തിരുവനന്തപുരം: മോഹൻലാലിനെ നായകനാക്കി സത്യൻ അന്തിക്കാട് സംവിധാനം ചെയ്ത പുതിയ ചിത്രം ‘ഹൃദയപൂർവ്വം’ തിയറ്ററുകളിൽ മികച്ച പ്രതികരണങ്ങളുമായി മുന്നേറുന്നു. ഓണം റിലീസായി എത്തിയ ചിത്രം കുടുംബപ്രേക്ഷകർക്ക് ആസ്വദിക്കാൻ പറ്റിയ ഒന്നാണെന്ന് കണ്ടവർ സോഷ്യൽ മീഡിയയിൽ കുറിച്ചു. ചിത്രത്തിൻ്റെ ആദ്യ പകുതി മികച്ച അനുഭവമാണ് നൽകുന്നതെന്ന് പ്രേക്ഷകർ അഭിപ്രായപ്പെടുന്നു. മോഹൻലാൽ – സംഗീത് പ്രതാപ് കോമ്പിനേഷൻ ചിത്രത്തിന്റെ പ്രധാന ആകർഷണങ്ങളിൽ ഒന്നാണ്.
ഇരുവരുടെയും കോമഡി രംഗങ്ങൾ തിയറ്ററുകളിൽ ചിരി പടർത്തുന്നുണ്ട്. കൂടാതെ, മികച്ച പശ്ചാത്തല സംഗീതവും ഛായാഗ്രഹണവും സിനിമയുടെ നിലവാരം ഉയർത്തുന്നു.
ലാലു അലക്സ്, മാളവിക മോഹനൻ, സിദ്ദിഖ്, സംഗീത, ബാബുരാജ്, സബിത ആനന്ദ് തുടങ്ങിയ വലിയൊരു താരനിര ചിത്രത്തിൽ അണിനിരക്കുന്നുണ്ട്. ആശിർവാദ് സിനിമാസും സത്യൻ അന്തിക്കാടും ഒന്നിക്കുന്ന അഞ്ചാമത്തെ ചിത്രം കൂടിയാണിത്. ‘എന്നും എപ്പോഴും’ എന്ന ചിത്രത്തിന് ശേഷം മോഹൻലാൽ- സത്യൻ അന്തിക്കാട് കൂട്ടുകെട്ടിൽ എത്തുന്ന സിനിമ കൂടിയാണ് ‘ഹൃദയപൂർവ്വം’.
സത്യൻ അന്തിക്കാടിന്റെ മക്കളായ അഖിൽ സത്യൻ കഥയും, അനൂപ് സത്യൻ പ്രധാന സംവിധാന സഹായിയായും പ്രവർത്തിച്ചിട്ടുണ്ട് എന്നതും ഈ ചിത്രത്തിന്റെ പ്രത്യേകതയാണ്. ടി.പി. സോനുവാണ് തിരക്കഥ ഒരുക്കിയിരിക്കുന്നത്. അനു മൂത്തേടത്ത് ഛായാഗ്രഹണവും കെ. രാജഗോപാൽ എഡിറ്റിംഗും നിർവഹിക്കുന്നു. മനു മഞ്ജിത്തിൻ്റെ വരികൾക്ക് ജസ്റ്റിൻ പ്രഭാകർ സംഗീതം നൽകിയിരിക്കുന്നു.
