സസ്കാച്ചെവനിൽ ആഞ്ഞടിച്ച ശക്തമായ കൊടുങ്കാറ്റിൽ വലിയ നാശനഷ്ടങ്ങൾ സംഭവിച്ചതായി റിപ്പോർട്ട്. ചുഴലിക്കാറ്റും ശക്തമായ കാറ്റും ഉൾപ്പെടെയുള്ള കാലാവസ്ഥാ പ്രതിഭാസങ്ങളാണ് നാശനഷ്ടങ്ങൾക്ക് കാരണം. നോർത്തേൺ ടൊർണാഡോസ് പ്രൊജക്ട് (NTP) നടത്തിയ സർവേയിലാണ് ഇക്കാര്യം വ്യക്തമായത്. ഇതിൽ ‘ഗസ്റ്റ്നാഡോ’ എന്ന് വിളിക്കുന്ന ചെറിയ ചുഴലിക്കാറ്റും ഉൾപ്പെടുന്നു.
വൈകുന്നേരം 5:30-ഓടെ നോർത്ത് ബാറ്റിൽഫോർഡ് മേഖലയിൽ രൂപപ്പെട്ട കൊടുങ്കാറ്റ് സസ്കാച്ചെവനിൽ കടന്നുപോയപ്പോൾ ശക്തമായ കാറ്റും ആലിപ്പഴ വർഷവും വലിയ നാശനഷ്ടങ്ങളുണ്ടാക്കി. ഗ്രുന്താൽ, ന്യൂവൻലേജ്, ബ്ലൂമെന്താൽ തുടങ്ങിയ സ്ഥലങ്ങളിലെ ഫാം കെട്ടിടങ്ങൾക്കും ധാന്യ സംഭരണികൾക്കും മരങ്ങൾക്കും കേടുപാടുകൾ സംഭവിച്ചു. ഈ പ്രദേശങ്ങളിൽ കനത്ത ആലിപ്പഴ വർഷവും ഉണ്ടായതായി NTP റിപ്പോർട്ട് ചെയ്യുന്നു.
ആളപായമൊന്നും റിപ്പോർട്ട് ചെയ്തിട്ടില്ലെങ്കിലും, ഗ്രുന്താൽ മേഖലയിൽ നിരവധി വളർത്തുമൃഗങ്ങൾ ചത്തതായും NTP അറിയിച്ചു. ഏകദേശം 250 കിലോമീറ്ററോളം ദൂരത്തിലാണ് ഈ കൊടുങ്കാറ്റുകൾ നാശനഷ്ടങ്ങൾ ഉണ്ടാക്കിയത്. മെനോൺ മേഖലയിൽ ഇഎഫ്1 മൈക്രോബസ്റ്റ് ചുഴലിക്കാറ്റും, ഗ്രുന്താൽ ഭാഗത്ത് ഇഎഫ്1 ഡൗൺബസ്റ്റ് ചുഴലിക്കാറ്റും, ബഫർ ലേക്കിൽ ഇഎഫ്0 ചുഴലിക്കാറ്റും സ്ഥിരീകരിച്ചിട്ടുണ്ട്.
അബർഡീൻ മേഖലയിൽ ഒരു ‘ഗസ്റ്റ്നാഡോ’യും രേഖപ്പെടുത്തി. ഇതു കൂടാതെ കഴിഞ്ഞ ആഴ്ചയിൽ സസ്കാച്ചെവൻ, ആൽബെർട്ട എന്നിവിടങ്ങളിൽ രണ്ട് കനത്ത ആലിപ്പഴ കൊടുങ്കാറ്റുകൾ കൂടി ഉണ്ടായതായി കനേഡിയൻ സിവിയർ സ്റ്റോംസ് ലബോറട്ടറി (CSSL) അറിയിച്ചു. ഇതിൽ ഒരു കൊടുങ്കാറ്റ് ഏകദേശം 420 കിലോമീറ്ററോളം ദൂരത്തിൽ നാശനഷ്ടങ്ങൾ ഉണ്ടാക്കിയതായും ശാസ്ത്രജ്ഞർ സ്ഥിരീകരിച്ചു. ബ്രാൻ്റ്, ആൽബെർട്ട മുതൽ സസ്കാച്ചെവനിലെ ബീച്ചി പ്രൊവിൻഷ്യൽ പാസ്ചർ വരെയാണ് ഈ കൊടുങ്കാറ്റ് നാശനഷ്ടങ്ങളുണ്ടാക്കിയത്.
Saskatchewan hit by unexpected tornado; extensive damage
