പോസ്റ്റ്കാർഡുകളിലെ ചിത്രം പോലെ മലനിരകളും ഒലിവ് തോട്ടങ്ങളും മുന്തിരിത്തോട്ടങ്ങളും നിറഞ്ഞ ഇറ്റലിയിലെ ടസ്കനി (Tuscany) മേഖലയിലേക്കുള്ള പ്രവാസം പ്രോത്സാഹിപ്പിച്ചുകൊണ്ട് റാഡികോണ്ടോലി (Radicondoli) എന്ന മനോഹര ഗ്രാമം രംഗത്ത്. വർഷങ്ങളായി ജനസംഖ്യ കുറയുന്ന ഈ മധ്യകാല ഗ്രാമത്തിൽ സ്ഥിരതാമസമാക്കുന്നവർക്ക് ഏകദേശം 23,000 യു.എസ്. ഡോളർ (20,000 യൂറോ) വരെ ധനസഹായം നൽകുന്ന പദ്ധതിക്കാണ് ഗ്രാമ അധികൃതർ രൂപം നൽകിയിരിക്കുന്നത്.
മുമ്പ് ഏകദേശം 3,000 താമസക്കാർ ഉണ്ടായിരുന്ന ഈ ഗ്രാമത്തിൽ നിലവിൽ 966 പേർ മാത്രമാണ് അവശേഷിക്കുന്നത്.
ഇവിടെയുള്ള 450 വീടുകളിൽ നൂറിലധികം വീടുകൾ ഒഴിഞ്ഞു കിടക്കുന്നു. ഈ അവസ്ഥ മാറ്റിയെടുക്കാൻ 2023-ൽ ആരംഭിച്ച പദ്ധതി ഗ്രാമത്തിന്റെ മേയറായ ഫ്രാൻസെസ്കോ ഗുവാർഗ്വാളിനിയുടെ നേതൃത്വത്തിൽ ഈ വർഷം വിപുലീകരിച്ചു. വീട് വാങ്ങുന്നവർക്ക് പുറമെ, 2026-ന്റെ തുടക്കം വരെ പുതിയ വാടകക്കാർക്ക് ആദ്യ രണ്ട് വർഷത്തെ വാടകയുടെ പകുതി തുക സബ്സിഡിയായി നൽകാനും തീരുമാനിച്ചിട്ടുണ്ട്.
പുതിയ വീടുകൾ വാങ്ങുന്നതിനും വാടകയ്ക്കെടുക്കുന്നതിനും, വിദ്യാർത്ഥികൾക്ക് സാമ്പത്തിക സഹായം, പൊതുഗതാഗത യാത്രക്കാർക്ക് ഇളവുകൾ, ഗ്രീൻ എനർജി ഉപയോഗിക്കുന്നവർക്ക് സഹായം എന്നിവയ്ക്കായി ഈ വർഷം 400,000 യൂറോയിലധികം (ഏകദേശം $465,000) നീക്കിവെച്ചതായി മേയർ അറിയിച്ചു. ഇറ്റലിയിൽ സാധാരണയായി കാണുന്ന “ഒരു യൂറോയുടെ വീട്” പദ്ധതിയിൽ നിന്ന് വ്യത്യസ്തമാണിത്. “ഞങ്ങളുടെ വീടുകൾക്ക് മൂല്യമുണ്ട്. സാമൂഹികത, ആതിഥ്യമര്യാദ, സാംസ്കാരിക സംരംഭങ്ങൾ എന്നിവയാണ് ഈ ഗ്രാമത്തിന്റെ അധിക മൂല്യം,” ഗുവാർഗ്വാളിനി പറയുന്നു.
ചെറിയ അപ്പാർട്ട്മെന്റുകൾക്ക് 50,000 യൂറോ മുതലാണ് ഇവിടെ വില ആരംഭിക്കുന്നത്. പൂർണ്ണമായ ബോണസായ 20,000 യൂറോ ഉപയോഗിക്കുന്നവർക്ക് 30,000 യൂറോക്ക് (ഏകദേശം $35,000) ഒരു ചെറിയ അപ്പാർട്ട്മെന്റ് സ്വന്തമാക്കാം. വാടകക്കാർക്കും വലിയ നേട്ടമുണ്ട്; സാധാരണയായി 400 യൂറോ വരുന്ന 60 മുതൽ 80 ചതുരശ്ര മീറ്റർ വരെയുള്ള വീടുകളുടെ വാടക സബ്സിഡിക്ക് ശേഷം 200 യൂറോയായി കുറയും. എന്നിരുന്നാലും, ഒരു നിബന്ധനയുണ്ട്: വീട് വാങ്ങുന്നവർ കുറഞ്ഞത് 10 വർഷവും വാടകയ്ക്ക് എടുക്കുന്നവർ 4 വർഷവും ഇവിടെ താമസിക്കണം.
1950-കളിൽ തുടങ്ങിയ ജനസംഖ്യാ ഇടിവ് തിരിച്ചുകൊണ്ടുവരാൻ ഈ പദ്ധതിക്ക് സാധിക്കുമെന്നാണ് അധികൃതരുടെ പ്രതീക്ഷ. 2023-ൽ പദ്ധതി ആരംഭിച്ച ശേഷം, 23 വീടുകളുടെ വിൽപ്പനക്ക് ധനസഹായം നൽകുകയും ബെൽജിയക്കാർ ഉൾപ്പെടെയുള്ള വിദേശികളും ഇറ്റലിക്കാരും അടക്കം 60-ഓളം പുതിയ താമസക്കാരെ ആകർഷിക്കാനും ഗ്രാമത്തിന് കഴിഞ്ഞിട്ടുണ്ട്. വിദ്യാർത്ഥികളുള്ള അന്താരാഷ്ട്ര കുടുംബങ്ങൾക്ക് യൂണിവേഴ്സിറ്റി ഗ്രാന്റുകളും സ്കൂൾ ബുക്ക് വൗച്ചറുകളും അധികമായി ലഭിക്കും. സിയെനയിൽ നിന്ന് 40 മിനിറ്റും ഫ്ലോറൻസിൽ നിന്ന് ഒരു മണിക്കൂറിലധികം ദൂരവുമാണ് റാഡികോണ്ടോലിയിലേക്കുള്ളത്. പദ്ധതിയെക്കുറിച്ചും അപേക്ഷയെക്കുറിച്ചും കൂടുതൽ വിവരങ്ങൾhttps://wivoaradicondoli.itഎന്ന വെബ്സൈറ്റിൽ ലഭ്യമാണ്.
