സ്റ്റെയിൻബാക്ക്: നാല് മണിക്കൂറിനുള്ളിൽ പെയ്ത 103 മില്ലിമീറ്റർ കനത്ത മഴയിൽ വെള്ളത്തിനടിയിലായി സ്റ്റെയിൻബാക്ക് നഗരം. ശക്തമായ മഴയെ തുടർന്ന് നഗരത്തിലെ തെരുവുകളും, വീടുകളുടെ ബേസ്മെൻ്റുകളും, വ്യാപാര സ്ഥാപനങ്ങളും വെള്ളക്കെട്ടിലായി. പലയിടത്തും ഗതാഗതം തടസ്സപ്പെട്ടു. വെള്ളപ്പൊക്കത്തെ തുടർന്ന് വീടുകളുടെ ബേസ്മെൻ്റുകളിൽ മൂന്നടിയോളം വെള്ളം കയറിയതായി സ്റ്റെയിൻബാക്ക് കൗൺസിലർ ബിൽ ഹീബർട്ട് പറഞ്ഞു. കഴിഞ്ഞ വർഷം ഇതേ സമയത്തും സമാനമായ ഒരു പ്രളയം സ്റ്റെയിൻബാക്കിൽ സംഭവിച്ചിരുന്നു.
നഗരത്തിലെ മൃഗസംരക്ഷണ കേന്ദ്രമായ സ്റ്റെയിൻബാക്ക് ആൻഡ് ഏരിയ അനിമൽ റെസ്ക്യൂ കെട്ടിടത്തിൽ ആറടിയോളം വെള്ളം കയറി. കെട്ടിടത്തിന്റെ താഴത്തെ നിലയിൽ സൂക്ഷിച്ചിരുന്ന മൃഗങ്ങളുടെ ഭക്ഷണം, മരുന്നുകൾ, കൂടുകൾ, മറ്റ് ആവശ്യസാധനങ്ങൾ എന്നിവ വെള്ളത്തിൽ ഒഴുകി പോയെന്ന് വൈസ് പ്രസിഡന്റ് ഗ്രഹാം പൊള്ളോക്ക് അറിയിച്ചു. കെട്ടിടത്തിന്റെ മുകൾ നിലയിലാണ് മൃഗങ്ങളെ പാർപ്പിച്ചിരിക്കുന്നത്. നിലവിൽ 22 പൂച്ചക്കുട്ടികളെയും പൂച്ചകളെയും കെട്ടിടത്തിൽ നിന്ന് സുരക്ഷിതമായി മാറ്റിയിട്ടുണ്ട്. ഇൻഷുറൻസ് പരിരക്ഷയുണ്ടെങ്കിലും, 25,000 ഡോളറിന്റെ ഭീമമായ തുക ചെലവ് വരുമെന്നതിനാൽ ഇത് താങ്ങാൻ കഴിയുന്ന ഒന്നല്ലെന്നും അദ്ദേഹം കൂട്ടിച്ചേർത്തു.
ഈ പ്രതിഭാസത്തെ ‘ട്രെയിനിങ് തണ്ടർസ്റ്റോംസ്’ എന്നാണ് കാലാവസ്ഥാ വിദഗ്ധർ വിശേഷിപ്പിക്കുന്നത്. തുടർച്ചയായി ഒരേ സ്ഥലത്ത് മഴമേഘങ്ങൾ രൂപപ്പെടുന്നതാണ് ഇത്തരത്തിലുള്ള കനത്ത മഴയ്ക്ക് കാരണമാകുന്നത്. ചുരുങ്ങിയ ദൂരപരിധിയിൽ പോലും മഴയുടെ അളവിൽ വലിയ വ്യത്യാസം ഉണ്ടായിട്ടുണ്ട്. സ്റ്റെയിൻബാക്കിൽ 103 മില്ലിമീറ്റർ മഴ ലഭിച്ചപ്പോൾ, സമീപ പ്രദേശങ്ങളായ സ്പ്രേഗിൽ 84 മില്ലിമീറ്ററും, മാർച്ചാൻഡിൽ 58 മില്ലിമീറ്ററും മഴയാണ് ലഭിച്ചത്. നഗരത്തിലെ അഴുക്കുചാലുകൾക്ക് വെള്ളം ഉൾക്കൊള്ളാനുള്ള ശേഷി കുറവായതിനാൽ ഇത്രയധികം മഴ പെയ്യുമ്പോൾ അതെല്ലാം റോഡുകളിലേക്കും വീടുകളിലേക്കും കയറാൻ കാരണമാകുമെന്ന് അധികൃതർ അറിയിച്ചു. മഴ കുറഞ്ഞതോടെ റോഡുകളിലെ വെള്ളക്കെട്ട് ഒഴിവായെങ്കിലും, രക്ഷാപ്രവർത്തനങ്ങൾ ഇപ്പോഴും തുടർന്നുകൊണ്ടിരിക്കുകയാണ്.
കാനഡ വാർത്തകൾ മലയാളത്തിൽ ലഭിക്കുവാൻ താഴെയുള്ള ലിങ്ക് വഴി Canada Talks വാട്സ്ആപ്പ് ഗ്രൂപ്പിൽ അംഗമാകൂ : https://chat.whatsapp.com/JNSnrvnSqw1DUJljLTLp82
Manitoba city inundated by heavy rain; 103 mm of rain fell in four hours
