കഴിഞ്ഞ ആഴ്ച അറ്റ്ലാന്റിക് സമുദ്രത്തിൽ രൂപം കൊണ്ട ‘എറിൻ’ ചുഴലിക്കാറ്റ് അതിവേഗം കാറ്റഗറി 5 കൊടുങ്കാറ്റായി മാറിയത് ലോകത്തെ ഞെട്ടിച്ചിരുന്നു. എന്നാൽ, ഒരു കൊടുങ്കാറ്റ് ഇത്ര വേഗത്തിൽ ശക്തി പ്രാപിക്കുന്നത് ഇപ്പോൾ സാധാരണമായിക്കൊണ്ടിരിക്കുന്നു എന്നതാണ് കൂടുതൽ ഭീതിജനകമായ വസ്തുത. 24 മണിക്കൂറിനുള്ളിൽ 136 കി.മീ/മണിക്കൂർ വേഗതയിൽ കാറ്റ് വീശാൻ തുടങ്ങിയത് ഇതിന് തെളിവാണ്. സമുദ്രതാപനില കൂടുന്നത് ഉഷ്ണമേഖലാ ചുഴലിക്കാറ്റുകൾക്ക് അതിവേഗം ശക്തി നേടാൻ സാഹചര്യമൊരുക്കുന്നുവെന്ന് പഠനങ്ങൾ കാണിക്കുന്നു.
ഒരു ഉഷ്ണമേഖലാ കൊടുങ്കാറ്റിനെ നേരിടാൻ തയ്യാറെടുക്കുന്ന ഒരു തീരദേശ സമൂഹം പെട്ടെന്ന് ഒരു വലിയ ചുഴലിക്കാറ്റിനെ അഭിമുഖീകരിക്കേണ്ടി വരുമ്പോൾ അത് ദുരന്തമായി മാറാം. ഓരോ ദുരന്തനിവാരണ ഉദ്യോഗസ്ഥന്റെയും പേടിസ്വപ്നമാണിത്. 24 മണിക്കൂറിനുള്ളിൽ ഒരു കൊടുങ്കാറ്റിന്റെ വേഗത കുറഞ്ഞത് 56 കി.മീ/മണിക്കൂർ വർധിക്കുന്നതിനെയാണ് ‘റാപ്പിഡ് ഇൻ്റൻസിഫിക്കേഷൻ’ എന്ന് നിർവചിക്കുന്നത്. എന്നാൽ, ‘എറിൻ’ ചുഴലിക്കാറ്റ് ഈ പരിധിക്ക് മുകളിലായിരുന്നു.
കഴിഞ്ഞ വർഷം ‘മിൽട്ടൺ’ ചുഴലിക്കാറ്റും 24 മണിക്കൂറിൽ 145 കി.മീ/മണിക്കൂർ വേഗത വർധിപ്പിച്ചിരുന്നു. അറ്റ്ലാന്റിക് സമുദ്രത്തിലെ താപനില റെക്കോർഡ് നിലയിൽ വർദ്ധിച്ചതിനനുസരിച്ച്, ചുഴലിക്കാറ്റുകൾ അതിവേഗം ശക്തി പ്രാപിക്കുന്നതായി പഠനങ്ങൾ പറയുന്നു. ഹെലൻ, ഇയാൻ, ഇഡാ, മിൽട്ടൺ തുടങ്ങിയ ചുഴലിക്കാറ്റുകളെല്ലാം ഈ പ്രവണതയുടെ ഭാഗമാണ്. “ചുഴലിക്കാറ്റുകൾ അതിവേഗം തീവ്രമാകുന്നത് ആഗോള താപനം കാരണമാണെന്ന് സ്ഥിരമായ തെളിവുകൾ സൂചിപ്പിക്കുന്നു,” ക്ലൈമറ്റ് സെൻട്രൽ എന്ന ഗവേഷണ സ്ഥാപനത്തിലെ ശാസ്ത്രജ്ഞനായ ഡാനിയൽ ഗിൽഫോർഡ് പറഞ്ഞു.
പ്രവചനം വെല്ലുവിളിയാകുന്നു.
ചുഴലിക്കാറ്റുകളുടെ സഞ്ചാരപഥം പ്രവചിക്കുന്നതിൽ വലിയ പുരോഗതി ഉണ്ടായിട്ടുണ്ടെങ്കിലും, അവ എത്രത്തോളം തീവ്രമാകുമെന്ന് പ്രവചിക്കുന്നത് ഇപ്പോഴും വെല്ലുവിളിയാണ്. ഹരിതഗൃഹ വാതകങ്ങളുടെ പുറന്തള്ളൽ കുറയ്ക്കുന്നതിനും കാലാവസ്ഥാ പ്രവചനം മെച്ചപ്പെടുത്തുന്നതിനും കൂടുതൽ നിക്ഷേപം നടത്തേണ്ടത് ആവശ്യമാണെന്ന് പ്രിൻസ്റ്റൺ യൂണിവേഴ്സിറ്റിയിലെ കാലാവസ്ഥാ ഗവേഷകൻ ഗേബ് വെച്ചി അഭിപ്രായപ്പെട്ടു. “ആഗോളതാപനം റാപ്പിഡ് ഇൻ്റൻസിഫിക്കേഷൻ എന്ന പ്രതിഭാസം കൂടുതൽ സാധ്യമാക്കിയിരിക്കുന്നു, ഭാവിയിലും ഈ പ്രവണത തുടരുമെന്നാണ് പ്രതീക്ഷിക്കുന്നത്,” അദ്ദേഹം പറഞ്ഞു.
