ടൊറന്റോ: ടൊറന്റോയുടെ ആകാശത്ത് ഇടിമുഴക്കം തീർക്കാൻ കനേഡിയൻ ഇന്റർനാഷണൽ എയർ ഷോ (CIAS) വീണ്ടുമെത്തുന്നു. ഈ വർഷത്തെ ലേബർ ഡേ വാരാന്ത്യത്തിൽ, അതായത് ആഗസ്റ്റ് 30 മുതൽ സെപ്റ്റംബർ 1 വരെ കനേഡിയൻ നാഷണൽ എക്സിബിഷനിൽ (CNE) വെച്ചാണ് ഈ വാർഷിക വ്യോമയാന വിസ്മയം അരങ്ങേറുന്നത്. ദിവസവും ഉച്ചയ്ക്ക് 12 മുതൽ 3:40 വരെയാണ് പ്രദർശനങ്ങൾ നടക്കുക.
CNE-യുടെ പല ഭാഗങ്ങളിൽ നിന്നും എയർ ഷോ കാണാൻ സാധിക്കുമെങ്കിലും, മികച്ച കാഴ്ചാനുഭവത്തിനായി പ്രത്യേകമായി ഒരുക്കിയിട്ടുള്ള ‘എക്സ്ക്ലൂസീവ് എയർ ഷോ സോൺ’ സന്ദർശിക്കാവുന്നതാണ്. ഇതിനായി ടിക്കറ്റ് എടുത്ത് മാർലിൻ ബെൽ പാർക്കിൽ പ്രവേശിക്കുന്നവർക്ക് പ്രകടനങ്ങളുടെ വിശദീകരണങ്ങൾ കേൾക്കാനും സാധിക്കും.
ഈ വർഷത്തെ എയർ ഷോയിൽ കനേഡിയൻ ഫോഴ്സസ് സ്നോബേർഡ്സ്, എഫ്-35 ഡെമോൺസ്ട്രേഷൻ ടീം, ആർ.സി.എ.എഫ്- സി.പി.140 അറോറ, സി.എഫ്. 18 ഡെമോൺസ്ട്രേഷൻ, നോർത്തേൺ സ്റ്റാർസ്- പിറ്റ്സ് ടീം എന്നിവരടക്കം നിരവധി പ്രമുഖ ടീമുകൾ അണിനിരക്കും. ഓരോ ദിവസത്തെയും പ്രത്യേക പ്രകടനങ്ങളുടെ കൃത്യമായ ഷെഡ്യൂൾ അറിയാൻ താൽപ്പര്യമുള്ളവർക്ക് സി.ഐ.എ.എസ്. ഇൻസൈഡർ ആക്സസ് സൗജന്യമായി സൈൻ അപ്പ് ചെയ്യാവുന്നതാണ്.
ഇതുവഴി എല്ലാ ദിവസവും രാവിലെ ഷെഡ്യൂൾ ഇ-മെയിലായി ലഭിക്കും. ആഗസ്റ്റ് 30, 31, സെപ്റ്റംബർ 1 എന്നീ തീയതികളിൽ ആകാശം അഭ്യാസ പ്രകടനങ്ങളാൽ നിറയും. പതിവുപോലെ, ലേബർ ഡേ വാരാന്ത്യത്തിൽ ടൊറന്റോയുടെ ആകാശത്തെ വർണ്ണാഭമാക്കുന്ന ഈ എയർ ഷോ കാണാൻ ആയിരക്കണക്കിന് ആളുകൾ എത്തുമെന്നാണ് പ്രതീക്ഷിക്കുന്നത്.
