നയാഗ്ര ∙ 30 ബെലുഗ തിമിംഗലങ്ങളെ ചൈനയിലേക്ക് കയറ്റി അയയ്ക്കാൻ അനുമതി നിഷേധിച്ച കനേഡിയൻ സർക്കാരിന് മുന്നറിയിപ്പുമായി നയാഗ്ര വെള്ളച്ചാട്ടത്തിന് സമീപമുള്ള മറൈൻലാൻഡ് പാർക്ക്. അനുമതി ലഭിച്ചില്ലെങ്കിൽ തിമിംഗലങ്ങൾക്ക് ദയാവധം (Euthanasia) നൽകേണ്ടി വരുമെന്ന് പാർക്ക് അധികൃതർ സർക്കാരിനെ അറിയിച്ചു. എത്രയും വേഗം ഈ വിഷയത്തിൽ നടപടി സ്വീകരിക്കണമെന്നാണ് ആവശ്യം.
അനുമതി നിഷേധിച്ചതിന് പിന്നിൽ
ചൈനയിലെ ചിമെലോങ് ഓഷ്യൻ കിങ്ഡം എന്ന അക്വേറിയത്തിലേക്കാണ് 30 ബെലുഗ തിമിംഗലങ്ങളെ കയറ്റി അയയ്ക്കാൻ മറൈൻലാൻഡ് അപേക്ഷ നൽകിയിരുന്നത്. എന്നാൽ, ഈ അപേക്ഷ ഫിഷറീസ് മന്ത്രി ജോവാൻ തോംസൺ ഈ ആഴ്ച ആദ്യം നിരസിച്ചു. വിനോദ ഷോകൾക്കായി തിമിംഗലങ്ങളെയും ഡോൾഫിനുകളെയും ഉപയോഗിക്കുന്നതും തടവിലാക്കുന്നതും നിയമവിരുദ്ധമാക്കുന്ന 2019-ലെ നിയമത്തിന് അനുസൃതമായാണ് ഈ തീരുമാനമെന്ന് മന്ത്രി വ്യക്തമാക്കി.
മറൈൻലാൻഡിന്റെ പ്രതിസന്ധി
നിലവിൽ കടുത്ത കടബാധ്യതയിൽ കഴിയുന്ന മറൈൻലാൻഡ് പാർക്ക് 30 തിമിംഗലങ്ങളെ സംരക്ഷിക്കാൻ ബുദ്ധിമുട്ടിലാണ്. ബെലുഗ തിമിംഗലങ്ങളെ പാർപ്പിക്കാൻ ആവശ്യമായ ക്രമീകരണങ്ങളുള്ള ഏക മറൈൻ പാർക്ക് ചൈനയിലെ ചിമെലോങ് ഓഷ്യൻ മാത്രമാണെന്നാണ് പാർക്ക് അധികൃതരുടെ വാദം. അതിനാൽ, തിമിംഗലങ്ങളെ അയയ്ക്കാൻ അനുമതി നൽകുകയോ അല്ലെങ്കിൽ അവയെ പാർപ്പിക്കാൻ മറ്റെന്തെങ്കിലും സ്ഥലം കണ്ടെത്താൻ സർക്കാർ നടപടി സ്വീകരിക്കുകയോ ചെയ്യണമെന്ന് ആവശ്യപ്പെട്ട് മറൈൻലാൻഡ് മന്ത്രി തോംസണെ വീണ്ടും സമീപിച്ചിട്ടുണ്ട്. പാർക്കിലെ സ്ഥിതി അതീവ ഗുരുതരമാണ്. 2019 മുതൽ ഒരു കൊലയാളി തിമിംഗലവും 19 ബെലുഗകളും ഉൾപ്പെടെ 20 തിമിംഗലങ്ങൾ പാർക്കിൽ ചത്തിട്ടുണ്ട്. 2023-ൽ പാർക്ക് വിൽക്കാൻ ശ്രമിച്ചെങ്കിലും വിജയിച്ചില്ല. 2024 വേനൽക്കാലം മുതൽ പൊതുജനങ്ങൾക്ക് പാർക്കിൽ പ്രവേശനം നിഷേധിച്ചിരിക്കുകയാണ്. തിമിംഗലങ്ങളെ തടവിലാക്കുന്നത് നിരോധിച്ച നിയമം നിലവിലെ തിമിംഗലങ്ങൾക്ക് ബാധകമല്ലെങ്കിലും, അവയുടെ പ്രജനനം നിരോധിക്കുന്ന നിയമം ഇവിടെ വെല്ലുവിളിയാകുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Beluga Whales at MarineLand face potential euthanasia if transfer to China is blocked
