടുതൽ ആളുകൾക്ക് താങ്ങാൻ കഴിയുന്ന വിലയിലേക്ക് എത്തിക്കാനാകുമെന്നും മീഡ്‌സ് അഭിപ്രായപ്പെട്ടു. എന്നിരുന്നാലും, പുതിയ വീടുകൾക്ക് അടിസ്ഥാന സൗകര്യങ്ങൾ ആവശ്യമാണെന്നും അതിനുള്ള ചെലവ് ഡെവലപ്‌മെൻ്റ് സംഭാവനകളിലൂടെയോ അല്ലെങ്കിൽ നികുതിദായകരുടെ സംഭാവനകളിലൂടെയോ കണ്ടെത്തേണ്ടതുണ്ടെന്നും സർറേ നഗരാസൂത്രണ വിഭാഗം ജനറൽ മാനേജർ റോൺ ഗിൽ പ്രതികരിച്ചു.