കൊച്ചി: ദേശീയ പുരസ്കാര ജേതാവായ ജയരാജ് സംവിധാനം ചെയ്ത ‘കാഥികൻ’ എന്ന ചിത്രം ഒടിടി പ്ലാറ്റ്ഫോമിൽ റിലീസിന് ഒരുങ്ങുന്നു. കഥാപ്രസംഗ കലയുടെ പശ്ചാത്തലത്തിൽ ഒരുക്കിയിട്ടുള്ള ഈ ചിത്രം സെപ്റ്റംബർ 4 മുതൽ മനോരമ മാക്സിൽ സ്ട്രീമിംഗ് ആരംഭിക്കും. തിയേറ്ററുകളിൽ 2023 ഡിസംബർ 8-നാണ് ഈ ചിത്രം റിലീസ് ചെയ്തത്.
ഏതാണ്ട് ഒരു വർഷവും ഒമ്പത് മാസവും പിന്നിട്ടതിന് ശേഷമാണ് ചിത്രം ഒടിടി പ്ലാറ്റ്ഫോമിലെത്തുന്നത്. പ്രശസ്ത കാഥികൻ വി. സാംബശിവന്റെ ഓർമ്മകൾക്ക് മുൻപിൽ ഒരു ആദരാഞ്ജലിയായിട്ടാണ് ജയരാജ് ഈ ചിത്രം അണിയിച്ചൊരുക്കിയത്.
കഥാപ്രസംഗ കലയുടെ പ്രൗഢമായ പഴയകാലവും ഇന്നത്തെ അവസ്ഥയും സിനിമയിൽ വിഷയമാകുന്നു. ഒരു ജുവനൈൽ ഹോം സൂപ്രണ്ടും ഒരു കാഥികനും തമ്മിലുള്ള ആത്മബന്ധമാണ് ചിത്രത്തിന്റെ പ്രധാന ഇതിവൃത്തം. ചെറുപ്രായത്തിൽ ചെയ്ത തെറ്റുകളുടെ പേരിൽ കുറ്റവാളിയായി മുദ്രകുത്തപ്പെട്ട ഒരു കുട്ടിയുടെ കലാപരമായ കഴിവുകൾ കണ്ടെത്തി, അവനെ സമൂഹത്തിന്റെ മുഖ്യധാരയിലേക്ക് തിരികെ കൊണ്ടുവരാൻ ശ്രമിക്കുന്ന സൂപ്രണ്ടിന്റെ കഥ ചിത്രം ഹൃദയസ്പർശിയായി അവതരിപ്പിക്കുന്നു.
ചിത്രത്തിൽ ഉണ്ണി മുകുന്ദൻ ജുവനൈൽ ഹോം സൂപ്രണ്ടായും, മുകേഷ് ചന്ദ്രസേനൻ എന്ന കാഥികനായും എത്തുന്നു. പുതുമുഖം കൃഷ്ണാനന്ദ് ഗോപു ആണ് ചിത്രത്തിലെ ബാലതാരം. അനശ്വര സംഗീതജ്ഞൻ സലിൽ ചൗധരിയുടെ മകൻ സഞ്ജയ് ചൗധരിയാണ് സംഗീത സംവിധാനം നിർവഹിച്ചിരിക്കുന്നത്. സലിൽ ചൗധരിയുടെ മകൾ ആന്ത്രാ ചൗധരി ഒരു ബംഗാളി ഗാനം ആലപിച്ചിട്ടുണ്ട് എന്നതും ശ്രദ്ധേയമാണ്.
