ചെന്നൈ: തമിഴ്നാട്ടിലെ കരൂരിൽ തമിഴക വെട്രി കഴകം (ടി.വി.കെ.) നേതാവും സിനിമാതാരവുമായ വിജയ് നയിച്ച റാലിക്കിടെയുണ്ടായ തിക്കിലും തിരക്കിലുംപെട്ട് 38 പേർക്ക് ജീവൻ നഷ്ടപ്പെട്ടു. മരിച്ചവരിൽ 8 കുട്ടികളും 17 സ്ത്രീകളും ഉൾപ്പെടുന്നു. ആശുപത്രിയിലെത്തിച്ചവരിൽ 29 പേരെ മരിച്ച നിലയിലാണ് കണ്ടെത്തിയതെന്ന് ആരോഗ്യവകുപ്പ് സ്ഥിരീകരിച്ചു.
ദുരന്തത്തിൽ 67-ഓളം പേർ ചികിത്സയിലുണ്ടെന്നും ഇതിൽ 12 പേരുടെ നില ഗുരുതരമാണെന്നും തമിഴ്നാട് ആരോഗ്യമന്ത്രി എം. സുബ്രഹ്മണ്യൻ അറിയിച്ചു. പരിക്കേറ്റവരിൽ 9 പോലീസുകാരും ഉൾപ്പെടുന്നു. മരണസംഖ്യ ഇനിയും വർധിക്കാനുള്ള സാധ്യതയുണ്ടെന്ന ആശങ്ക നിലനിൽക്കുന്നു. റാലിക്കിടെ ഒട്ടേറെ കുട്ടികളെ കാണാതായതായും റിപ്പോർട്ടുകളുണ്ട്. മരിച്ചവരുടെ മൃതദേഹങ്ങൾ അമരാവതി മെഡിക്കൽ കോളേജ് ആശുപത്രിയിലും കരൂർ സർക്കാർ ആശുപത്രിയിലുമാണ് സൂക്ഷിച്ചിരിക്കുന്നത്.
സർക്കാർ നടപടികൾ:
സംഭവത്തെത്തുടർന്ന് തമിഴ്നാട് സർക്കാർ ജുഡീഷ്യൽ അന്വേഷണം പ്രഖ്യാപിച്ചു. ദുരന്തത്തിൽ മരിച്ചവരുടെ കുടുംബങ്ങൾക്ക് 10 ലക്ഷം രൂപയും പരിക്കേറ്റ് ചികിത്സയിലുള്ളവർക്ക് ഒരു ലക്ഷം രൂപയും നഷ്ടപരിഹാരമായി നൽകുമെന്ന് മുഖ്യമന്ത്രി എം.കെ. സ്റ്റാലിൻ അറിയിച്ചു. മുഖ്യമന്ത്രി ഇന്ന് പുലർച്ചെ തന്നെ വിമാനമാർഗം സേലത്തെത്തി, അവിടെനിന്ന് കാർ മാർഗം കരൂരിലേക്ക് തിരിക്കും.
സ്ഥലം എം.എൽ.എ.യും മുൻ മന്ത്രിയുമായ സെന്തിൽ ബാലാജി, തിരുച്ചിറപ്പള്ളി, ദിണ്ടിഗൽ, നാമക്കൽ ജില്ലാ കളക്ടർമാർ എന്നിവരും കരൂരിലേക്ക് തിരിച്ചിട്ടുണ്ട്. സമീപ ജില്ലകളിൽ നിന്നുള്ള മെഡിക്കൽ സംഘവും രക്ഷാപ്രവർത്തനത്തിനായി സ്ഥലത്തെത്തി.
സംഭവത്തിന്റെ പശ്ചാത്തലം:
കരൂർ വേലുച്ചാമിപുരത്ത് ഇന്നലെ വൈകിട്ട് 7 മണിയോടെയാണ് റാലി ആരംഭിച്ചത്. നാമക്കലിലെ റാലിക്കുശേഷം വിജയ് കരൂരിലെത്തിയതോടെ സമീപ ജില്ലകളിൽ നിന്നടക്കം വൻ ജനക്കൂട്ടമാണ് തടിച്ചുകൂടിയത്.അപകടത്തിന് തൊട്ടുമുൻപ്, തിരക്ക് നിയന്ത്രിക്കാനും ആളുകൾക്ക് വെള്ളക്കുപ്പികൾ എത്തിക്കാനും വിജയ് മൈക്കിലൂടെ പോലീസിന്റെ സഹായം ആവശ്യപ്പെട്ടിരുന്നു. ആവശ്യത്തിന് വെള്ളക്കുപ്പികൾ സംഘാടകർ ഒരുക്കിയിരുന്നെങ്കിലും അനിയന്ത്രിതമായ തിരക്ക് കാരണം വിതരണം ചെയ്യാനായില്ല. നിർജലീകരണം സംഭവിച്ച് ഏതാനും പേർ കുഴഞ്ഞുവീണതോടെയാണ് വിജയ് സഹായം അഭ്യർത്ഥിച്ചത്. എന്നാൽ, പോലീസ് ഉദ്യോഗസ്ഥർക്ക് പോലും എത്തിപ്പെടാൻ കഴിയാത്തത്ര വലിയ തിരക്കായിരുന്നു സ്ഥലത്ത്.
വിജയ് ആരാധകരായ ചെറുപ്പക്കാരും കുട്ടികളുമാണ് റാലിയിൽ പങ്കെടുക്കാൻ കൂടുതലായി എത്തിയിരുന്നത്. 15 വയസ്സിന് താഴെയുള്ള ആയിരത്തോളം കുട്ടികൾ റാലിയിൽ ഉണ്ടായിരുന്നതായാണ് വിവരം.
ദേശീയ നേതാക്കളുടെ അനുശോചനം:
ദുരന്തത്തിൽ രാഷ്ട്രപതി ദ്രൗപദി മുർമുവും പ്രധാനമന്ത്രി നരേന്ദ്ര മോദിയും അനുശോചനം രേഖപ്പെടുത്തി. കരൂർ റാലിയിലുണ്ടായ ദുരന്തം അതീവ വേദനാജനകമാണെന്നും പ്രിയപ്പെട്ടവരെ നഷ്ടപ്പെട്ട കുടുംബങ്ങൾക്കൊപ്പമുണ്ടെന്നും പ്രധാനമന്ത്രി ട്വീറ്റ് ചെയ്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
TVK Vijay rally Stampede
